អ្នកការសែតមិនគួរសួរអ្នកបោះឆ្នោតថា បោះឆ្នោតអោយគណបក្សណាឡើយ
នៅក្នុងខណៈពេលដែលកាលបរិច្ឆេទនៃការបោះឆ្នោតកាន់តែខិតចូលជិតមកដល់ ការចរាចរណ៍ព័ត៌មានកាន់តែមានសារៈសំខាន់ឡើង។ ការទទួលព័ត៌មានគ្រប់ជ្រុងជ្រោយ មិនលម្អៀង គឺជារឿងចាំបាច់សម្រាប់អ្នកបោះឆ្នោត។ ចំពោះអ្នកកាសែតវិញ ពួកគេមិនត្រូវសួរអ្នកបោះឆ្នោតថា បោះឆ្នោតអោយគណបក្សណានោះឡើយ។
ចុះផ្សាយនៅថ្ងៃ៖
ស្តាប់ - ០២:៥៥
នៅពេលដែលកាលបរិច្ឆេទនៃការបោះឆ្នោតកាន់តែខិតជិតចូលមកដល់នោះ បណ្តាញព័ត៌មានដែលមានទិន្នាការជាមួយគណបក្សកាន់អំណាច និងគណបក្សប្រឆាំងកាន់តែបង្កើនការគាំទ្ររបស់ពួកគេខ្លាំងឡើងៗ។ ដើម្បីចៀសវាងការផ្តល់ព័ត៌មានមិនពិត ព័ត៌មានមិនគ្រប់គ្រាន់ ព័ត៌មានលម្អៀង ក្លឹបអ្នកការសែតកម្ពុជាគ្រោងនឹងបើកវគ្គបណ្តុះបណ្តាលស្តីពីរបៀបយកព័ត៌មាននៅពេលយុទ្ធនាឃោសនាបោះឆ្នោត និងនៅក្នុងថ្ងៃបោះឆ្នោត។ វគ្គបណ្តុះបណ្តាលអ្នកកាសែតនឹងចាប់ផ្តើមនៅថ្ងៃចន្ទសប្តាហ៍ក្រោយដោយមានការចូលរួមពីអ្នកសារព័ត៌មាននៃបណ្តាស្ថាប័នល្បីៗនៅក្នុងប្រទេសកម្ពុជា។
លោក ងួន សេរ័ត្ន មន្រ្តីជាន់ខ្ពស់នៃក្លឹបអ្នកកាសែតកម្ពុជាបានបញ្ជាក់ប្រាប់នៅថ្ងៃសៅរ៍នេះថា នៅក្នុងសង្គមប្រជាធិបតេយ្យ ការទទួលបានព័ត៌មានគ្រប់គ្រាន់ គ្រប់ជ្រុងជ្រោយ និងមិនលម្អៀងគឺជារឿងចាំបាច់បំផុត។ តាមរយៈព័ត៌មានគ្រប់ជ្រុងជ្រោយ អ្នកបោះឆ្នោតអាចជ្រើសរើសអ្នកដឹកនាំរបស់ខ្លួនបានត្រឹមត្រូវសម្រាប់ដឹកនាំប្រទេស។ មន្ត្រីជាន់ខ្ពស់នៃក្លឹបអ្នកកាសែតកម្ពុជាដដែលបានបន្តទៀតថា អ្នកសារព័ត៌មានមិនត្រូវចេះតែធ្វើសេចក្តីរាយការណ៍លើព្រឹត្តិការណ៍ប៉ុណ្ណោះទេ។ ប៉ុន្តែអ្នកយកព័ត៌មានគួរត្រូវចេះវិភាគលើព័ត៌មាន លើគោលនយោបាយបាយរបស់គណបក្ស និងត្រូវចេះតាមដានការសន្យារបស់គណបក្សនយោបាយផង។ ការសន្យាមួយចំនួនគឺជាការសន្យាខ្យល់។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោតបានសម្តែងការសាទរនៅថ្ងៃសៅរ៍នេះ ចំពោះវគ្គបណ្តុះបណ្តាលអ្នកកាសែតក្នុងការធ្វើសេចក្តីរាយការណ៍ជុំវិញព្រឹត្តិការណ៍បោះឆ្នោតតំណាងរាស្រ្តនៅខែកក្កដាខាងមុខនេះ។ លោក ទេព នីថា បានលើកឡើងថា អ្នកសារព័ត៌មាននាពេលកន្លងមកបានចូលរួមផ្សព្វផ្សាយដំណឹងពីដំណើរការបោះឆ្នោតនៅក្នុងប្រទេសកម្ពុជាច្រើន។ ប៉ុន្តែពេលខ្លះ សេចក្តីរាយការណ៍មួយចំនួននៅមានចំណុចខ្វះខាត និងនៅមានបញ្ហានៅឡើយ។ លោក ទេព នីថា បានសំណូមពរយ៉ាងទទូចទៅដល់អ្នកសារព័ត៌មានកុំអោយសាកសួរអ្នកបោះឆ្នោតថា បោះឆ្នោតអោយគណបក្សណាអោយសោះ។
មិនអោយសាកសួរអ្នកបោះឆ្នោតលើសំណួរនេះ ពីព្រោះ ការសម្ងាត់របស់អ្នកបោះឆ្នោតត្រូវបានធានាដោយច្បាប់បោះឆ្នោត។ សម្រាប់ការបោះឆ្នោតតំណាងរាស្ត្រមុនៗ វិទ្យុ ទូរទស្សន៍ ការសែតសរសេរមានឥទ្ធិពលយ៉ាងខ្លាំងទៅលើការសម្រេចចិត្តរបស់អ្នកបោះឆ្នោត។ ប៉ុន្តែសម្រាប់ការបោះឆ្នោតតំណាងរាស្រ្តអាណត្តិទី៥នេះ ព័ត៌មានតាមបណ្តាញប្រព័ន្ធអ៊ីនថឺនែតបាននិងកំពុងក្លាយទៅជាឧបករណ៍បំពងសំឡេងមួយយ៉ាងសំខាន់ដែរ។ បើយោងតាមសេចក្តីរាយការណ៍មួយចំនួន អ្នកតាមដានព័ត៌មានតាមបណ្តាញសង្គមនានានៅលើប្រព័ន្ធអ៊ីនថឺនែតអាចមានចំនួនជិត១លាននាក់។
ដោយសារតែព័ត៌មានតាមបណ្តាញសង្គមកាន់តែទូលំទួលាយខ្លាំងជាងមុននោះ គណៈកម្មាធិការជាតិរៀបចំការបោះឆ្នោតបានណែនាំអ្នកប្រើប្រាស់ព័ត៌មានទាំងនោះអោយប្រយ័ត្នប្រយែងបំផុតក្នុងការបញ្ចេញព័ត៌មានទាក់ទងទៅនឹងព្រឹត្តិការណ៍បោះឆ្នោតនាខែកក្កដាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ