ចិនមិនចង់ឲ្យមានការពន្យារពេលចរចារឿងនុយក្លេអ៊ែររបស់ប្រទេសអ៊ីរ៉ង់
លោកប្រមុខការទូតចិនវ៉ាង យីបានផ្តើមបំពេញទស្សនកិច្ចរយៈពេល ២ថ្ងៃនៅក្នុងប្រទេសអ៊ីរ៉ង់ដោយចាប់ផ្តើមនៅរសៀលថ្ងៃអាទិត្យ ទី១៥ កុម្ភៈ។ វត្តមានរបស់រដ្ឋមន្រ្តីការបរទេសចិនក្នុងប្រទេសអ៊ីរ៉ង់ពេលនេះបានធ្វើឡើង ចំពេលដែលក្រុមចរចា ៥ភាគី បូក១ ស្តីពីបញ្ហានុយក្លេអ៊ែរអ៊ីរ៉ង់កំពុងព្យាយាមស្វែងរកកិច្ចព្រមព្រៀងមួយឲ្យបានមុនថ្ងៃទី៣១ មីនាខាងមុខ។ តែលោកវ៉ាង យីបានព្រមានទុកជាមុនថា ចិនក្នុងនាមជាភាគីចរចាម្នាក់មិនចង់ឲ្យមានការពន្យារពេលកិច្ចចរចាទៅមុខទៀតទេ ប្រសិនបើគេនៅតែមិនអាចរកឃើញកិច្ចព្រមព្រៀងមួយដូចកាលកំណត់នោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
គឺជានៅសន្និសីទកាសែតរួមគ្នាក្នុងទីក្រុងតេហេរ៉ង់ជាមួយសមភាគីអ៊ីរ៉ង់លោកម៉ូហាម៉ាត យ៉ាវ៉ា ហ្សារីហ្វដែលលោកប្រមុខការទូតចិនវ៉ា យីបានថ្លែងយ៉ាងដូច្នេះថា កិច្ចចរចាស្វែងរកកិច្ចព្រមព្រៀងស្តីពីសំណុំរឿងអ៊ីរ៉ង់ត្រូវបានពន្យារពេលចំនួន ២ដងរួចមកហើយ និងថា ចិនមិនចង់ឲ្យមានការពន្យារពេលជាលើកទី៣ ទេ។ ការថ្លែងរបស់លោកវ៉ាង យីពេលនេះបានកើតមានឡើង មួយសប្តាហ៍បន្ទាប់ពីសហរដ្ឋអាមេរិកបានបញ្ជាក់ឲ្យដឹងថា ទីក្រុងវ៉ាស៊ីនតោនមិនបានមើលឃើញពីអត្ថប្រយោជន៍ដែលគេត្រូវពន្យារពេលកិច្ចចរចាបន្ថែមទៀតទេ ប្រសិនណាបើគ្មានរូបមន្តជាមូលដ្ឋានណាមួយត្រូវបានរកឃើញពីពេលនេះទៅដល់ថ្ងៃទី៣១ មីនានោះទេ។ គួរជម្រាបជូនថា ចិនក៏ជាភាគីចរចាម្នាក់ក្នុងចំណោម ៥ភាគី បូក១ ជាមួយអាមេរិក បារំាង អង់គ្លេស រុស្ស៊ី និងប្រទេសអាល្លឺម៉ង់។
តំាងពីខែវិច្ឆិកា ឆ្នំា ២០១៣ មកម្ល៉េះដែលក្រុមចរចា ៥ភាគី បូក១ បានព្យាយាមសម្រេចឲ្យបាននូវកិច្ចព្រមព្រៀងចុងក្រោយមួយដោយអនុញ្ញាតឲ្យអ៊ីរ៉ង់អាចបន្តសកម្មភាពនុយក្លេអ៊ែរស៊ីវិលជាថ្នូរនឹងការលើកទ័ណ្ឌកម្មអន្តរជាតិចេញពីអ៊ីរ៉ង់។ អ្វីដែលបស្ចិមលោកកំពុងបន្តទាមទារនោះ គឺសុំឲ្យអ៊ីរ៉ង់កាត់បន្ថយសមត្ថភាពនុយក្លែអ៊ែររបស់ខ្លួនដើម្បីចៀសវាងកុំឲ្យរបបសាធារណរដ្ឋអ៊ីស្លាមមួយនេះអាចផលិតគ្រាប់បែកបរិមាណូនៅថ្ងៃណាមួយ ព្រមទំាងចង់បានការធានាពីទីក្រុងតេហេរ៉ង់ថា កម្មវិធីនុយក្លេអ៊ែររបស់ខ្លួននឹងបន្តស្ថិតជាកម្មវិធីនុយក្លេអ៊ែរស៊ីវិលជារៀងរហូត។ កន្លងមក អ៊ីរ៉ង់ធ្លាប់បានបញ្ជាក់ថា កម្មវិធីនុយក្លេអ៊ែររបស់ខ្លួនមិនមានលក្ខណៈយោធាទេ តែសហគមន៍អន្តរជាតិនៅបន្តមិនទុកចិត្ត។
តាមគម្រោង កិច្ចចរចានឹងត្រូវសម្រេចឲ្យបាននូវកិច្ចព្រមព្រៀងនយោបាយមួយនៅមុនដំណាច់ខែមីនា និងកិច្ចព្រមព្រៀងជាស្ថាពរនៅមុនដំណាច់ខែកក្កដា។ តែលោកប្រមុខការទូតចិនវ៉ាង យីបានមើលឃើញថា ថ្ងៃខែកំណត់កាន់តែខិតជិតមកដល់ កិច្ចចរចាកាន់តែលំបាកស្មុគស្មាញ រីឯឧបសគ្គក៏មានកាន់តែច្រើនឡើង។ តែលោកវ៉ាង យីបានអំពាវនាវឲ្យគ្រប់ភាគីគិតប្រយោជន៍រួមជាធំ និងថា វាជាឱកាសមួយដែលគេត្រូវបិទបញ្ចប់វិបត្តិការទូតដែលបានបំពុលដោយសំណុំរឿងមួយនេះតំាងពី ១ទសវត្សមកហើយ។ ចំណែកសមភាគីអ៊ីរ៉ង់បានរម្លឹកថា អ៊ីរ៉ង់ត្រៀមខ្លួននឹងបង្ហាញពីតម្លាភាព និងភាពស្មោះត្រង់របស់ខ្លួនចំពោះបស្ចិមលោក ព្រមទំាងចង់ឃើញការបិទបញ្ចប់ទ័ណ្ឌកម្មដែលលោកយល់ថា នឹងគ្មានធ្វើឲ្យភាគីណាមួយចំណេញទេទៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ