សេរីភាពសារព័ត៌មានអាចរីកចំរើនខ្លាំងក្នុងអាណត្តិនេះ
ចុះផ្សាយនៅថ្ងៃ៖
ស្តាប់ - ០៤:២៩
នៅក្រោយការបោះឆ្នោតនីតិកាលទី៥នេះ មានសញ្ញាជាច្រើនដែលកំពុងបង្ហាញអំពីអនាគតនៃការរីកចំរើនផ្នែកលំហូរព័ត៌មាន និងសេរីភាពសារព័ត៌មាននៅកម្ពុជា។ សញ្ញាទាំងនេះត្រូវបានបង្ហាញឡើងតាមរយៈកំណែទម្រង់ក្នុងវិស័យសារព័ត៌មានតែម្តង។ លោកនាយករដ្ឋមន្ត្រីបញ្ជាអោយតាក់តែងសេចក្តីព្រាងច្បាប់ស្តីពីសិទ្ធិទទួលបានព័ត៌មាន។ អង្គភាពសារព័ត៌មានធំៗមួយចំនួនក៏កំពុងរៀបចំស្ថាប័នរបស់ខ្លួនឡើងវិញ ដើម្បីពង្រឹងការប្រកួតប្រជែងផ្នែកសារព័ត៌មាន។ មន្ត្រីរដ្ឋាភិបាលកាន់តែច្រើនក៏ចាប់ផ្តើមប្រឡូកក្នុងបណ្តាញសង្គម។ ទោះយ៉ាងណាក៏ដោយ កម្ពុជាត្រូវការពេលវេលាដើម្បីពិនិត្យមើលការវិវត្តន៍ក្នុងវិស័យដ៏រសើបមួយនេះ។
ការបោះឆ្នោតនីតិកាលទី៥ បានក្លាយទៅជាកំលាំងចលករដ៏មានថាមពលមួយ រុញបង្ខំអោយមានកំណែទម្រង់ជាចាំបាច់ ជាបន្ទាន់ និងអោយមានប្រសិទ្ធភាពទៀតផង។ ជាក់ស្តែង រដ្ឋាភិបាលអាណត្តិថ្មីនៃគណបក្សចាស់ របស់លោកនាយករដ្ឋមន្ត្រីហ៊ុន សែន បានបង្ហាញភ្លាមៗដែរ ទិដ្ឋភាពនៃកំណែទម្រង់។
មានការផ្លាស់ប្តូរសមាសភាពរដ្ឋមន្ត្រី ការបែងចែកការទទួលខុសត្រូវរបស់ក្រសួងអោយបានច្បាស់លាស់ថែមទៀត ក្នុងទិសដៅបង្កើនប្រសិទ្ធភាពសេវាសាធារណៈ បង្រួមវិសមភាពសង្គម និងការប្រកាសប្តេជ្ញាជារួម របស់ប្រមុខរដ្ឋាភិបាលអំពីការកែទម្រង់ស៊ីជម្រៅជាដើម។ ប៉ុន្តែ ក្នុងចំណោមវិស័យជាច្រើនដែលកំពុងក្លាយជាការដ្ឋាននៃកំណែទម្រង់នោះ វិស័យសារព័ត៌មានទំនងជាអាចដើរលឿនជាងគេ។
មានសញ្ញាជាវិជ្ជមានមួយចំនួនដែលអាចពន្យល់អំពីអំពីលទ្ធភាពនៃការរីកចម្រើននៃវិស័យសារព័ត៌មាន ឬអំណាចនៃសារព័ត៌មានចាប់ពីអាណត្តិទី៥នេះទៅ។
ជាបឋម គឺសំណើរបស់លោកនាយករដ្ឋមន្ត្រីហ៊ុន សែន ដែលអោយក្រសួងពាក់ព័ន្ធតាក់តែងសេចក្តីព្រាងច្បាប់ស្តីពីសិទ្ធិទទួលបានព័ត៌មាន។ វាគឺជាអត្ថបទច្បាប់ដែលកម្ពុជា ទន្ទឹងរង់ចាំជាយូរមកហើយ។ នៅពេលនេះ ក្រសួងព័ត៌មាន និងអង្គការក្រៅរដ្ឋាភិបាល អង្គការវិជ្ជាជីវៈសារព័ត៌មានកំពុងតែប្រមូលមតិ ធ្វើការរួមគ្នាដើម្បីជំរុញការតាក់តែងសេចក្តីព្រាងច្បាប់មួយនេះអោយលេចចេញជារូបរាង និងមានប្រសិទ្ធភាពខ្ពស់។
ទន្ទឹមគ្នានេះដែរ ប្រព័ន្ធផ្សព្វផ្សាយរបស់រដ្ឋក៏បន្តកំណែទម្រង់បន្ថែមទៀតដែរ។ រដ្ឋមន្ត្រីក្រសួងព័ត៌មានបានបញ្ជា មិនអោយប្រព័ន្ធផ្សព្វផ្សាយរបស់រដ្ឋចាក់ផ្សាយព័ត៌មានពិធីការជ្រុលហួសហេតុ ដូចជាការជូនដំណើរ និងការទទួលស្វាគមន៍ថ្នាក់ដឹកនាំក្រសួងដែលគ្រាន់តែចេញ និងត្រឡប់មកពីបំពេញបេសកម្មនៅក្រៅប្រទេសជាដើម។ នៅក្នុងក្រខណ្ឌនៃប្រព័ន្ធផ្សព្វផ្សាយរបស់រដ្ឋដដែល ដែលគេតែងនិយាយថា នៅមានកង្វះខាតផ្នែកធនធាននោះ រដ្ឋមន្ត្រីក្រសួងព័ត៌មានក៏បានបញ្ជាបុគ្គលិកនៃអង្គភាពព័ត៌មានរបស់រដ្ឋ បង្កើនម៉ោងផ្សាយព័ត៌មានទាន់ហេតុការណ៍ដែរ។
មិនមែនគ្រាន់តែកំណែទម្រង់របស់អង្គភាពសារព័ត៌មានរបស់រដ្ឋតែមួយ វាបង្ហាញការរីកចម្រើនផ្នែកសារព័ត៌មាននៅកម្ពុជានោះឡើយ។
ការពង្រឹងគុណភាពការងារនៅក្នុងក្រុមហ៊ុនសារព័ត៌មានទាំងអស់ក៏មានដែរ។ ពោលគឺមិនថា អង្គភាព ឬក្រុមហ៊ុនសារព័ត៌មានដែលមានសមានចិត្តគាំទ្រនិន្នាការគណបក្សនយោបាយណានោះទេ ពួកគេក៏បានធ្វើកំណែទម្រង់ផ្ទៃក្នុង បង្កើនគុណភាពព័ត៌មាន ក្នុងគោលដៅប្រកួតប្រជែងខ្ពស់ដែរ នៅពេលនេះ។
ត្រឡប់ទៅនិយាយពីស្ថាប័នរដ្ឋវិញ នៅក្នុងកិច្ចប្រជុំគណរដ្ឋមន្ត្រីកន្លងមក លោកនាយករដ្ឋមន្ត្រីហ៊ុន សែនក៏ទើបបានបញ្ជាអោយក្រសួង ស្ថាប័នចំណុះរដ្ឋទាំងអស់បង្កើត ឬតែងតាំងអ្នកនាំពាក្យ។ បញ្ជានេះនឹងដើរស្របគ្នាជាមួយគំនិតផ្តួចផ្តើមនៃការតាក់តែងសេចក្តីព្រាងច្បាប់ស្តីពីសិទ្ធិទទួលបានព័ត៌មាន។
តាមពិតទៅ សកម្មភាពដែលកំពុងកើតមាននៅពេលនេះ វាគឺជាការបោះជំហានដ៏ត្រឹមត្រូវមួយ ខណៈដែលសង្គមកម្ពុជាបានដើរដល់យុគសម័យប្រព័ន្ធព័ត៌មានវិទ្យាទំនើបហើយនោះ។ ការរីកចំរើន និងការវិវឌ្ឍន៍នៃបណ្តាញព័ត៌មានសង្គម តាមរយៈបច្ចេកវិទ្យា វាបានបង្ខំអោយភាគីទាំងអស់ មិនថារដ្ឋាភិបាល និងប្រជាពលរដ្ឋ ត្រូវសម្របខ្លួនទៅតាមការវិវឌ្ឍន៍មួយនេះ និងបង្កើតវិធានការដោះស្រាយបញ្ហាទៅតាមការរីកចម្រើននៃបច្ចេកវិទ្យាព័ត៌មាននេះទៅវិញ។
គ្មានជំរើសណាផ្សេង ល្អជាងនេះឡើយ។ ការបិទព័ត៌មាន និងលាក់លៀមព័ត៌មាន មានតែធ្វើអោយខាតបង់ទៅវិញទេ។ បញ្ជារបស់លោកនាយករដ្ឋមន្ត្រី អោយតាក់តែងសេចក្តីព្រាងច្បាប់ ស្តីពីសិទ្ធិទទួលបានព័ត៌មាន និងការបង្កើតអ្នកនាំពាក្យនៅតាមស្ថាប័នរដ្ឋនោះ វាគឺជាសារដ៏មានសារៈសំខាន់ចំពោះមន្ត្រី ក្រោមឱវាទ ដែលត្រូវមើលអោយឃើញការចង់បានរបស់ប្រមុខរដ្ឋាភិបាល។
ប្រសិនបើគេក្រឡេកទៅមើល ការបោះឆ្នោតកន្លងទៅថ្មីៗនេះវិញ វិស័យសារព័ត៌មាន មិនមែនជាប្រធានបទ ឬជារបៀបវារៈនៃការឃោសនាឡើយ។ ប៉ុន្តែសារព័ត៌មានត្រូវបានប្រើប្រាស់ជាមធ្យោបាយបម្រើអោយការឃោសនារបស់គណបក្សនយោបាយទៅវិញ។ ហើយតិច ឬច្រើន ឥទ្ធិពលនៃសារព័ត៌មានត្រូវបានគេជឿថា បានធ្វើអោយមានការប្រែប្រួលលទ្ធផលនៃការបោះឆ្នោតទៀតផង។
ដូច្នេះ និយាយសរុបមកវិញ ការប្រែប្រួលជាវិជ្ជមានមួយក្នុងវិស័យសារព័ត៌មាន ត្រូវបានគេរំពឹងថា នឹងកើតមាននៅក្នុងអាណត្តិទី៥នេះ។ ប៉ុន្តែថា ការរីកចម្រើន ឬការធ្វើអោយប្រសើរឡើងនៃវិស័យសារព័ត៌មាននេះ វាក៏ត្រូវចំណុះដល់ការលើកតម្កើងសិទ្ធិសេរីភាពបញ្ចេញមតិ និងការការពារអ្នកសារព័ត៌មានផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ