អស់ពីគំរាមអាមេរិកកូរ៉េខាងជើងងាកទៅវាយប្រហារចិនដែលជាសម្ព័ន្ធមិត្ត
អស់រយៈពេលជាច្រើនសប្តាហ៍មកហើយ ដែលកូរ៉េខាងជើងតែងតែបានដំឡើងសំឡេងគំរាមសហរដ្ឋអាមេរិកស្ទើរតែជាប់ជាប្រចាំថ្ងៃ ហើយដែលស្ទើរតែជាទម្លាប់ធ្វើឲ្យគេស៊ាំត្រចៀកទៅហើយ។ ក៏ប៉ុន្តែ អ្វីដែលជារឿងចម្លែកមិនធ្លាប់មាន គឺនៅថ្ងៃព្រហស្បតិ៍នេះ កូរ៉េខាងជើងស្រាប់តែបានងាកមកវាយប្រហារចិន ដែលជាសម្ព័ន្ធមិត្តដ៏កម្រ និងដ៏សំខាន់របស់ខ្លួនទៅវិញ។
ចុះផ្សាយនៅថ្ងៃ៖
កូរ៉េខាងជើង តាមរយៈប្រព័ន្ធផ្សព្វផ្សាយរដ្ឋ បានធ្វើការព្រមានចិនត្រង់ៗថា “អាចនឹងប្រឈមមុខនឹងផលវិបាកដ៏ធ្ងន់ធ្ងរ ប្រសិនបើចិនធ្វើឲ្យកូរ៉េខាងជើងអស់ភាពអត់ធ្មត់ទ្រាំលែងបាន”។
ការព្រមាននេះបានធ្វើឡើង ក្រោយពីចិនតែងតែបានបង្ហាញនូវជំហរមិនឯកភាពចំពោះសកម្មភាពរបស់លោកគីម ជុងអ៊ុន នៅក្នុងការបន្តអភិវឌ្ឍកម្មវិធីផលិតមីស៊ីលបាលីស្ទិក និងអាវុធនុយក្លេអ៊ែរ ដែលផ្ទុយពីការហាមឃាត់របស់ក្រុមប្រឹក្សាសន្តិសុខអ.ស.ប។ ចិនតែងតែបានអំពាវនាវដល់គ្រប់ភាគីទាំងអស់ ដែលមានន័យថា ទាំងអាមេរិក និងទាំងកូរ៉េខាងជើង ឲ្យចៀសវាងនូវរាល់សកម្មភាព ឬពាក្យសម្តី ដែលធ្វើឲ្យវិបត្តិនៅឧបទ្វីបកូរ៉េកាន់តែមានសភាពតានតឹងខ្លាំងឡើងថែមទៀត។ កាលពីខែកុម្ភៈកន្លងទៅ ចិនថែមទាំងបានប្រកាសផ្អាកការនាំចូលធ្យូងថ្មពីកូរ៉េខាងជើងថែមទៀត។
នៅក្នុងបទវិចារណកថាចេញផ្សាយនៅថ្ងៃព្រហស្បតិ៍នេះ ទីភ្នាក់ងារព័ត៌មានកូរ៉េខាងជើងបានលើកឡើងថា កូរ៉េខាងជើងនឹងមិនអង្វរសុំរក្សាមិត្តភាពជាមួយចិន ដោយសុខចិត្តលះបង់កម្មវិធីនុយក្លេអ៊ែររបស់ខ្លួននោះឡើយ ពីព្រោះថា អាវុធនុយក្លេអ៊ែរ គឺជាអាយុជីវិតរបស់កូរ៉េខាងជើង។
ក្នុងពេលជាមួយគ្នា កូរ៉េខាងជើងក៏បានរំឭកដល់ចិនផងដែរថា ចាប់តាំងពីសម័យសង្រ្គាមកូរ៉េ កាលពីដើមទសវត្សរ៍ឆ្នាំ៥០មក កូរ៉េខាងជើងបានដើរតួនាទីយ៉ាងសំខាន់ ជាប្រទេសទ្រនាប់ការពារចិនពីអាមេរិក។ ដូច្នេះ ចិនគួរតែអរគុណកូរ៉េខាងជើងទៅវិញ ដែលបានជួយក្នុងការរក្សាសន្តិភាពនិងសន្តិសុខជាតិចិន។
ឆ្លើយតបមកវិញ កាសែត The Global Times ដែលជាកាសែតផ្លូវការរបស់បក្សកុម្មុយនិស្តចិនបានបរិហាររិះគន់របបដឹកនាំក្រុងព្យុងយ៉ាងថា កំពុងតែងប់នឹងកម្មវិធីនុយក្លេអ៊ែរនិងគំនិតជាតិនិយមជ្រុលរបស់ខ្លួន រហូតលែងដឹងខុសត្រូវ ហើយថា រដ្ឋាភិបាលចិនគួរតែបញ្ជាក់ប្រាប់ទៅមេដឹកនាំកូរ៉េខាងជើងឲ្យបានច្បាស់ៗថា ចិននឹងចាត់វិធានការធ្ងន់ធ្ងរបំផុតមិនធ្លាប់មាន ចំពោះកូរ៉េខាងជើង ប្រសិនបើកូរ៉េខាងជើងធ្វើការសាកល្បងអាវុធនុយក្លេអ៊ែរសាជាថ្មីម្តងទៀត។
ការចុះផ្សាយបទវិចារណកថាលើកាសែតផ្លូវការ វាយប្រហារគ្នាទៅវិញទៅមកបែបនេះ គឺជាសញ្ញាបញ្ជាក់ឲ្យឃើញកាន់តែច្បាស់ ពីភាពតានតឹងដ៏ខ្លាំងកម្រមាន រវាងប្រទេសជាសម្ព័ន្ធមិត្តទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ