លោកអូបាម៉ាប្រកាសគម្រោងវិនិយោគ៣៣ពាន់លានដុល្លារនៅអាហ្វ្រិក
នៅក្នុងជំនួបកំពូលជាមួយមេដឹកនាំអាហ្វ្រិកជាង ៤០រូប នៅក្នុងរដ្ឋធានីវ៉ាស៊ីងតោន កាលពីថ្ងៃអង្គារម្សិលមិញ លោកអូបាម៉ាបានប្រកាសឲ្យដឹង អំពីគម្រោងបោះទុនវិនិយោគរហូតដល់ទៅជាង ៣០ពាន់លានដុល្លារ នៅក្នុងតំបន់អាហ្វ្រិក។ សហរដ្ឋអាមេរិកកំពុងតែព្យាយាមប្រជែងជាមួយអឺរ៉ុប និងចិន ដើម្បីទាញយកផលប្រយោជន៍ពីអាហ្វ្រិក ដែលបច្ចុប្បន្នត្រូវបានគេមើលឃើញថាជាតំបន់ដែលប្រកបដោយសក្តានុពលសេដ្ឋកិច្ចខ្ពស់។
ចុះផ្សាយនៅថ្ងៃ៖
ស្តាប់ - ០២:១១
“នៅថ្ងៃនេះខ្ញុំសូមប្រកាសអំពីជំហានសំខាន់ៗមួយចំនួន ដើម្បីជំរុញទំនាក់ទំនងពាណិជ្ជកម្មជាមួយតំបន់អាហ្វ្រិកឲ្យកើនឡើងដល់កម្រិតមួយថ្មីទៀត” នេះគឺជាអ្វីដែលលោកអូបាម៉ាបានលើកឡើង កាលពីថ្ងៃអង្គារម្សិលមិញ នៅក្នុងថ្ងៃទី២ នៃជំនួបកំពូលជាមួយមេដឹកនាំមកពីបណ្តាប្រទេសនៅអាហ្វ្រិក។
ជំហានសំខាន់ៗដែលលោកអូបាម៉ាលើកឡើងនេះ គឺគម្រោងបោះទុនវិនិយោគទាំងក្នុងរូបភាពជាជំនួយសាធារណៈ និងជាវិនិយោគឯកជន គិតជាទឹកប្រាក់សរុបចំនួន ៣៣ពាន់លានដុល្លារ។ នៅក្នុងចំណោមការវិនិយោគឯកជន គឺរួមមានគម្រោងវិនិយោគរបស់ក្រុមហ៊ុនធំៗមួយចំនួនរបស់សហរដ្ឋអាមេរិក រួមមានដូចជា Marriott, Coca-Cola និង Genral Electric ជាដើម ដែលនឹងធ្វើការវិនិយោគ ក្នុងវិស័យសណ្ឋាគារ ទឹកស្អាត ថាមពល សំណង់ ធនាគារ និងព័ត៌មានវិទ្យា។
ជាមួយនឹងការបោះទុនវិនិយោគដ៏ច្រើននេះ សហរដ្ឋអាមេរិករំពឹងថានឹងអាចពង្រឹងទំនាក់ទំនងជាមួយអាហ្វ្រិក ដែលបច្ចុប្បន្ននេះ ត្រូវបានគេចាត់ទុកថាជាតំបន់ដែលមានកំណើនសេដ្ឋកិច្ចខ្ពស់លំដាប់ទី២ នៅលើពិភពលោក បន្ទាប់ពីអាស៊ី ក៏ប៉ុន្តែ ជាតំបន់ដែលអាមេរិកមានការដោះដូរពាណិជ្ជកម្ម និងវិនិយោគតិចតួច បើធៀបនឹងអឺរ៉ុប និងចិន។
សម្រាប់ប្រទេសនៅអាហ្វ្រិកការបោះទុនវិនិយោគរបស់សហរដ្ឋអាមេរិកក៏មានសារៈសំខាន់ខ្លាំងណាស់ដែរ សម្រាប់ការអភិវឌ្ឍសេដ្ឋកិច្ច និងសង្គម នៅក្នុងតំបន់ដែលសម្បូរដោយប្រជាជនក្រីក្រ។
ក៏ប៉ុន្តែ ក្រៅពីបានប្រកាសអំពីទឹកលុយវិនិយោគ លោកអូបាម៉ាក៏បានធ្វើការរំឭកដល់មេដឹកនាំអាហ្វ្រិកផងដែរថា បើទោះបីជាមានទុនវិនិយោគពីបរទេសច្រើនប៉ុណ្ណាក៏ដោយ តែគន្លឹះនៃការអភិវឌ្ឍសេដ្ឋកិច្ចនៅអាហ្វ្រិក គឺអាហ្វ្រិកខ្លួនឯង ដែលចាំបាច់ត្រូវធ្វើយ៉ាងណាបង្កើនបរិយាកាសអំណោយផលដល់ការធ្វើជំនួញ។
លោកអូបាម៉ាបានលើកឡើងថា “ដើមទុនគឺជារឿងមួយ គម្រោងអភិវឌ្ឍគឺជារឿងមួយ ក៏ប៉ុន្តែ នីតិរដ្ឋ កំណែទម្រង់លើវិធានគ្រប់គ្រងជំនួញ អភិបាលកិច្ចល្អ ទាំងអស់នេះគឺជាគន្លឹះដ៏សំខាន់បំផុតក្នុងការជំរុញកំណើនសេដ្ឋកិច្ចអាហ្វ្រិក ពីព្រោះថា គ្រប់គ្នាគួរតែអាចបើកការរកស៊ីដោយមិនចាំបាច់សូកលុយ ឬក៏រកខ្នងបង្អែកជាសាច់ញាតិអ្នកមានអំណាច។ ចំណុចដ៏សំខាន់មួយទៀត គឺសុខសន្តិភាព ពីព្រោះថា អនាគតគឺស្ថិតក្នុងដៃអ្នកដែលចេះសាងសង់ មិនមែនអ្នកចេះតែបំផ្លាញនោះទេ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ