នាយករដ្ឋមន្ត្រីអ៊ីស្រាអែលរងការរិះគន់ ក្រោយប្រើពាក្យថា “បោសសម្អាតជនជាតិភាគតិច”
កាលពីថ្ងៃសុក្រ ហ្វេសប៊ុករបស់នាយករដ្ឋមន្ត្រីអ៊ីស្រាអែល បិនយ៉ាមីន នេតាន់យ៉ាហ៊ូ បានចុះផ្សាយវីដែអូរបស់លោក ជាភាសាអង់គ្លេស ធ្វើអោយលោករងការរិះគន់យ៉ាងខ្លាំង។ មូលហេតុដោយសារលោកនេតាន់យ៉ាហ៊ូ ចាត់ទុកថា ការដែលមេដឹកនាំប៉ាឡេស្ទីនមិនព្រមអោយមានវត្តមានប្រជាជនជ្វីហ្វ នៅស៊ីសហ្ស៊កដានី គឺជាការបោសសម្អាតជនជាតិភាគតិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០៥
លោកនេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានបង្កភាពចម្រូងចម្រាសទៀតហើយ។ ក្នុងវីដេអូដែលចុះផ្សាយលើហ្វេសប៊ុករបស់លោក កាលពីថ្ងៃសុក្រ គេឃើញរូបលោកនិយាយឡើងថា៖ “មេដឹកនាំប៉ាឡេស្ទីនចង់បង្កើតរដ្ឋប៉ាឡេស្ទីន ដោយដាក់លក្ខខណ្ឌមុនថា គ្មានជនជាតិជ្វីហ្វទេ។ នេះគេហៅថា ការបោសសម្អាតជនជាតិភាគតិច”។
លោកបន្ថែមថា ៖”សំណើនេះជាបញ្ហាអាស្រូវ។ បញ្ហាដែលអាស្រូវធ្ងន់ជាងនេះទៀតគឺថា ពិភពលោកមិនបានគិតថា រឿងនេះជារឿងអាស្រូវទេ”។ លោកនេតាន់យ៉ាហ៊ូបានឆ្លៀតអួតពីអ៊ីស្រាអែលផងដែរ ដោយលើកឡើងថា នៅអ៊ីស្រាអែល មានជនជាតិអារ៉ាប់រស់នៅដល់ទៅ២លាននាក់។
ក្រុមនយោបាយឆ្វេងនិយមអ៊ីស្រាអែលបានចោទនាយករដ្ឋមន្ត្រីនេតាន់យ៉ាហ៊ូ ថាហ៊ានពោលពាក្យទាំងនេះឡើង ដោយសារតែលោកប្រតិកម្មចំពោះការស្ទង់មតិផ្សេងៗកន្លងមក ដែលបង្ហាញថា ប្រជាប្រិយភាពរបស់លោកបានធ្លាក់ចុះ។
អាមេរិកក៏បញ្ចេញប្រតិកម្មចំពោះពាក្យពេចន៍លោកនេតាន់យ៉ាហ៊ូដែរ។ អាមេរិកលើកឡើងថា វាជារឿងឥតប្រយោជន៍ និងមិនសមស្របសោះ។ ប្រភពការទូតអាមេរិកបានផ្តល់ព័ត៌មានថា សេតវិមានមិនទទួលជួបលោកនេតាន់យ៉ាហ៊ូ ក្នុងពេលលោកបំពេញទស្សនកិច្ចនៅអាមេរិក នាពេលខាងមុខទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ