ប៉ូលិសម៉ាឡេស៊ីទាមទារសួរចម្លើយមន្រ្តីទូតកូរ៉េខាងជើងជុំវិញការស្លាប់របស់លោកគីមជុងណាម
ចុះផ្សាយនៅថ្ងៃ៖
ប៉ូលិសម៉ាឡេស៊ីបានឲ្យដឹងនៅថ្ងៃពុធនេះថា ប៉ូលិសចង់សួរចម្លើយមន្រ្តីទូតកូរ៉េខាងជើងម្នាក់ ព្រមទាំងពលរដ្ឋកូរ៉េខាងជើងពីរនាក់ផ្សេងទៀត ពាក់ព័ន្ធនឹងការស្លាប់របស់លោកគីម ជុងណាម បងប្រុសម្តាយទីទៃរបស់លោកគីម ជុងអ៊ុន។ ប៉ូលិសក៏បានឲ្យដឹងផងដែរពីការប៉ុនប៉ងលួចចូលទៅក្នុងកន្លែងរក្សាសាកសពរបស់លោកគីម ជុងណាម។
ពលរដ្ឋកូរ៉េខាងជើងដែលប៉ូលិសម៉ាឡេស៊ីកំពុងទាមទារឲ្យចូលខ្លួនមកឆ្លើយបំភ្លឺ មានម្នាក់ជាបុគ្គលិកបម្រើការឲ្យក្រុមហ៊ុនអាកាសចរណ៍រដ្ឋរបស់កូរ៉េខាងជើង និងម្នាក់ទៀតមានមុខងារជាលេខាទីពីរនៃស្ថានទូតកូរ៉េខាងជើងប្រចាំទីក្រុងគួឡាឡាំពួ។
ប្រមុខដឹកនាំប៉ូលិសជាតិម៉ាឡេស៊ីបានប្រាប់អ្នកសារព័ត៌មាននៅថ្ងៃពុធនេះថា លិខិតស្នើសុំឲ្យចូលខ្លួនត្រូវបានបញ្ជូនទៅកាន់ស្ថានទូតកូរ៉េខាងជើងរួចហើយ ដោយលោកសង្ឃឹមថាកូរ៉េខាងជើងនឹងសហការ ដើម្បីជំរុញឲ្យការស៊ើបអង្កេតលើការស្លាប់របស់លោកគីម ជុងណាម មានដំណើរការលឿនទៅមុខ។ ក៏ប៉ុន្តែ ក្នុងពេលជាមួយគ្នា លោកក៏បានព្រមានផងដែរថា ប្រសិនបើស្ថានទូតកូរ៉េខាងជើងមិនសហការទេនោះ ប៉ូលិសនឹងប្រើកម្លាំង ដើម្បីនាំខ្លួនពួកគេមកសួរចម្លើយ។
គួររំឭកឡើងវិញថា លោកគីម ជុងណាម ត្រូវបានគេលបធ្វើឃាត កាលពីថ្ងៃទី១៣កុម្ភៈ នៅឯព្រលានយន្តហោះគួឡាឡាំពួ។
រូបភាពកាម៉េរ៉ាសុវត្ថិភាពនៅព្រលានយន្តហោះបានបង្ហាញឲ្យឃើញថា នៅពេលដែលលោកគីម ជុងណាម កំពុងឈរចាំនៅព្រលានយន្តហោះ ស្រ្តីពីរនាក់បានដើរទៅក្បែរ ហើយម្នាក់លូកដៃពីខាងក្រោយទៅខ្ទប់មុខរបស់លោក រួចហើយដើរចេញទៅបាត់។ ក្រោយពេលកើតហេតុ លោកគីម ជុងណាមបានដើរទៅរកបុគ្គលិកបម្រើការនៅព្រលានយន្តហោះឲ្យជួយ ហើយក្រោយមកក៏ត្រូវដួលសន្លប់ និងត្រូវស្លាប់នៅតាមផ្លូវ នៅពេលដឹកទៅសង្រ្គោះបន្ទាន់ នៅមន្ទីរពេទ្យ។
បច្ចុប្បន្ន ប៉ូលិសម៉ាឡេស៊ីបានចាប់ខ្លួនស្រ្តីជាជនសង្ស័យទាំងពីររូប ព្រមទាំងបុរសជនជាតិម៉ាឡេស៊ីម្នាក់ និងកូរ៉េខាងជើងម្នាក់។ បុរសកូរ៉េខាងជើង ៤នាក់ផ្សេងទៀតក៏ត្រូវបានស្វែងរកចាប់ខ្លួនផងដែរ ក៏ប៉ុន្តែ បើតាមការអះអាងរបស់ប៉ូលិសម៉ាឡេស៊ី ជនសង្ស័យទាំង ៤នាក់នេះ បានរត់គេចខ្លួនចេញពីម៉ាឡេស៊ី ទៅដល់ទីក្រុងព្យុងយ៉ាងហើយ។
ប្រមុខដឹកនាំប៉ូលិសម៉ាឡេស៊ីក៏បានឲ្យដឹងផងដែរនៅថ្ងៃពុធនេះថា មានការប៉ុនប៉ងចូលទៅកាន់កន្លែងរក្សាសាកសពរបស់លោក គីម ជុងណាម ក៏ប៉ុន្តែ លោកមិនបានបញ្ជាក់ថាតើអ្នកលួចចូលទៅកន្លែងរក្សាសាកសពនេះជានរណានោះទេ ដោយគ្រាន់តែប្រាប់ថា “យើងដឹងថាពួកគេជានរណា”។ ដោយសារតែមានការប៉ុនប៉ងចូលទៅកន្លែងរក្សាសាកសពរបស់លោកគីម ជុងណាមនេះហើយ ទើបម៉ាឡេស៊ីដាក់ពង្រាយកងកុម្ម៉ង់ដូឲ្យប្រចាំការនៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ