គណៈកម្មការជាតិ បញ្ចប់កិច្ចប្រជុំពិនិត្យ ដើម្បីបន្ធូរបន្ថយ និងលើកលែងទោសទណ្ឌិត ក្នុងឱកាសបុណ្យចូលឆ្នាំ
គណៈកម្មការជាតិ ដឹកនាំដោយលោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ បានបញ្ចប់កិច្ចប្រជុំ ដើម្បីឈានទៅបន្ធូរបន្ថយ និងលើកលែងទោសទណ្ឌិត ក្នុងឱកាសបុណ្យចូលឆ្នាំថ្មី ប្រពៃណីជាតិ។ ប៉ុន្តែចំនួនអ្នកទោស ដែលត្រូវលើកលែង និងបន្ធូរបន្ថយទោស មិនទាន់កំណត់នៅឡើយទេ។ លោក គឹម សន្តិភាព អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានបញ្ជាក់ថា ក្រសួងយុត្តិធម៌ និងក្រសួងមហាផ្ទៃ ត្រូវពិនិត្យឡើងវិញ លើទណ្ឌិតមួយចំនួន ដែលខ្វះឯកសារ។ ទន្ទឹមនោះ ក្រុមការងារជំនាញមួយ ត្រូវបានបង្កើតឡើង ដើម្បីចុះពិនិត្យជាក់ស្តែងលើស្ថានភាពស្ត្រីមានគភ៌ និងស្ត្រីមានកូនតូច នៅតាមមណ្ឌលអប់រំកែប្រែ និងពន្ធនាគារ ទូទាំងប្រទេសផងដែរ។
ចុះផ្សាយនៅថ្ងៃ៖
ស្តាប់ - ០២:២១
គណៈកម្មការជាតិ ដឹកនាំដោយលោក អង្គវង្ស វឌ្ឍនា រដ្ឋមន្ត្រីក្រសួងយុត្តិធម៌ បានបើកកិច្ចប្រជុំ កាលពីរសៀលថ្ងៃទី១៦មីនា រហូតដល់ព្រឹកថ្ងៃទី១៧មីនា ដើម្បីពិនិត្យលើបញ្ជីទណ្ឌិត ដែលត្រូវស្នើសុំបន្ធូរបន្ថយ និងលើកលែងទោស នៅតាមពន្ធនាគារ និងមណ្ឌលអប់រំកែប្រែ នៅទូទាំងប្រទេស ក្នុងឱកាសបុណ្យចូលឆ្នាំថ្មី ប្រពៃណីជាតិ។
ប៉ុន្តែបន្ទាប់ពីបញ្ចប់កិច្ចប្រជុំ នៅព្រឹកថ្ងៃអង្គារ៍នេះ លោក គឹម សន្តិភាព អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ បានបញ្ជាក់ថា ចំនួនទណ្ឌិត ដែលត្រូវទទួលបានការបន្ធូរបន្ថយទោស និងការលើកលែងទោស សម្រាប់បុណ្យចូលឆ្នាំ នាពាក់កណ្តាលខែមេសាខាងមុខ មិនទាន់កំណត់នៅឡើយទេ។ មូលហេតុ មកពីទណ្ឌិតមួយចំនួន ខ្វះឯកសារ ដែលមន្ត្រីជំនាញក្រសួងយុត្តិធម៌ និងក្រសួងមហាផ្ទៃ ត្រូវពិនិត្យឡើងវិញ ហើយអាចចំណាយពេលយ៉ាងហោចណាស់ ១ សប្តាហ៍។
យ៉ាងណាក៏ដោយ លោក គឹម សន្តិភាព បន្ថែមថា ទណ្ឌិតដែលអាចទទួលបានការស្នើសុំបន្ធូរបន្ថយទោស ទាល់តែទណ្ឌិតនោះ ទទួលរងទោសបាន ១ ភាគ ៣ នៃទោសដែលកំណត់ក្នុងសេចក្តីសម្រេចស្ថាពររបស់តុលាការ។ ដោយឡែក ទណ្ឌិត ដែលអាចទទួលបានការលើកលែងទោស ទាល់តែទណ្ឌិតនោះ ជាប់ពន្ធនាគារបាន ២ ភាគ ៣ នៃទោសសរុប។
ក្នុងមួយឆ្នាំ នៅកម្ពុជា មានការបន្ធូរបន្ថយទោស និងលើកលែងទោសដល់ទណ្ឌិត ៣ដង គឺនៅពេលបុណ្យចូលឆ្នាំ បុណ្យពិសាខបូជា និងបុណ្យអុំទូក។
កាលពីថ្ងៃទី១៦មីនា រដ្ឋមន្ត្រីក្រសួងយុត្តិធម៌ បានចេញសេចក្តីសម្រេច បង្កើតក្រុមជំនាញចុះពិនិត្យជាក់ស្តែងលើស្ថានភាពស្ត្រីមានគភ៌ និងស្ត្រីមានកូនតូច នៅតាមមណ្ឌលអប់រំកែប្រែ និងពន្ធនាគារ រាជធានី-ខេត្ត។ ក្រុមជំនាញ ដែលមានសមាសភាព ១៣ រូប ដឹកនាំដោយលោក គឹម សន្តិភាព អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ នឹងចាប់ផ្តើមការងារ នៅថ្ងៃពុធស្អែក ដោយជួបប្រជុំ ហើយបែងចែកក្រុមការងារជាពីរ ដើម្បីធ្វើកិច្ចការនេះ។ ការដោះលែងស្ត្រីមានគភ៌ និងស្ត្រីមានកូនតូច ដែលជាករណីពិសេស ត្រូវបានលោក គឹម សន្តិភាព បញ្ជាក់ថា នឹងធ្វើមុនពិធីបុណ្យចូលឆ្នាំ។
កាលពីថ្ងៃទី៨មីនា ស្ត្រីមានគភ៌ម្នាក់ និងស្ត្រីមានកូនតូច ២១ នាក់ ដែលបានជាប់ឃុំនៅពន្ធនាគារ និងមណ្ឌលអប់រំកែប្រែ ត្រូវបានដោះលែង។ ការលើកលែងទោសដល់ស្ត្រីមានគភ៌ និងស្ត្រីមានកូនតូច ដែលកំពុងជាប់ឃុំ បានធ្វើឡើងតាមការណែនាំរបស់លោកនាយករដ្ឋមន្ត្រី ហ៊ុនសែន បន្ទាប់ពីអង្គការលីកាដូ បានចេញរបាយការណ៍ បង្ហាញពីការលំបាករបស់ស្ត្រី និងកុមារតូច ក្នុងពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ