មីស៊ីលពិសេសបាញ់សាកដោយក្រុងព្យុងយ៉ាងម្សិលមិញ អាចបាញ់ដល់អាមេរិក
ចុះផ្សាយនៅថ្ងៃ៖
យោងតាមក្រុមជំនាញ មីស៊ីលដែលកូរ៉េខាងជើងបាញ់សាក ថ្ងៃអាទិត្យម្សិលមិញ ជាមីស៊ីលប្រភេទថ្មី ដែលអាចបាញ់ដល់មូលដ្ឋានយោធាអាមេរិក នៅប៉ាស៊ីហ្វិក។ ថ្ងៃចន្ទនេះ កូរ៉េខាងជើងអះអាងថា បានសាកមីស៊ីលប្រភេទថ្មីមែន ហើយបាញ់ដោយជោគជ័យ ក្រោមការត្រួតពិនិត្យផ្ទាល់ពីលោកគឹម ជុងអ៊ុន។ កូរ៉េខាងជើងអះអាងទៀតថា មីស៊ីលម្សិលមិញនេះ អាចផ្ទុកក្បាលគ្រាប់នុយក្លេអ៊ែរទៀតផង។ អាមេរិកនិងជប៉ុនបានទាមទារអោយក្រុមប្រឹក្សាសន្តិសុខអង្គការសហ ប្រជាជាតិកោះប្រជុំបន្ទាន់។ កិច្ចប្រជុំនេះ អាចធ្វើនៅថ្ងៃអង្គារស្អែក។
អ្នកជំនាញសុទ្ធតែយល់ស្របគ្នាថា មីស៊ីលកូរ៉េខាងជើងអាចបាញ់ដល់មូលដ្ឆានយោធាអាមេរិក នៅប៉ាស៊ីហ្វិក
មីស៊ីលដែលកូរ៉េខាងជើងបាញ់សាកថ្ងៃអាទិត្យម្សិលមិញ មុនទៅធ្លាក់នៅសមុទ្រជប៉ុន បានហោះបានចំងាយដល់ជាង៧០០គីឡូម៉ែត្រ បើតាមក្រុងព្យុងយ៉ាង គឺហោះបានចំងាយ៧៨៧គីឡូម៉ែត្រ គឺឆ្ងាយគួរសម។ មីស៊ីលបានធ្លាក់នៅសមុទ្រជប៉ុន ហើយក៏ធ្លាក់មិនឆ្ងាយពីទឹកដីរុស្ស៊ីដែរទេ។ ក្រសួងការពារជាតិរុស្ស៊ីប្រាប់ថា មីស៊ីលនេះធ្លាក់នៅតែ៥០០គីឡូម៉ែត្រពីរុស្ស៊ីប៉ុណ្ណោះ។
ថ្ងៃចន្ទនេះ កូរ៉េខាងជើងអះអាងថា មីស៊ីលនេះអាចផ្ទុកក្បាលគ្រាប់នុយក្លេអ៊ែរទៀតផង ហើយប្រាប់ទៀតថា ជាម៉ូដែលបាលិស្ទីកយុទ្ធសាស្ត្រថ្មី បាញ់សម្រាប់រយៈចំងាយមធ្យម។ មីស៊ីលនេះមានឈ្មោះថា Hwasong-12 អាចជាមីស៊ីលដែលកូរ៉េខាងជើងដាក់បង្ហាញកាលពីខែមេសា កន្លងទៅ។ តាមកូរ៉េខាងជើង មីស៊ីលបាញ់ម្សិលមិញនេះ គឺហោះដល់កម្ពស់ជាង២០០០គីឡូម៉ែត្រពីដីឯណោះ។ កងទ័ពជប៉ុន និងកូរ៉េខាងត្បូងក៏សង្កេតឃើញថា មីស៊ីលម្សិលមិញនេះបានហោះកម្ពស់ខ្ពស់ដែរ។
អ្នកជំនាញច្រើននាក់បង្ហាញការយល់ឃើញស្របគ្នាថា មីស៊ីលនេះពិតជាអាចបាញ់រហូតដល់មូលដ្ឋានទ័ពអាមេរិក នៅប៉ាស៊ីហ្វិក។ ថ្ងៃអាទិត្យម្សិលមិញ ក្រុងព្យុងយ៉ាងបានបាញ់មីស៊ីលប្រភេទថ្មីនេះ តាមជ្រុងមុំខ្ពស់ ដើម្បីកុំអោយប៉ះពាល់សុវត្ថិភាពសន្តិសុខប្រទេសជិតខាង។ មីស៊ីលបានហោះចំងាយជាង៧០០គីឡូម៉ែត្រ មុនធ្លាក់ទៅសមុទ្រជប៉ុន តែក្រុមជំនាញថា បើកូរ៉េខាងជើងបាញ់ដោយប្រើជ្រុងមុំធម្មតា មីស៊ីលនេះ អាចហោះឆ្ងាយបាន៤០០០គីឡូម៉ែត្រជាងនេះទៀត ហើយអាចទៅដល់មូលដ្ឋានយោធាGuam របស់អាមេរិកនៅប៉ាស៊ីហ្វិក។ នេះសបង្ហាញពីការរីកចម្រើនរបស់កូរ៉េខាងជើងពិតប្រាកដណាស់។ ហេតុនេះហើយទើបអាមេរិក ជប៉ុន បារម្ភរហូតទាមទារអោយក្រុមប្រឹក្សាសន្តិសុខអង្គការសហប្រជាជាតិកោះប្រជុំបន្ទាន់ ដើម្បីពង្រឹងទណ្ឌកម្មប្រឆាំងកូរ៉េខាងជើង។ ទោះយ៉ាងនេះក្តី អ្នកជំនាញមួយចំនួនគិតថា កូរ៉េខាងជើងនៅមិនទាន់អាចបំពាក់ក្បាលគ្រាប់នុយក្លេអ៊ែរលើមីស៊ីលទេ។
ការបាញ់មីស៊ីលរបស់ក្រុងព្យុងយ៉ាងម្សិលមិញ គឺជាការបាញ់សាកលើកទី២ គិតត្រឹមតែ១៥ថ្ងៃ។ កូរ៉េខាងជើងបាញ់មីស៊ីលនេះ គិតទៅ៤ថ្ងៃប៉ុណ្ណោះ ក្រោយលោកមូន ចែអ៊ីន ឡើងកាន់តំណែងប្រធានាធិបតីនៅកូរ៉េខាងត្បូង។ លោកមូន បានបរិហារថា ការបាញ់មីស៊ីលនេះ ជាការផ្គើនមិនចេះទទួលខុសត្រូវ។ ប្រធានាធិបតីកូរ៉េខាងត្បូងថ្មី ចង់ចរចាជាមួយកូរ៉េខាងជើងមែន តែលោកព្រមានថា ការចរចាអាចធ្វើបាន លុះត្រាក្រុងព្យុងយ៉ាងផ្លាស់ប្តូរចរឹត។ ម្សិលមិញ ចិនបានសុំអោយគ្រប់ភាគីចេះអត់ធ្មត់ ទប់កំហឹងកុំអោយស្ថានការកាន់តែតានតឹងជាងនេះ។
កូរ៉េខាងជើងរងទណ្ឌកម្មអន្តរជាតិច្រើនដងហើយ តែនៅតែបន្តបាញ់សាកមីស៊ីលឥតឈប់។ គិតតាំងពីដើមឆ្នាំ២០១៦មក ក្រុងព្យុងយ៉ាងសាកល្បងនុយក្លេអ៊ែរ២ដងហើយ ហើយបើនិយាយពីមីស៊ីលគឺបាញ់ជាង១០ដើមដែរ។ តាមរយៈការបាញ់មីស៊ីលប្រភេទថ្មីម្សិលមិញ កូរ៉េខាងជើងមិនមែនទើបតែគំរាមអាមេរិក រឺជប៉ុនជាលើកទីមួយទេ។
ប៉ុន្តែ អាមេរិកក៏មិនចង់បណ្តោយក្រុងព្យុងយ៉ាងអោយបន្តគំរាមឥតឈប់ដូច្នេះដែរ។ ប្រធានាធិបតីអាមេរិកថ្មី លោកដូណាល់ ត្រាំ មិនចេះអត់ធ្មត់ដូចលោកអូបាម៉ា ប្រធានាធិបតីអាណត្តិមុនទេ។ លោកត្រាំ បញ្ជូនប្រព័ន្ធខែលមីស៊ីលការពារមីស៊ីលទៅដំឡើងដល់កូរ៉េខាងត្បូង សបង្ហាញថា លោកមិនខ្លាចនឹងប្រើធម៌ក្តៅជាមួយលោកគឹមជុងអ៊ុនទេ អោយតែគឺម ជុងអ៊ុនហ៊ានលេងសើមជាមួយលោកឥតឈប់។ ត្បិតថាថ្មីៗនេះ លោកត្រាំ និងលោកគឺម ជុងអ៊ុន បន្ទន់ជំហរចង់ចរចាគ្នាមែន តែសម្រាប់អាមេរិក ការបាញ់មីស៊ីលម្សិលមិញ គឺជាការគំរាមជាក់ស្តែងណាស់។ តាមរយៈការបាញ់មីស៊ីលម្សិលមិញ ក្រុងព្យុងយ៉ាងប្រហែលចង់បង្ហាញអានុភាពអាវុធប្រភេទថ្មី ទៅដល់អាមេរិក រឺកូរ៉េខាងត្បូង ដែលចង់បន្ទន់ជំហរចង់ចរចាជាមួយខ្លួន។
តែមេដឺកនាំកូរ៉េខាងជើង គឹម ជុងអ៊ុន ក៏នៅតែបន្តផ្គើនគំរាមអាមេរិក ដោយចោទថា អាមេរិកដើរបំភ័យបណ្តាប្រទេសដែលគ្មានអាវុធនុយក្លេអ៊ែរ។ លោកគឹម ជុងអ៊ុន គំរាមថា បើអាមេរិកហ៊ានផ្គើនកូរ៉េខាងជើង អាមេរិកគេចមិនផុតពីមហន្តរាយប្រវត្តិសាស្ត្រទេ។ ដោយឡែក ពេលនេះ អាមេរិកអាចកំពុងឆ្លៀតបញ្ចុះបញ្ចូលរុស្ស៊ីអោយចូលក្នុងខ្សែប្រយុទ្ធប្រឆាំងនឹងកូរ៉េខាងជើងជាមួយខ្លួនដែរ។ សេតវិមានប្រាប់ថា ការដែលមីស៊ីលទៅធ្លាក់ក្បែររុស្ស៊ី ធ្វើអោយលោកដូណាល់ ត្រាំគិតថា រុស្ស៊ីមិនអាចសប្បាយចិត្តទេ។ ប៉ុន្តែ រុស្ស៊ីប្រាប់ថា មីស៊ីលដែលកូរ៉េខាងជើងបាញ់ម្សិលមិញនេះ មិនគ្រោះថ្នាក់ដល់ទឹកដីរុស្ស៊ីទេ។
បើយើងមើលពីភាគីជម្លោះ អាមេរិកនិងកូរ៉េខាងជើង នៅតែបន្តប្រឈមគ្នាផ្ទាល់មុខជាងគេ។ កន្លងមក កូរ៉េខាងជើងធ្លាប់ប្រាប់ថា ធ្វើការអភិវឌ្ឈន៍ផលិតគ្រាប់មីស៊ីល ក៏គឺដើម្បីការរស់រានរបស់ខ្លួនដែរ ដើម្បីទប់ទល់ការឈ្លានពានរបស់អាមេរិក។ កូរ៉េខាងជើងបញ្ជាក់ថា នេះមកពីអាមេរិកបង្ខំខ្លួនប៉ុណ្ណោះ។ អាមេរិកវិញប្រាប់ថា ដំឡើងខែលមីស៊ីល គឺដើម្បីប្រឈមនឹងកូរ៉េខាងជើង។ ស្ថានការណ៍តានតឹងឧបទ្វីបកូរ៉េប្រហែលពិបាករក ដំណោះស្រាយណាស់ បើគ្មានភាគីណាព្រមចុះចាញ់គ្នាយ៉ាងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ