ក្រសួងប្រៃសណីយ៍ បញ្ចប់តំណែងមន្ត្រី២រូបក្រោយបាត់លុយ២៣ម៉ឺនដុល្លារ
ក្រសួងប្រៃសណីយ៍ និងទូរគមនាគមន៍ បានប្រកាសបញ្ចប់តំណែងមន្ត្រី ២រូបរបស់ខ្លួន ដែលជាប់ពាក់ព័ន្ធទៅនឹងការបាត់បង់ប្រាក់អង្គភាពចំនួន២៣ម៉ឺនដុល្លារ និងធ្វើឲ្យអង្គភាពបាត់បង់ទំនុកចិត្ត។ ការប្រកាសបញ្ចប់តំណែងនេះ បន្ទាប់ពីអធិការដ្ឋានក្រសួងប្រៃសណីយ៍ និងក្រុមការងារនៃអង្គភាពប្រឆាំងអំពើពុករលួយ បានរកឃើញថា មានការខ្វះខាតធ្ងន់ធ្ងរលើការងារគ្រប់គ្រង និងការដឹកនាំរបស់ថ្នាក់ដឹកនាំទូរគមនាគមន៍កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
យោងតាមសេចក្តីប្រកាសរបស់ក្រសួងប្រៃសណីយ៍ និងទូរគមនាគមន៍ កាលពីថ្ងៃទី ១៨កុម្ភៈ មានការតែងតាំង និងប្រគល់ភារកិច្ច ដល់ប្រធានក្រុមប្រឹក្សាភិបាលថ្មី និងអគ្គនាយកស្តីទី នៃទូរគមនាគមន៍កម្ពុជា។ ការប្រកាសតែងតាំងថ្មី ដែលបន្ទាប់ពីលទ្ធផលនៃអធិការកិច្ចរួម រវាងអធិការដ្ឋានក្រសួងប្រៃសណីយ៍ និងទូរគមនាគមន៍ និងក្រុមការងារនៃអង្គភាពប្រឆាំងអំពើពុករលួយ បានរកឃើញភាពមិនប្រក្រតីមួយចំនួន បានកើតឡើងនៅក្នុងអង្គភាពទូរគមនាគមន៍កម្ពុជា។
ភាពមិនប្រក្រតី ដែលរួមមានដូចជា ការកិបកេងលួចបន្លំប្រាក់ចំណូលរបស់អង្គភាពចំនួន ២៣ម៉ឺនដុល្លារអាមេរិក។ ការគ្រប់គ្រងចំណូល ចំណាយ មិនច្បាស់លាស់ គ្មានតម្លាភាព គ្មានគណនេយ្យភាព ដែលធ្វើឲ្យចំណូលធ្លាក់ចុះ បំណុលកើនឡើងជាលំដាប់ និងមានចន្លោះប្រយោងច្រើន ដែលឈានទៅដល់ការកិបកេង និងការលុបបំណុល។ និងមួយវិញទៀត គឺមិនបានយកចិត្តទុកដាក់ត្រួតពិនិត្យការគ្រប់គ្រងកិច្ចបញ្ជីការគណនេយ្យ និងឯកសារពាក់ព័ន្ធ ដែលធ្វើឲ្យបាត់បង់ឯកសារមានសារៈសំខាន់ដោយចេតនា។
ដោយសារប្រកាសនេះ ក្រសួង បានសម្រេចឲ្យ លោកខូវ មករា អនុរដ្ឋលេខាធិការ និងជាអ្នកនាំពាក្យនៃក្រសួងប្រៃសណីយ៍ និងទូរគមនាគមន៍ ឡើងជាប្រធានក្រុមប្រឹក្សាភិបាលទូរគមនាគមន៍កម្ពុជា ជំនួសលោកមាស ប៉ូ ដែលកាន់តំណែងនេះពីមុន។ និងមួយទៀត គឺលោកសន វី អគ្គនាយករងនៃទូរគមនាគមន៍កម្ពុជា ត្រូវបានប្រគល់ភារកិច្ចជាអគ្គនាយកស្តីទីនៃទូរគមនាគមន៍កម្ពុជា ជំនួសលោកឡាយ ម៉ារីវ៉ូ។ ហើយសមាសភាពក្រុមប្រឹក្សាភិបាល ក៏ត្រូវបានកាត់បន្ថយមកនៅត្រឹម ៥រូបវិញ ដើម្បីកែសម្រួលរចនាសម្ព័ន្ធដឹកនាំរបស់អង្គភាព។
លោកឱម យ៉ិនទៀង ប្រធានអង្គភាពប្រឆាំងអំពើពុករលួយ បានលើកឡើងថា ទោះបីជាមានការបញ្ចប់តំណែងយ៉ាងនេះក៏ដោយ ប៉ុន្តែបើតាមបែបបទរដ្ឋបាល ប្រធានស្ថាប័ននោះ ត្រូវចេញលុយសងមកកាន់រដ្ឋវិញ បើមិនដូច្នោះទេ នឹងចាត់វិធានការផ្លូវច្បាប់ជាបន្តទៀត។ យ៉ាងណាក៏ដោយ លោកខូវ មករា ដែលអ្នកនាំពាក្យក្រសួងប្រៃសណីយ៍ និងទូរគមនាគមន៍ បានបញ្ជាក់ថា ចំណាត់ការសង ឬមិនសង ត្រូវចាំមើលលើការស៊ើបអង្កេតជាបន្តទៀតសិន ដោយសារពេលនេះខាងក្រសួង និងអង្គភាពប្រឆាំងអំពើពុករលួយ នៅមិនទាន់អាចចោទប្រកាន់ជនណាមួយបាននៅឡើយទេ ព្រោះបុគ្គលដែលត្រូវដកតំណែងនោះ គឺគ្រាន់តែសង្ស័យថាជាប់ពាក់ព័ន្ធតែប៉ុណ្ណោះ។
លោកខូវ មករា ក៏បានបន្តថា ដោយសារតែក្រសួងមានការសង្ស័យពីរឿងនេះ ទើបកន្លងមកក្រសួងបានស្នើសុំកិច្ចសហការជាមួយអង្គភាពប្រឆាំងអំពើពុករលួយ បង្កើតជាអធិការកិច្ចរួមមួយ រហូតឈានដល់ការអង្កេត និងចេញជាលទ្ធផលជាក់លាក់បែបនេះ។
គួរជម្រាបជូនថា ចំណាត់ការបែបនេះ ត្រូវបានក្រសួងប្រៃសណីយ៍ និងទូរគមនាគមន៍ អះអាងថា ជាការអនុវត្តតាមអភិក្រម «ឆ្លុះកញ្ចក់ ងូតទឹក ដុសក្អែល និងព្យាបាល» តាមអនុសាសន៍របស់ប្រមុខរដ្ឋាភិបាលកម្ពុជា លោកនាយករដ្ឋមន្ត្រីហ៊ុន សែន ដែលបានណែនាំដល់មន្ត្រីរាជការគ្រប់លំដាប់ថ្នាក់តាំងពីដើមអណត្តិទី៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ