សមរភូមិមូស៊ូលអ៊ីរ៉ាក់នៅតែក្តៅគគុក អ្នកសារព័ត៌មានលោកខាងលិចស្លាប់ក្នុងការផ្ទុះមីន
ចុះផ្សាយនៅថ្ងៃ៖
ស្តាប់ - ០៥:១១
នៅអ៊ីរ៉ាក់ កងទ័ពកំពុងបន្តសម្រុកទៅមុខ ក្នុងវាយដណ្តើមយកក្រុងមូស៊ូលភាគខាងជើងពីក្រុមជីហាតរដ្ឋអ៊ីស្លាមមកវិញ។ ក្រុមជីហាតសល់ដែនដីគ្រប់គ្រងតែប៉ុន្មានគីឡូម៉ែត្រការ៉េប៉ុណ្ណោះ នៅមូស៊ូល តែនៅតែប្រឈមស្វិតស្វាញទៅនឹងកងទ័ព។ ភេរវជនអត្តឃាតម្នាក់បានបំផ្ទុះគ្រាប់បែក នៅកណ្តាលក្រុមប្រជាជនដែលភៀសខ្លួនចេញពីមូស៊ូល ធ្វើអោយមានមនុស្សស្លាប់១២នាក់។
អ្នកស្រីវេរ៉ូនីក រ៉ូប៊ែរ Véronique Robert ជាអ្នកសារព័ត៌មានជនជាតិស្វ៊ីស ដែលរបួសធ្ងន់ធ្ងរដោយគ្រាប់មីននៅមូស៊ូល កាលពីថ្ងៃចន្ទ បានស្លាប់ហើយ។ កាលពីថ្ងៃចន្ទ អ្នកសារព័ត៌មានបារាំងម្នាក់ និងអ៊ីរ៉ាក់ម្នាក់ ដែលធ្វើការរួមគ្នាជាមួយអ្នកសារព័ត៌មានជនជាតិស្វ៊ីសរូបនេះ ក៏បានស្លាប់ក្នុងការផ្ទុះមីននេះដែរ។
អ្នកស្រី Véronique Robert និងអ្នកសារព័ត៌មានក្នុងប្រទេសដែលមានសង្គ្រាមជាអ្នកសារព័ត៌មានដ៏គំរូបំផុត
ក្នុងសមរភូមិសង្គ្រាមក្តៅគគុកដូចជានៅមូស៊ូល មិនថាអ្នកសារព័ត៌មានក្នុងស្រុក រឺបរទេសទេ សុទ្ធតែជាអ្នកហ៊ានប្រថុយជីវិត រត់កាត់គ្រាប់កាំភ្លើង គ្រាប់មីន ក៏ព្រោះតែចង់អោយយើងគ្រប់គ្នាបានដឹងពីស្ថានការណ៍ជាក់ស្តែង ដឹងពីទុក្ខលំបាករបស់ជនស៊ីវិល។ ដូចជាអ្នកស្រីវេរ៉ូនីក រ៉ូប៊ែរ ជាអ្នកកាសែតជនជាតិស្វ៊ីសអញ្ចឹង។ គាត់អាយុ៥៤ឆ្នាំ ម្សិលមិញ គាត់ស្លាប់ដោយសាររបួសធ្ងន់ ដោយការផ្ទុះមីន នៅមូស៊ូលកាលពីថ្ងៃចន្ទ។ ពិតជាអ្នកសារព័ត៌មានស្រ្តីម្នាក់ក្លាហានណាស់។ (រូបថតខាងក្រោមនេះជារូបថតអ្នកស្រីរ៉ូប៊ែរ)
មិនថាជាអ្នកសារព័ត៌មានស្រីរឺប្រុសទេ ក្នុងសមរភូមិសង្គ្រាមបែបនេះ ពួកគេពិតជាលះបង់ខ្ពស់ណាស់ ទើបបានជាហ៊ានចូលទៅកន្លែងគ្រោះថ្នាក់ មិនខ្វល់ពីការបារម្ភរបស់ក្រុមគ្រួសារពួកគេ។ អ្នកស្រីវេរ៉ូនីក រ៉ូប៊ែរ ជនជាតិស្វ៊ីស បម្រើការអោយសារព័ត៌មានស្វ៊ីសនិងសារព័ត៌មានបារាំង។ គាត់មានបទពិសោធន៍ក្នុងសមរភូមិប្រយុទ្ធច្រើនណាស់ ពិសេសនៅសមរភូមិដើមបូព៌ាតែម្តង។ អ្នកស្រីរ៉ូប៊ែរ ដើរយកព័ត៌មាន ឆ្លងកាត់គ្រាប់ ជាមួយកងទ័ពអ៊ីរ៉ាក់ផ្ទាល់។ អ្នកស្រីធ្វើបទយកការណ៍ពិសេសអោយទូរទស្សន៍បារាំង ទាក់ទងការវាយលុករបស់កងទ័ពអ៊ីរ៉ាក់ ដើម្បីដណ្តើមយកក្រុងមូស៊ូលពីក្រុមភេរវជន។
ក្នុងហេតុការណ៍ផ្ទុះមីន នៅថ្ងៃចន្ទដើមសប្តាហ៍ ក៏មានអ្នកកាសែត៣នាក់ទៀតនៅជាមួយអ្នកស្រីដែរ ក្នុងនោះមានបុរសអ្នកកាសែតបារាំងម្នាក់ និងអ៊ីរ៉ាក់ម្នាក់។ អ្នកទាំង២នេះស្លាប់ដោយគ្រាប់មីននេះដែរ។ ហើយអ្នកកាសែតម្នាក់ទៀត ជាជនជាតិបារាំង បានរងរបួសស្រាល។ គិតតាំងពីឆ្នាំ២០១៤មក អ្នកសារព័ត៌មានដែលស្លាប់ក្នុងសមរភូមិអ៊ីរ៉ាក់ បើគិតទាំងអ្នកស្រីវេរ៉ូនីក រ៉ូប៊ែរ និងអ្នកកាសែតទាំង២នាក់ដែលស្លាប់ដោយការផ្ទុះមីននេះ គឺមានអ្នកកាសែត២៩នាក់ ដែលបានបាត់បង់ជីវិត។ ពេលនេះ ក្រុមជីហាតរដ្ឋអ៊ីស្លាមមានអ្នកកាសែតនិងអ្នករួមការងារជាជនជាតិអ៊ីរ៉ាក់ទាំងអស់ ១០នាក់ នៅក្នុងដៃ។
និយាយទៅ អ្នកសារព័ត៌មានហ៊ានចូលក្នុងសមរភូមិប្រយុទ្ធ ពិតជាគួរអោយសរសើរនិងគួរគោរពណាស់។ ពួកគេលះបង់ជីវិត លះបង់ប្រយោជន៍ផ្ទាល់ខ្លួន ដើម្បីអោយយើងគ្រប់គ្នាដែលនៅក្រៅសង្វៀនប្រយុទ្ធនេះ អាចដឹងពីទុក្ខលំបាកប្រជាជនក្នុងប្រទេសដែលមានសង្គ្រាម។ នេះជាការចូលរួមធំធេងណាស់ ដើម្បីអោយគ្រប់គ្នា ពិសេសមេដឺកនាំធំៗក្នុងពិភពលោក បើកភ្នែកមើលថា តើជនស៊ីវិលរងគ្រោះថ្នាក់ប៉ុណ្ណា ដោយសារតែមហិច្ឆតាអំណាចរបស់គ្រប់ភាគីជម្លោះនេះ។
ឧទាហរណ៍ជាក់ស្តែងមួយទៀត បង្ហាញថា អ្នកកាសែតជាអ្នកចូលរួមទាមទារយុត្តិធម៌ក្នុងសង្គមដែរនោះ គឺថាកូនប្រុសម្នាក់របស់អ្នកស្រី រ៉ូប៊ែរ ជាអ្នកកាសែតជនជាតិស្វ៊ីសនេះ កាលពី១០ឆ្នាំមុន កូនប្រុសគាត់ដែលនៅជាអនិតិជននៅឡើយ ធ្លាប់រងការបំពានភេទពីជនជាតិអារ៉ាប់ម្នាក់ នៅឌុយបៃ។
ដោយសាររឿងអយុត្តិធម៌នេះ អ្នកស្រីរ៉ូប៊ែរ បានធ្វើសកម្មភាព ក្នុងចលនាជួយអនិតិជនដែលរងការរំលោភបំពាន ពីមន្ត្រីជាន់ខ្ពស់មួយចំនួនរបស់ប្រទេសអេមៀរ៉ាតអារ៉ាប់រួម និងឌុយបៃ។ អ្នកស្រីរ៉ូប៊ែរ ជាអ្នកកាសែតគំរូម្នាក់ សម្រាប់អ្នកកាសែតគ្រប់រូប។
សមរភូមិមូស៊ូល៖ កងទ័ពបារម្ភថា ក្រុមភេរវជនអាចបង្កប់ខ្លួនជាមួយប្រជាជនដែលភៀសខ្លួន
និយាយពីសមរភូមិអ៊ីរ៉ាក់ គឺនៅតែក្តៅគគុកជានិច្ច។ ក្រុមភេរវជនជីហាតរដ្ឋអ៊ីស្លាមសល់ដែនដីប្រហែល២គីឡូម៉ែត្រការ៉េប៉ុណ្ណោះ នៅមូស៊ូល ហើយមានគ្នាមិនដល់២០០នាក់ទេ។ តែមើលទៅកងទ័ពដែលមានជំនួយពីសម្ព័ន្ធអន្តរជាតិដឹកនាំដោយអាមេរិក ក៏ដូចជាពិបាកវាយយកមូស៊ូលណាស់ដែរ
មិនដឹងថា ពេលណាទើបកងទ័ពអាចវាយបានមូស៊ូលចប់សព្វគ្រប់ទេ អាចថាឆាប់ៗ រឺក៍ច្រើនសប្តាហ៍ទៀត។ រហូតពេលនេះ កងទ័ពយកបានក្រុងមូស៊ូលប្រហែល៥០ភាគរយមកវិញ។ ការដែលពិបាកវាយយកមូស៊ូល គឺដោយសារតែក្រុមជីហាតពូកែរកល្បិច តស៊ូទប់ទល់ណាស់ដែរ។
ជាក់ស្តែង ថ្មីៗនេះ ពេលប្រជាជនកំពុងភៀសខ្លួន មានភេរវជនអត្តឃាតម្នាក់មិនដឹងចេញពីណាពីណីមកទេ បានចូលមកបំផ្ទុះគ្រាប់បែកសម្លាប់មនុស្ស ក្នុងហ្វូងអ្នកភៀសខ្លួនតែម្តង។ មានស្ត្រីនិងកុមារច្រើននាក់ស្លាប់ក្នុងភេរវកម្មនេះ។ កងទ័ពបារម្ភថា សកម្មជនជីហាតកំពុងបន្លំធ្វើជាប្រជាជនរត់ភៀសខ្លួនពីមូស៊ូលនឹងគេដែរ។ តាមផ្លូវដែលប្រជាជនភៀសខ្លួន ក៏មិនសូវជាមានសុវត្ថិភាព ដូច្នេះក្រុមភេរវជនអាចបន្លំស្លៀកពាក់ជាកងការពារសន្តិសុខ ដើម្បីបំផ្ទុះគ្រាប់បែក បង្កភេរវកម្ម។
មួយទៀត ការដែលពិបាកនឹងវាយយកមូស៊ូលមកវិញ ក៏ដោយសារតែមូស៊ូលមានច្រកផ្លូវតូចៗ និងសំបូរជនស៊ីវិលនៅទីនោះ។ អញ្ចឹងកងទ័ពពិបាកចូលទៅណាស់។ គិតដល់ពេលនេះ មនុស្សប្រហែល៨ពាន់នាក់ បានរត់រួចពីក្រុងមូស៊ូល។ នៅមាន១សែននាក់ទៀត ដែលនៅជាប់ក្នុងតំបន់គ្រប់គ្រងរបស់ក្រុមជីហាតរដ្ឋអ៊ីស្លាម។ ក្រុមជីហាតទុកពួកគេធ្វើជាខែលការពារ ទប់ទល់នឹងកងទ័ពវិញ។
ប្រជាជនអ៊ីរ៉ាក់ទាំងនេះ ពិបាករត់ភៀសខ្លួនពីមូស៊ូលណាស់។ រត់ចេញពីតំបន់ក្រុមជីហាត គឺបង្ហាញថា ពួកគេត្រូវប្រថុយឆ្លងបន្ទាត់ព្រំដែនប្រយុទ្ធ ហើយអាចនឹងត្រូវក្រុមជីហាតសម្លាប់បានគ្រប់ពេលដែរ។ អ្នកដែលមិនហ៊ានប្រថុយ រឺក៏អ្នកដែលសម្រេចបន្តនៅតំបន់របស់ក្រុមជីហាត ពេលនេះ កំពុងប្រឈមនឹងការខ្វះទឹក និងអាហារបរិភោគ ពិសេសក្មេងៗតូចៗតែម្តង។ ក្មេងៗខ្លះ កំពុងធ្លាក់ក្នុងស្ថានភាពខ្វះអាហាររូបត្ថម្ភ។
ដោយឡែក នៅសមរភូមិប្រយុទ្ធ កាលពីថ្ងៃសុក្រ សម្ព័ន្ធអន្តរជាតិដឹកនាំដោយអាមេរិក បានកំចាត់អ្នកគ្រប់គ្រងហិរញ្ញវត្ថុម្នាក់ របស់ក្រុមជីហាតរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ