គណបក្ស សង្គ្រោះជាតិ៖ ដំណោះស្រាយក្រុមប្រឹក្សាធម្មនុញ្ញមិនឆ្លុះបញ្ចាំងពីបណ្តឹង
នៅព្រឹកថ្ងៃសុក្រទី៣០ សីហានេះ គឺជាលើកទី៣ហើយ ដែលក្រុមប្រឹក្សាធម្មនុញ្ញបានបញ្ជាឱ្យគណៈកម្មាធិការជាតិរៀបចំការបោះឆ្នោត បើកកញ្ចប់សុវត្ថិភាព “ក” ចំនួន១២ ការិយាល័យ នៅមណ្ឌលខេត្តសៀមរាប។ លទ្ធផលនៃការបើកកញ្ចប់សុវត្ថិភាពទាំងនោះ មិនមានតួលេខប្រែប្រួលខុសគ្នាពីលទ្ធផលដែលប្រកាសកន្លងមក គួរឱ្យកត់សម្គាល់នោះទេ។ តែយ៉ាងណាក៏ដោយគណបក្សសង្គ្រោះជាតិ បានអះអាងថា ការបើកកញ្ចប់សុវត្ថិភាព “ក”នៅថ្ងៃនេះ មិនបានឆ្លុះបញ្ចាំងពីពាក្យបណ្តឹងរបស់គណបក្ស ដែលបានប្តឹងទៅក្រុមប្រឹក្សាធម្មនុញ្ញឱ្យបើកនៅចំនួន២០០ការិយាល័យ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ដំណោះស្រាយរបស់ក្រុមប្រឹក្សាធម្មនុញ្ញ មិនបានឆ្លុះបញ្ចាំងពីបណ្តឹងរបស់គណបក្សសង្គ្រោះជាតិនោះទេ។ នេះបើតាមកាអះអាងរបស់លោក គួយ ប៊ុនរឿន មន្ត្រីជាន់ខ្ពស់គណបក្សសង្គ្រោះជាតិ ដែលបានប្រាប់អ្នកសារព័ត៌មាន នៅក្រោយការបើកកញ្ចប់សុវត្ថិភាព “ក” នៅទីស្នាក់ការ គ.ជ.ប ព្រឹកថ្ងៃសុក្រទី៣០ សីហានេះ។
លោក គួយ ប៊ុនរឿន បានអះអាងថា គោលបំណងនៃបណ្តឹងរបស់គណបក្សសង្គ្រោះជាតិនៅមណ្ឌលខេត្តសៀមរាប មាន៣៖ គឺទី១ ស្នើឱ្យមានការបោះឆ្នោតឡើងវិញ ចំនួន១៦ការិយាល័យ។ ទី២ ស្នើសុំឱ្យមានការរាប់សន្លឹកឆ្នោតមិនបានការ ចំនួន២០០ការិយាល័យ និងផ្តល់សុពលភាពឡើងវិញ។ និងទី៣ ផ្ទៀងផ្ទាត់សន្លឹកឆ្នោតចំនួន ៧៥ការិយាល័យ។
តែផ្ទុយទៅវិញ ក្រុមប្រឹក្សាធម្មនុញ្ញបានត្រឹមសម្រេចឱ្យបើកតែ ១២ការិយាល័យតែប៉ុណ្ណោះ ដែលលោក គួយ ប៊ុនរឿន ពន្យល់ថា ជាការមិនឆ្លុះបញ្ចាំងពីកំណត់ហេតុដែលក្រុមប្រឹក្សាធម្មនុញ្ញបានសាកសួរមន្ត្រីគណបក្សសង្គ្រោះជាតិ។
យ៉ាងណាក៏ដោយ ជាលទ្ធផលនៃការបើកកញ្ចប់ផ្ទៀងផ្ទាត់លទ្ធផលបោះឆ្នោតទាំង១២ការិយាល័យនោះ មិនមានតួលេខប្រែប្រួលអ្វីដែលប៉ះពាល់ដល់លទ្ធផលនៃអាសនៈរបស់គណបក្សប្រជាជនកម្ពុជា និងគណកប្សសង្គ្រោះជាតិនោះទេ។ ប៉ុន្តែ គេកត់សម្គាល់ឃើញថា ក្នុងចំណោម១២ការិយាល័យនោះ មានកញ្ចប់សុវត្ថិភាព “ក” ៧ការិយាល័យ ត្រូវបានបើកចំហរ។ ភ្លាមៗ ក្រោយការបើកកញ្ចប់សុវត្ថិភាព “ក” នោះ តំណាងក្រុមប្រឹក្សាធម្មនុញ្ញមិនបានពន្យល់បកស្រាយលើការអះអាងរបស់គណបក្សសង្គ្រោះជាតិនោះទេ។
បើតាមលទ្ធផលបណ្តោះអាសន្នរបស់គ.ជ.ប នៅខេត្តសៀមរាប គណបក្សប្រជាជនកម្ពុជាទទួលបាន ៤ អាសនៈ ទល់នឹង ២អាសនៈរបស់គណបក្សសង្គ្រោះជាតិ។
គួរបញ្ជាក់ឱ្យដឹងដែរថា ការបើកកញ្ចប់សុវត្ថិភាព នៅមណ្ឌលខេត្តសៀមរាបនៅព្រឹកនេះ ដែលបានចាប់ផ្តើមតាំងពីម៉ោងប្រមាណជា ៨ និង៣០នាទីព្រឹកនោះ ហៀបនឹងផ្អាកការពិនិត្យលើការិយាល័យទាំង១២នោះទៅហើយ ខណៈដែលគណបក្សសង្គ្រោះជាតិ ដែលមាន លោកគួយ ប៊ុនរឿន ជាតំណាង បានជជែកយ៉ាងតឹងតែងថា ការពិនិត្យនៅថ្ងៃនេះបានឆ្លុះបញ្ចាំងពីគោលបំណងរបស់គណបក្សលោក។
ប៉ុន្តែ ក្រោយពីមានការអន្តរាគមន៍តាមទូរស័ព្ទរបស់ប្រធានក្រុមប្រឹក្សាធម្មនុញ្ញមកកាន់តំណាងក្រុមប្រឹក្សាធម្មនុញ្ញរួចមក តំណាងក្រុមប្រឹក្សាដែលមានសម្តេចនរោត្តម ចក្រពង្ស លោកស្រី ចែម វិជ្ជរ៉ា និងលោក ពិត តាំងសាន នោះ ក៏បានបញ្ជាឱ្យបន្តការពិនិត្យនេះជាបន្ត។
យ៉ាងណាក៏ដោយ ការមិនដោះស្រាយទៅតាមសំណើរបស់គណបក្សសង្គ្រោះជាតិនោះ ត្រូវបានលោក គួយ ប៊ុនរឿន បញ្ជាក់ថា បានប៉ះពាល់ទៅនឹងចំនួនអាសនៈរបស់ខ្លួន ព្រោះសន្លឹកឆ្នោតមិនបានការមានរហូតដល់ជាង៤ពាន់សន្លឹក។ បើតាមលោក គួយ ប៊ុនរឿនគណបក្សសង្គ្រោះជាតិត្រូវការតែជាង៣ពាន់សន្លឹកតែប៉ុណ្ណោះ ដើម្បីទទួលបានកៅអីទី៣ ក្នុងមណ្ឌលខេត្តសៀមរាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ