អតីតនាយករដ្ឋមន្ត្រីចិន លី ប៉េង និមិត្តរូបនៃការបង្ក្រាបនៅទីលានធានអានមែន ស្លាប់នៅអាយុ៩០ឆ្នាំ
លោក លី ប៉េង អតីតនាយករដ្ឋមន្ត្រីនិងជាអតីតប្រធានសភាចិន ទទួលមរណភាពនៅជន្មាយុ៩០ឆ្នាំ ដោយសាររោគាពាធ។ លោកផុតដង្ហើមនៅថ្ងៃចន្ទ ម៉ោង២៣និង១៥នាទី តែកាសែតផ្លូវការរបស់រដ្ឋចិន ទើបតែប្រកាសដំណឹងមរណទុក្ខ នៅថ្ងៃអង្គារ ទី២៣កក្កដា។ ចំពោះកាសែតរដ្ឋចិន, លោក លី ប៉េង គឺជាកម្មាភិបាលដ៏ពិសេស និងជាមនុស្សដ៏ស្មោះស្មគ្ររបស់បក្សកុម្មុយនីស្តចិន។ ក៏ប៉ុន្តែ ចំពោះអ្នកការពារសិទ្ធិមនុស្ស, លោក លី ប៉េង គឺជានិមិត្តរូបនៃការបង្ក្រាបកាប់សម្លាប់ដ៏ឃោរឃៅរបស់រដ្ឋអំណាចចិន នៅទីលានធានអានមែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
លោក លី ប៉េង កាន់មុខតំណែង ជានាយករដ្ឋមន្ត្រីចិន ពីឆ្នាំ១៩៨៧ ដល់១៩៩៨។ នៅក្នុងតួនាទីនេះហើយ ដែលត្រូវគេចងចាំឈ្មោះ ថាគាត់ជាមេខ្លោងនៅពីក្រោយការបង្ក្រាបដ៏សាហាវ ចំពោះបាតុកម្មរបស់ក្រុមនិស្សិត នៅទីលានប្រជាធិបតេយ្យ ធានអានមែន។ ព្រឹត្តិការណ៍នេះ កើតឡើងក្នុងឆ្នាំ១៩៨៩ សម្លាប់មនុស្សអស់ជាង៤០០រយនាក់ ឬច្រើនជាងនេះ។
ក្នុងកំណត់ហេតុផ្ទាល់ខ្លួន ផ្សាយជាសៀវភៅនៅឆ្នាំ២០១០ លោក លី ប៉េង បានសរសេរថារូបលោក កាលណោះ គ្រាន់តែជាអ្នកអនុវត្តតាមបញ្ជារបស់ប្រធានាធិបតី តេង ស៊ាវភីង តែប៉ុណ្ណោះ។ អ្នកខ្លះមិនជឿទេ ហើយគេយល់ថា សម្តីនេះ គ្រាន់តែជាការឆ្លើយយករួចខ្លួន។ តែបើតាមឯកសារសម្ងាត់របស់បក្សកុម្មុយនីស ស្តីសំណុំរឿងធានអានមែន ដែលត្រូវភ្នាក់ងារអាមេរិក ផ្សាយនៅឆ្នាំ២០០១ គឺបង្ហាញថា លី ប៉េង គឺជាមេគំនិតធំ ដែលចេញបញ្ជាឱ្យវាយបង្ក្រាបក្រុមបាតុករ។
ក្រៅពីភាពចម្រូងចម្រាសក្នុងតួនាទីជានាយករដ្ឋមន្ត្រី, លោក លី ប៉េង ធ្លាប់ធ្វើជាប្រធានសភាប្រជាជនចិន ពីឆ្នាំ១៩៩៨ រហូតដល់ឆ្នាំ២០០៣។ ពីកុមារភាព លោកជាក្មេងកំព្រាឪពុក ហើយបានទទួលការចិញ្ចឹមបីបាច់ ពីប្រធានាធិបតី ជូ អេនឡាយ។ យុវជន លី ប៉េង ចូលបម្រើបក្សកុម្មុយនីស្តចិន ក្នុងវ័យ១៧ឆ្នាំ ហើយបានទៅរៀននៅក្នុងម៉ូស្កូ រហូតក្លាយជា វិស្វករខាងទំនប់វារីអគ្គិសនី។ នៅពេលដែលចិនគោលនយោបាយបដិវត្តវប្បធម៌, លី ប៉េង បានចូលកាន់តំណែងសំខាន់នៅក្នុងជួរបក្សកុម្មុយនីស្ត ដែលគេសង្ស័យថា ដោយសារតែឥទ្ធិពលពីគ្រួសារ ជូ អេនឡាយ។ នៅឆ្នាំ១៩៧៩ លី ប៉េង បានក្លាយជារដ្ឋមន្ត្រីផ្នែកថាមពល មុននឹងក្លាយជា នាយករដ្ឋមន្ត្រីចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ