មូលហេតុសំខាន់ៗបង្កប់នៅពីក្រោយទស្សនកិច្ចរបស់នាយករដ្ឋមន្ត្រីឥណ្ឌានៅជប៉ុន
ចុះផ្សាយនៅថ្ងៃ៖
ស្តាប់ - ០៤:៤៨
លោកនរិន្ទ្រម៉ូឌី នាយករដ្ឋមន្ត្រីឥណ្ឌា បានអញ្ជើញទៅបំពេញទស្សនកិច្ចនៅប្រទេសជប៉ុន នៅថ្ងៃសោរ៍ ទី៣០ សីហា នេះ។ មូលហេតុចំបងនៃដំណើរទស្សនកិច្ចនេះ គឺដើម្បីពង្រឹងទំនាក់ទំនងសេដ្ឋកិច្ចរវាងប្រទេសទាំងពីរ។ ប៉ុន្តែទន្ទឹមនឹងនេះដែរ សម្ព័ន្ធភាពដ៏ល្អូកល្អឺនរវាងប្រទេសទាំងពីរ ហាក់បង្កប់ន័យផ្សេងទៀត ក្រៅតែពីបញ្ហាសេដ្ឋកិច្ច។ នោះគឺការចងស្ពានមេត្រីឲ្យបានរឹងមាំ រវាងឥណ្ឌា និង ជប៉ុន ដើម្បីទប់ទល់ជាមួយមហាយក្សចិន ដែលកំពុងក្អេងក្អាងក្នុងតំបន់អាស៊ី។
ការអញ្ជើញទៅបំពេញទស្សនកិច្ចរបស់លោក នរិន្ទ្រម៉ូឌី នាយករដ្ឋមន្រ្តីឥណ្ឌា នៅប្រទេសជប៉ុនក្នុងពេលនេះ ធ្វើឡើងក្នុងមូលហេតុដែលសំខាន់ជាងគេ គឺដើម្បីពង្រឹងទំនាក់ទំនងពាណិជ្ជកម្មរវាងប្រទេសទាំងពីរ។ លោក នរិន្ទ្រម៉ូឌី ដែលគេគ្រប់គ្នាស្គាល់ថាជាមនុស្សម៉ឺងម៉ាត់ បានផ្តជ្ញាថា នឹងលើកមុខលើកមាត់ប្រទេសឥណ្ឌា នៅលើឆាកអន្តរជាតិ ក្នុងនាមជាមហាអំណាចសេដ្ឋកិច្ចនៅអាស៊ី។ ក្នុងន័យនេះ ឥណ្ឌាត្រូវការការជ្រោមជ្រែងរបស់ជប៉ុន ដែលជាប្រទេសមានសេដ្ឋកិច្ចរឹងមាំ ហើយដែលមានជំនាញបច្ចេកវិទ្យាជឿនលើនជាងគេនៅអាស៊ី។ ឥណ្ឌាត្រូវការការវិនិយោគរបស់ជប៉ុនក្នុងការកសាងហេដ្ឋារចនាសម្ព័ន្ធសាធារណៈ ដូចជាប្រព័ន្ធរថភ្លើងជាដើម។
ពាក្យថាមហាអំណាច មិនមែនមានន័យថា មានសេដ្ឋកិច្ចលូតលាស់ គ្រប់គ្រាន់នោះទេ តែឥណ្ឌាត្រូវមានប្រព័ន្ធការពារជាតិមួយដែលខ្លាំងក្លា ថែមទៀត។ វិស័យយោធានេះ ទៀតសោត ឥណ្ឌា ប្រាថ្នាចង់បានបទពិសោធន៍របស់ជប៉ុន ដែលមានបច្ចេកវិទ្យាឈានមុខ ជាពិសេសក្នុងវិស័យនុយក្លេអ៊ែរ។ កន្លងមក កាលពីឆ្នាំ ២០១២-២០១៣ ឥណ្ឌាបានសាកល្បងបាញ់គ្រាប់មីស៊ីលរបស់ខ្លួន ប្រកបដោយជោគជ័យ។ ប្រព័ន្ធនុយក្លេអ៊ែរនេះ ឥណ្ឌាមិនមែនត្រូវការតែនៅក្នុងវិស័យយោធាប៉ុណ្ណោះទេ តែឥណ្ឌាត្រូវការប្រើប្រាស់ក្នុងការផលិតអគ្គីសនី ឲ្យដល់ប្រជាជនឥណ្ឌាប្រើប្រាស់។
ចំណែកភាគីជប៉ុនវិញ ក៏បានទទួលផលចំណេញមិនតិចដែរក្នុងសម្ព័ន្ធភាពនេះ។ ចូរកុំភ្លេចថា មានសហគ្រាសផលិតរថយន្តជប៉ុនច្រើនណាស់ ដែលបានទៅតាំងទីនៅឥណ្ឌា។ នោះគឺដោយសាឥណ្ឌាមានវត្ថុធាតុដើម។ វត្ថុធាតុដើមមួយដែលជប៉ុន ក៏ដូចជាប្រទេសធំៗផ្សេងទៀតស្វែងរកនោះ គឺគេហៅថា ដីកម្រ។ ដីកម្រនេះវាមានផ្ទុកនូវសារធាតុលោហៈគីមី សំខាន់ៗ ១៧មុខ។ លោហៈគីមីកម្រ ទាំងនេះ គេត្រូវការណាស់ ដើម្បីផលិត ដូចជា ទូរស័ព្ទទំនើបៗបច្ចុប្បន្ន រីក៏ម៉ាស៊ីនរថយន្តដែលដើរដោយចរន្តអគ្គីសនី និង អំពូលភ្លើងជាដើម។ ឧស្សាហកម្មជប៉ុននាំមុខគេ នរណាៗក៏ដឹងដែរថា គឺសម្ភារៈអគ្គីសនីទាំងអស់នេះហើយ ដែលជប៉ុនលក់ដាច់ជាងគេ ហើយនរណាក៍ទទួលស្គាល់គុណភាព។ រហូតមកដល់ពេលនេះ ជប៉ុនរំពឹងស្ទើរតែទាំងស្រុងលើការនាំចូលលោហៈកម្រទាំងនោះពីចិន ពោលគឺប្រមាណជា៦០ភាគរយនៃតំរូវការរបស់ឧស្សាហកម្មជប៉ុន។ ជប៉ុនដែលមិនសូវជាត្រូវគ្នាជាមួយចិន បានរិះរកគ្រប់វិធី ដើម្បីកុំឲ្យរំពឹងតែលើចិន ព្រោះថាកុំឲ្យចិនបានចិត្ត។ បើតាមការស្មានទុក ឥណ្ឌានឹងយល់ព្រមផ្គត់ផ្គង់លោហៈកម្រនេះ ឲ្យជប៉ុន ប្រមាណជាជាង២ពាន់តោនក្នុងមួយឆ្នាំៗ ពោលគឺស្មើនឹង១៥ភាគរយដែរ។
យើងដឹងហើយថា ជប៉ុននិងចិន មិនសូវជាត្រូវគ្នាទេ ព្រោះថាមានជម្លោះប្រវតិ្តសាស្រ្ត ក៏ដូចជាជម្លោះក្នុងការកាន់កាប់ដែនកោះក្នុងសមុទ្រ។ ដូចពាក្យគេតែងនិយាយថា សត្រូវរបស់សត្រូវខ្ញុំ គឺជាមិត្តខ្ញុំ។ ដូចគ្នាជាមួយជប៉ុន ឥណ្ឌាមិនសូវត្រូវជាមួយចិនទេ។ ជម្លោះព្រំដែនគឺជាបញ្ហាចំបង។ ឥណ្ឌាមានព្រំដែននៅភាគខាងជើងយ៉ាងវែងអន្លាយជាមួយចិន នៅតាមជួរភ្នំហិមាល័យ។ យូរៗម្តង ចិនតែងតែបង្ហាញឲ្យឥណ្ឌាភ័យ ដោយការចល័តទ័ព និងទន្រ្ទានចូលក្នុងទឹកដីឥណ្ឌា។ ចិនមិនសប្បាយចិត្តទេ ដែលឃើញឥណ្ឌា មានការរីកចំរើន ក្នុងវិស័យយោធា។ ឧទាហរណ៍កាលពីឆ្នាំ ២០១៣ គ្រាន់តែឥណ្ឌាបានសាកល្បងបាញ់គ្រាប់មីស៊ីលបានសម្រេច ចិនបានកំញើញ ដោយបានបញ្ជូនទ័ព ចូលទៅដីឥណ្ឌាចំងាយ២០គីឡូម៉ែត្រ ក្នុងរដ្ឋឡាដាក្ខបូព៌ា។
លើសពីនេះទៅទៀត ចិនមានគម្រោងសាងសង់ទំនប់ជាច្រើននៅតាមទន្លេ ប្រាម៉ាពូទ្រ។ គម្រោងនេះ ធ្វើឲ្យឥណ្ឌានិង បង់ក្លាដេស្ស មិនពេញចិត្តទេ ព្រោះថាវានិងប៉ះពាល់ប្រទេសពួកគេដែលនៅខាងក្រោម។ មួយវិញទៀត ចិននិងឥណ្ឌាមិនពេញចិត្តគ្នា ទាក់ទងទៅនឹងអធិបតេយ្យភាពតំបន់ទីបេ។ ឥណ្ឌាបានជួយទំនុកបម្រុងថ្នាក់ដឹកនាំភៀសខ្លួនរបស់ទីបេ ដូចជាសម្តេចសង្ឃដាឡៃឡាម៉ាជាដើម។ ក្រៅពីនេះ ចិនបានធ្វើវិនិយោគទុន រកស៊ីជាមួយប៉ាគីស្ថាន ក្នុងតំបន់កាហ្សមៀរ ដែលតំបន់នេះ មានការប្រទាញប្រទង់គ្នារវាងឥណ្ឌានិងប៉ាគីស្ថាន។ ម្យ៉ាងទៀត ជប៉ុននិងឥណ្ឌាជាប្រទេសដែលប្រកាន់លទ្ធិប្រជាធិបតេយ្យដូចគ្នា ខុសគ្នាពីរបបកុម្មុនិស្តផ្តាច់ការរបស់ចិន។ សរុបមក ការខិតចូលមកជិតគ្នារវាងមហាយក្សសេដ្ឋកិច្ចអាស៊ីទាំងពីរ ជាសារប្រាប់ទៅដល់ក្រុងប៉េកាំង ឲ្យឈប់ក្អេងក្អាង ដើរបង្កអស្ថិរភាពនៅតំបន់អាស៊ីតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ