មន្រ្តីជាន់ខ្ពស់ម្នាក់ទៀតរត់ចោលលោកប្រធានាធិបតីស៊ីរី
ឯកអគ្គរដ្ឋទូតស៊ីរីប្រចាំទីក្រុងបាកដាដបានប្រកាស នៅថ្ងៃ ពុធ ម្សិលមិញ ថាលោកបានសម្រេចដើរចេញពីរដ្ឋាភិបាលរបស់លោកBachar Al Assad។ នៅតាមទូរទស្សន៍អារ៉ាប់ Al Jazeera លោកNawaf Fares អំពាវនាវផងដែរឲ្យមន្រ្តីរដ្ឋាភិបាល និងទាហានស៊ីរីផ្សេងទៀតបោះបង់ចោលរដ្ឋាភិបាលដែលកំពុងប្រព្រឹត្តអំពើហិង្សាសម្លាប់ប្រជាជនស៊ីវិល។ នៅក្រុមប្រឹក្សាសន្តិសុខអង្គការសហប្រជាជាតិ ប្រទេសលោកខាងលិចបានដាក់សេចក្តីព្រាងពីសេចក្តីសម្រេចស្តីពីស៊ីរីទៅអង្គប្រជុំ ដែលក្នុងនោះមាននិយាយពីការដាក់ទណ្ឌកម្មសេដ្ឋកិច្ច និងការហាមទិញលក់ទៅឲ្យប្រទេសស៊ីរីជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
នៅក្នុងសេចក្តីព្រាងប្រទេសលោកខាងលិច រួមមានអឺរ៉ុប និងអាមេរិកចង់ឲ្យក្រុមប្រឹក្សាសន្តិសុខចេញសេចក្តីសម្រេចមួយ ដែលទុកពេល១០ថ្ងៃ ឲ្យលោកBachar Al Assad បញ្ឈប់អំពើហិង្សា និងដកកងទ័ព អាវុធធុនធ្ងន់ចេញពីទីក្រុង ឬតំបន់ដែលសម្បូររស់នៅដោយក្រុមបះបោរ។ ប្រសិនបើរដ្ឋាភិបាលស៊ីរីខកខានមិនគោរពឧសានវាទ នោះក្រុមប្រឹក្សាសន្តិសុខនឹងប្រកាសដាក់ទណ្ឌកម្ម ការទូត និងសេដ្ឋកិច្ចទៅលើស៊ីរី ដែលក្នុងនោះក៏មានការហាមឃាត់លក់ដូរអាវុធទៅឲ្យស៊ីរីដែរ។
យ៉ាងណាក៏ដោយ សំណើព្រាងរបស់ប្រទេសលោកខាងលិច ទៅលើក្រុមប្រឹក្សាសន្តិសុខមិនបាននិយាយពីអន្តរាគមន៍ទ័ពបរទេសទៅក្នុងប្រទេសស៊ីរីទេ។
ប្រទេសលោកខាងលិចបានព្រមព្រៀងគ្នាផងដែរឲ្យបេសកកម្មរបស់ក្រុមមួកខៀវ ចំនួន ៣០០នាក់ ដែលត្រូវបញ្ចប់នៅថ្ងៃសុក្រសប្តាហ៍ក្រោយនោះ ឲ្យមានបន្តរយៈពេល៤៥ថ្ងៃទៀត។ រុស្ស៊ីវិញ ដែលបានគ្រោងសេចក្តីសម្រេចចិត្តមួយដែរនោះ បានលើកឡើងពីការបន្តជាចាំបាច់បេសកកម្មរបស់ក្រុមអ្នកសង្កេតការណ៍អង្គការសហប្រជាជាតិ ប៉ុន្តែ រុស្ស៊ីមិនបានលើកនិយាយពីការដាក់ទណ្ឌកម្មណាមួយទៅលើរបបស៊ីរីនោះទេ។ សម្រាប់រុស្ស៊ី ការដាក់ទណ្ឌកម្មសេដ្ឋកិច្ច នឹងមិនជួយដោះស្រាយវិបត្តិនៅស៊ីរីទេ។ ជាក់ស្តែង រុស្ស៊ី និងចិនបានវេតូប្រឆាំងពីរដងមកហើយ មិនឲ្យក្រុមប្រឹក្សាសន្តិសុខ អាចចេញសេចក្តីសម្រេចដាក់ទណ្ឌកម្មទៅលើស៊ីរី។
នៅក្នុងពេលសហគមន៍អន្តរជាតិនៅបន្តខ្វែងគំនិតគ្នា រដ្ឋាភិបាលស៊ីរីឯណោះវិញកំពុងជួបវិបត្តិផ្ទៃក្នុង។ នៅថ្ងៃពុធម្សិលមិញ ឯកអគ្គរដ្ឋទូតស៊ីរី លោក Nawaf Faresបានប្រកាសលាឈប់ពីសមាជិក រដ្ឋាភិបាល និងសមាជិកគណបក្សកាន់អំណាច។ លោកNawaf Fares ជាប្រធានក្រុមកុលសម្ព័ន្ធនិកាយSunnite មួយដែលមានទីតាំងនៅជាប់ព្រំដែនស៊ីរីជាមួយតួកគី។ លោកត្រូវបានរដ្ឋាភិបាលលោកBachar Al Assad តែងតាំងជាឯកអគ្គរដ្ឋទូតស៊ីរីប្រចាំ នៅអ៊ីរ៉ាក់ កាលពីឆ្នាំ ២០០៨។
គិតចាប់តាំងពីមានការបះបោរនៅស៊ីរីជាង មួយឆ្នាំកន្លះ លោក Nawaf Fares គឺជាមន្រ្តីទូតជាន់ខ្ពស់ទីមួយរបស់ស៊ីរី ដែលបានប្រកាសដើរចោលរដ្ឋាភិបាល និងទៅចុះចូលជាមួយក្រុមប្រឆាំង។ កាលពីសប្តាហ៍មុន ឧត្តមសេនីយជាន់ខ្ពស់ម្នាក់ដែលស្និទ្ធនឹងលោកBachar Al Assad ក៏បានរត់ចោលរដ្ឋាភិបាលដែរ ដោយបានរត់ទៅជ្រកកោន នៅក្នុងប្រទេសតួកគី។
នៅលើកញ្ចក់ទូរទស្សន៍អារ៉ាប់ Al Jazeera អ្នកតំណាងស៊ីរី នៅអ៊ីរ៉ាក់បានអំពាវនាវដល់អ្នកដែលស្នេហាសេរីភាព ជាពិសេសទាហានឲ្យរត់ចោលលោកAssad និងមកចូលរួមជាមួយទាហានបដិវត្តន៍ស៊ីរីវិញ។ “ពួកទាហានគួរតែបែរចុងកាណុងកាំភ្លើង និងរថក្រោះសំដៅរដ្ឋាភិបាលដែលជាឧក្រិដ្ឋជនសម្លាប់ប្រជាជនស៊ីវិល ទៅវិញទៅ”។ នេះជាការអំពាវនាវរបស់លោកឯកអគ្គរដ្ឋទូតស៊ីរីនៅបាកដាដ៕ ក្រសួងការបរទេសស៊ីរីវិញ នៅថ្ងៃព្រហស្បតិ៍នេះបានប្រកាសដកលោក Nawaf Fares ចេញពីតំណែងឯកអគ្គរដ្ឋទូត និងមានបំណងប្តឹងប្រឆាំងឯកអគ្គរដ្ឋទូតរូបនេះទៅតុលាការ ពីបទដែលគាត់មិនបានគោរពភារកិច្ចរបស់គាត់ជាអ្នកតំណាងស៊ីរីនៅអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ