កូរ៉េខាងជើងទាមទារឲ្យបញ្ជូនខ្លួនជនសង្ស័យលបធ្វើឃាតលោកគីមជុងអ៊ុន
នៅថ្ងៃព្រហស្បតិ៍នេះ កូរ៉េខាងជើងបានធ្វើការទាមទារឲ្យមានការចាប់បញ្ជូនខ្លួនជនសង្ស័យ ក្នុងការលបធ្វើឃាតលោកគីម ជុងអ៊ុន ដើម្បីយកមកកាត់ទោស។ នេះគឺជាការបញ្ជាក់សាជាថ្មី នូវការចោទប្រកាន់ ដែលកូរ៉េខាងជើងបានធ្វើ កាលពីសប្តាហ៍មុន ដែលថា ភ្នាក់ងារចារកិច្ចអាមេរិក និងកូរ៉េខាងត្បូង មានគម្រោងការណ៍លបធ្វើឃាតលោកគីម ជុងអ៊ុន។
ចុះផ្សាយនៅថ្ងៃ៖
“ការិយាល័យរដ្ឋអាជ្ញាកូរ៉េខាងជើងនឹងធ្វើការស្នើសុំជាផ្លូវការ ឲ្យមានការចាប់ខ្លួនឧក្រិដ្ឋជន ដើម្បីបញ្ជូនឲ្យមកទទួលការកាត់ទោសតាមច្បាប់របស់កូរ៉េខាងជើង”។ នេះគឺជាការអះអាងរបស់អនុរដ្ឋមន្រ្តីការបរទេសកូរ៉េខាងជើង នៅចំពោះមុខមន្រ្តីការទូតបរទេស និងអ្នកសារព័ត៌មាន នៅក្នុងទីក្រុងព្យុងយ៉ាង ហើយដែលត្រូវបានដកស្រង់សម្តីដោយទីភ្នាក់ងារព័ត៌មានចិនស៊ីនហួ នៅថ្ងៃព្រហស្បតិ៍។
ក៏ប៉ុន្តែ កូរ៉េខាងជើងមិនបានបញ្ជាក់ឲ្យបានច្បាស់លាស់ទេថា តើជនសង្ស័យដែលកូរ៉េខាងជើងទាមទារឲ្យចាប់បញ្ជូនខ្លួននេះជានរណាខ្លះ មានគ្នាប៉ុន្មាននាក់ ហើយកំពុងស្ថិតនៅឯណា? ដោយគ្រាន់តែបានលើកឡើងថា កូរ៉េខាងជើងនឹងតាមប្រមាញ់ជនសង្ស័យអស់ទាំងនោះមិនថាពួកគេលាក់ខ្លួននៅកន្លែងណានោះទេ។
គួររំឭកឡើងវិញថា ការចោទប្រកាន់ពីគម្រោងការណ៍លបធ្វើឃាតលោកគីម ជុងអ៊ុន ត្រូវបានកូរ៉េខាងជើងធ្វើឡើង កាលពីសប្តាហ៍មុន។ តាមរយៈសេចក្តីប្រកាសចុះផ្សាយដោយទីភ្នាក់ងារព័ត៌មានរដ្ឋ ក្រសួងសន្តិសុខជាតិកូរ៉េខាងជើងបានអះអាងថា ការធ្វើឃាតលោកគីម ជុងអ៊ុននេះ គ្រោងធ្វើឡើងដោយប្រើសារធាតុគីមី ហើយថា ទីភ្នាក់ងារចារកិច្ចអាមេរិក និងកូរ៉េខាងត្បូង គឺជាអ្នកនៅពីក្រោយ។
ឆ្លើយតបនឹងការចោទប្រកាន់នេះ ទីភ្នាក់ងារចារកិច្ចកូរ៉េខាងត្បូងបានលើកឡើងថា អ្វីដែលកូរ៉េខាងជើងបានលើកឡើង គឺជាការចោទប្រកាន់ « ដោយគ្មានមូលដ្ឋាន”។ ចំណែកពីខាងសហរដ្ឋអាមេរិកវិញ ទាំងទីភ្នាក់ងារចារកិច្ចសេអ៊ីអា និងទាំងសេតវិមាន សុទ្ធតែបានបដិសេធមិនធ្វើអត្ថាធិប្បាយអ្វីទាំងអស់ ចំពោះការចោទប្រកាន់នេះ។
ក៏ប៉ុន្តែ កាលពីថ្ងៃពុធកន្លងទៅនេះ ទីភ្នាក់ងារសេអ៊ីអាទើបនឹងបានប្រកាសឲ្យដឹងជាសាធារណៈថា ខ្លួនបានបង្កើតក្រុមពិសេសមួយ ដែលមានសមាសភាពចម្រុះមកពីគ្រប់ជំនាញ ហើយមានបេសកកម្មតាមដាន វាយតម្លៃ និងរកវិធីទប់ទល់ទៅនឹងការគំរាមកំហែង ពីកម្មវិធីនុយក្លេអ៊ែរ និងមីស៊ីលបាលីស្ទិករបស់កូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ