ក្រសួងធនធានទឹក៖ ភ្លៀងនឹងបន្តធ្លាក់ចំនួន៧ថ្ងៃជាប់ៗគ្នា នៅក្របខណ្ឌទូទាំងប្រទេស
ភ្លៀងមួយមេធំ នៅរាជធានីភ្នំពេញ តាំងពីព្រឹកព្រលឹមស្រ៊ាងៗ ថ្ងៃអាទិត្យទី២៨កញ្ញានេះ បានបណ្តាលឲ្យលិចផ្លូវនៅតំបន់មួយចំនួនក្នុងរាជធានីភ្នំពេញ។ ជាមួយនឹងភ្លៀងធ្លាក់មួយមេធំនេះ ក្រសួងធនធានទឹកនិងសាលារាជធានីភ្នំពេញបានប្រកាសថា ភ្លៀងនឹងបន្តធ្លាក់ពេញមួយសប្តាហ៍នេះតែម្តង ហើយវានឹងធ្វើអោយតំបន់មួយចំនួននៅក្នុងរាជធានីភ្នំពេញលិចលង់ ប៉ុន្តែថា អាជ្ញាធរក៍បានត្រៀមវិធានការបង្ការហើយ។
ចុះផ្សាយនៅថ្ងៃ៖
ស្តាប់ - ០២:០៩
ដោយសារតែឥទ្ធិពលប្រព័ន្ធសម្ពាធទាបដែលកំពុងមានឥទ្ធិពលមកពីប្រទេសឡាវ បានធ្វើអោយប្រទេសកម្ពុជាមានភ្លៀងធ្លាក់មួយមេយ៉ាងធំ តាំងពីព្រឹកព្រលឹមស្រាងៗ ថ្ងៃអាទិត្យទី២៨កញ្ញានេះ។ នេះបើតាមការបញ្ជាក់ពី លោក ចាន់ យុត្ថា នាយកខុទ្ទកាល័យក្រសួងធនធានទឹក និងឧត្តុនិយម។ លោកបានអោយដឹងថា កាលពីព្រឹកម៉ិញ ភ្លៀងមិនមែនធ្លាក់នៅតែភ្នំពេញនោះទេ តែវាបានធ្លាក់នៅក្នុងក្របខណ្ឌទូទាំងប្រទេសពីមធ្យមទៅច្រើន។ តែចំលែកនៅភ្នំពេញ ព្រឹកមិញភ្លៀងបានធ្លាក់ខ្លាំង ក្នុងកំរិត៨០ម៉ីលីម៉ែត្រ ខណៈនៅតាមបណ្តាខេត្តត្រឹមតែ៤០ទៅ៥០ម៉ីលីម៉ែត្រប៉ុណ្ណោះ។ ជាមួយគ្នានេះ លោក ចាន់ យុត្ថា ក៍បានបង្ហាញការព្រួយបារម្ភផងដែរ ពីជំនន់ទឹកភ្លៀងដែលនឹងអាចកើតឡើងនៅតាមបណ្តាខេត្តមួយចំនួន ព្រោះថា ស្ថានភាពនេះ វាប្រហាក់ប្រហែលនឹងស្ថានភាព កាលពីឆ្នាំ២០១១ដែរ ពិសេសនៅតំបន់ទំនៀបកណ្តាលភាគពាយ័ព្យ។
លោក ចាន់ យុត្ថា បានបន្តថា ភ្លៀងមួយមេព្រឹកម៉ិញ គ្រាន់តែជាការចាប់ផ្តើមប៉ុណ្ណោះ ព្រោះថា ភ្លៀងនឹងបន្តធ្លាក់រហូតដល់ចំនួន៧ថ្ងៃជាប់ៗគ្នា។
សូមបញ្ជាក់ថា ក្រោយពេលភ្លៀងធ្លាក់មួយមេធំ កាលពីព្រឹកមិញ នៅលើទំព័រ Facebook ផ្លូវការរបស់សាលារាជធានីភ្នំពេញ ក៍បានប្រកាសជូនដំណឹងពីស្ថានភាពនៃការប្រែប្រួលអាកាសធាតុ ក្នុងរាជធានីភ្នំពេញនាសប្ដាហ៍នេះ ដោយដាក់ចំណងជើងថា "១សប្ដាហ៍នៃការធ្លាក់ភ្លៀង"។ នៅចំពោះមុខស្ថានភាពអាកាសធាតុធ្លាក់ភ្លៀងនៅថ្ងៃនេះ ហើយនឹងបន្តធ្លាក់រហូតដល់ទៅ៧ថ្ងៃជាប់គ្នាដូច្នេះ អាជ្ញាធរសាលារាជធានីភ្នំពេញ បានដាក់ចេញនូវវិធានមួយចំនួន ដើម្បីបង្ការការជន់លិចរាជធានីភ្នំពេញ នោះគឺ គ្រប់ស្ថានីយ៍បូមទឹកទាំងអស់ រួមមានស្ថានីយ៍បូមទឹក ព្រះគន្លង់១ ព្រះគន្លង់២ ផ្សារចាស់ ចតុមុខ បឹងត្របែក បឹងទំពុន កប់ស្រូវ បានត្រៀមខ្លួនបូមទឹកចេញពីប្រឡាយ ឬអាងស្តុក ជាពិសេសបានត្រៀមម៉ូទ័របំរុងគ្រប់ស្ថានីយបូមទឹក បង្ការពេលទឹកជន់លិចខ្លាំង។ អាជ្ញាធររាជធានី ក៏បានណែនាំឲ្យអាជ្ញាធរគ្រប់ខណ្ឌបោសសំអាត និងបាសំរាម ចេញពីមាត់លូ ដើម្បីឲ្យទឹកហូរ បានងាយស្រួលផងដែរ។ អាជ្ញាធររាជធានីភ្នំពេញ ក៏បានអំពាវនាវដល់បងប្អូនប្រជាពលរដ្ឋទាំងអស់ ដើម្បីត្រៀមលក្ខណៈបង្ការនូវការប្រែប្រួលអាកាសធាតុនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ