តុលាការអាមេរិកនឹងកាត់ទោសអតីតបុគ្គលិកចារកិច្ចមួយរូប ពីបទលួចឯកសារសំងាត់
តុលាការអាមេរិកនឹងកាត់ទោសលោក ហារោល ម៉ាកធីន Harold Martin ជាអតីតបុគ្គលិកបម្រើការទីភ្នាក់ងារចារកិច្ច NSA ពីបទលួចយកឯកសារសំងាត់រាប់រយលានទំព័រ។ កាលពីថ្ងៃសុក្រ មេធាវីរបស់ជនជាប់ចោទម៉ាកធីន មិនអាចជួយអោយម៉ាកធីន បង់ប្រាក់ដើម្បីអាចនៅក្រៅឃុំ ក្នុងពេលកំពុងរង់ចាំសវនាការកាត់ទោសទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
លោកហារោល ម៉ាកធីន អាយុ៥១ឆ្នាំ ជាអតីតបុគ្គលិកទីភ្នាក់ងារចារកិច្ចអាមេរិក NSA ត្រូវបានប៉ូលិសចាប់ខ្លួន កាលពីខែសីហា ពីបទលួចយកឯកសារសំងាត់របស់ទីភ្នាក់ងារ។ កាលពីរដូវក្តៅ ភ្នាក់ងារFBI បានឆែកឆេរផ្ទះគាត់ និងបានរកឃើញ ឯកសារសំងាត់ជាច្រើនច្បាប់ រយលានទំព័រ ដែលលោកម៉ាកធីន សន្សំទុកមករាប់ឆ្នាំ។
ប៉ូលិសក៏បានរកឃើញកុំព្យូទ័រជាង១០គ្រឿង និងសម្ភារផ្នែកព័ត៌មានវិទ្យាផ្សេងៗ ដែលជាកម្មសិទ្ធិរបស់រដ្ឋាភិបាលអាមេរិក រួមទាំងអាវុធប្រើប្រាស់មួយចំនួនទៀតផង។ យោងតាមការចោទប្រកាន់ អតីតបុគ្គលិកទីភ្នាក់ងារ NSA រូបនេះ ប្រហែលជាបានទាក់ទងមនុស្សមួយចំនួន ជាភាសារុស្ស៊ី ហើយអាចនឹងបានទាញយកព័ត៌មានភាសារុស្ស៊ី និងភាសាបរទេសផ្សេងៗទៀតដែរ។
មេធាវីរបស់ម៉ាកធីនប្រាប់ថា លោកម៉ាកធីនគ្រាន់តែជាអ្នកសន្សំទុកព័ត៌មានប៉ុណ្នោះ គាត់មិនដូចអតីតភ្នាក់ងារចារកិច្ចអេដវ៉ាដ ស្នវដិនទេ ព្រោះគាត់មិនបានផ្សព្វផ្សាយ ចែកចាយទិន្នន័យព័ត៌មានសំងាត់អោយអ្នកសារព័ត៌មានណាទេ។ មេធាវីលើកឡើងទៀតថា លោកម៉ាកធីន មិនបានក្បត់ជាតិ លក់ឯកសារសំងាត់អោយប្រទេសសត្រូវណាមួយរបស់អាមេរិកទេ។
ប៉ុន្តែ បើម៉ាកធីន បានចែកចាយលក់ ព័ត៌មានសំងាត់ ខុសពីការអះអាងរបស់មេធាវី ម៉ាកធីនអាចនឹងជាប់គុក៣០ឆ្នាំ។ ពេលនេះ សម្រាប់ទោសផ្សេងទៀត លោកម៉ាកធីន អាចជាប់គុក ១ឆ្នាំ ពីបទបានលួចលាក់ទុកឯកសារសំងាត់ និងជាង១០ឆ្នាំ ពីបទលួចសម្ភាររដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ