សំណុំរឿងខាស្ហូហ្ស៊ី៖ ព្រះរាជអាជ្ញាអារ៉ាប៊ីសាអូឌីត អះអាងថាព្រះអង្គម្ចាស់MBS មិនពាក់ព័ន្ធ
ទីបំផុតទៅ ព្រះរាជអាជ្ញាអារ៉ាប៊ីសាអូឌីត បានប្រកាសទទួលស្គាល់ អំពីអំពើឃាតកម្មលើរូបលោក ហ្សាម៉ាល់ ខាស្ហូហ្ស៊ី ដែលកើតឡើងនៅថ្ងៃទី២ តុលា នៅក្នុងស្ថានកុងស៊ុលរបស់អារ៉ាប៊ីសាអូឌីត ប្រចាំក្រុងអ៊ីស្តង់ប៊ូល។ ព្រះរាជអាជ្ញាអារ៉ាប៊ីសាអូឌីត បានចោទប្រកាន់មនុស្ស១១នាក់ ហើយក្នុងចំណោមនោះ មាន៥នាក់ អាចជាប់ទោសប្រហារជីវិត។ ក៏ប៉ុន្តែព្រះរាជអាជ្ញានេះ បានអះអាងថា ព្រះអង្គម្ចាស់រាជទាយាទ ម៉ូហាម៉េដ បេនសាល់ម៉ាន់ មិនមានអ្វីពាក់ព័ន្ធ និងអំពើឃាតកម្មនេះទេ។ ដោយឡែកតួកគី បានចាត់ទុកថាការសន្និដ្ឋាននេះ មិនគ្រប់គ្រាន់ទេ ហើយបានទាមទារ ឲ្យបើកការស៊ើបអង្កេតអន្តរជាតិ ដោយឯករាជ្យ។ តែសំណើរនេះ ក៏ត្រូវបានអារ៉ាប៊ីសាអូឌីត បដិសេធចោល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ថ្ងៃព្រហស្បតិ៍ទី១៤ វិច្ឆិកា លោក Shaalan al Shaalan អ្នកនាំពាក្យនៃព្រះរាជអាជ្ញាអារ៉ាប៊ីសាអូឌីត បានប្រកាសថា លោក ហ្សាម៉ាល់ ខាស្ហូហ្ស៊ី ពិតជាត្រូវគេសម្លាប់នៅក្នុងស្ថានកុងស៊ុយពិតមែន។ ក៏ប៉ុន្តែអំពើឃាតកម្មនេះ គឺពុំមានអ្វីពាក់ព័ន្ធនឹងព្រះអង្គម្ចាស់ម៉ូហាម៉េមេដ បេនសាល់ម៉ាន់ (MBS) ទេ។
អ្នកនាំពាក្យព្រះរាជអាជ្ញារូបនេះ បានពន្យល់ថា គឺភ្នាក់ងារចារកិច្ចសម្ងាត់អារ៉ាប៊ីសាអូឌីតម្នាក់ ឈ្មោះមេបញ្ជាការ Ahmed al-Assiri ដែលជាអ្នកបញ្ជូនមនុស្សមួយក្រុម ឲ្យទៅក្រុងអ៊ីស្តង់ប៊ូល ដើម្បីចាប់ខ្លួនលោក ហ្សាម៉ាល់ ខាស្ហូហ្ស៊ី យកមកអារ៉ាប៊ីសាអូឌីត។ ក៏ប៉ុន្តែគឺប្រធានក្រុមបេសកកម្មនេះទេ ដែលបានសម្រេច សម្លាប់លោកខាស្ហូហ្ស៊ី នៅទីនោះតែម្តង។ ព្រះរាជអាជ្ញាអារ៉ាប៊ីសាអូឌីត បានទទួលស្គាល់ថា លោកហ្សាម៉ាល់ ខាស្ហូហ្ស៊ី ត្រូវបានគេសម្លាប់ដោយប្រើថ្នាំបំពុល រួចហើយត្រូវបានគេកាត់ពុះជាដុំតូចៗ ដើម្បីយកចេញទៅចោល នៅខាងក្រៅស្ថានកុងស៊ុល។
សូមបញ្ជាក់ផងដែរថា អាជ្ញាធរអារ៉ាប៊ីសាអូឌីត បានចាប់ឃាត់ខ្លួនមនុស្ស២១នាក់ ដែលពាក់ព័ន្ធក្នុងករណីនេះ ប៉ុន្តែព្រះអាជ្ញាអារ៉ាប៊ីសាអូឌីត បានធ្វើការចោទប្រកាន់ជាផ្លូវការ លើមនុស្ស១១នាក់។ ក្នុងចំណោមនោះ មាន៥នាក់ ដែលព្រះរាជអាជ្ញាអារ៉ាប៊ីសាអូឌីត ទាមទារឲ្យជាប់ទោសប្រហារជីវិត។
ដោយឡែក លោករដ្ឋមន្ត្រីការបរទេសតួកគី បាននិយាយថា អារ៉ាប៊ីសាអូឌីត ចង់ឲ្យគេជឿថា អំពើឃាតកម្មនេះ ជាអំពើមិនបានគ្រោងទុកមុន តែធាតុពិត បើពិនិត្យធាតុផ្សំ និងភស្តុតាងដែលតួកគីមាន គឺច្បាស់ណាស់ ដែលអំពើនេះ ជាការរៀបគំរោងទុកជាមុនយ៉ាងល្អិតល្អន់។ ការកាត់សាកសព ជាបំណែកតូចៗ មិនមែនជារឿង ចេះតែនឹកឃើញធ្វើភ្លាមៗនោះទេ។
ដូចគ្នាដែរ លោកប្រធានាធិបតីតួកគី បានលើកឡើងជាច្រើនលើកច្រើនសារ ថាអំពើឃាតកម្មនេះ គឺប្រាកដ ជាបានទទួលការបញ្ជាពីថ្នាក់កំពូល របស់អារ៉ាប៊ីសាអូឌីត។ មនុស្សដែលត្រូវគេចាប់ខ្លួន មាន២នាក់ ដែលគឺជាមនុស្សស្និទបំផុត និងព្រះអង្គម្ចាស់ មហាម៉េដ បេនសាល់ម៉ាន់។ តួកគី បានទាមទារ ឲ្យបើកការស៊ើបអង្កេតជាលក្ខណៈអន្តរជាតិ និងឯករាជ្យ ដើម្បីស្វែងរកការពិត។ ក៏ប៉ុន្តែសំណើរនេះ ត្រូវបានអារ៉ាប៊ីសាអូឌីត បដិសេធ។
លោក Ha Hellyer អ្នកវិភាគនៅ Atlantic Council ប្រចាំក្រុងវ៉ាស៊ីនតោន បានលើកឡើងថា តាមរយៈការប្រកាសរបស់ព្រះរាជអាជ្ញាអារ៉ាប៊ីសាអូឌីតនាពេលនេះ គឺអារ៉ាប៊ីសាអូឌីត ចង់ឲ្យពិភពលោក ជឿថាខ្លួនកំពុងព្យាយាមរកយុត្តិធម៌ហើយ តែធាតុពិត វាគឺជាយុត្តិធម៌បំភ័ន្តភ្នែក ព្រោះថា សំណួរនៅតែចោទសួរដដែល ថា អ្នកណា ជាអ្នកបញ្ជារឲ្យធ្វើអំពើដ៏ព្រៃផ្សៃនេះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ