អូបាម៉ាសុំអោយនាយករដ្ឋមន្ត្រីអ៊ីស្រាអែលសម្រេចចិត្តរកដំណោះស្រាយជាមួយប៉ាឡេស្ទីន
នៅសេតវិមាន ថ្ងៃចន្ទម្សិលមិញ ប្រធានាធិបតីអាមេរិកបានសុំអោយនាយករដ្ឋមន្ត្រីអ៊ីស្រាអែល ធ្វើការសម្រេចចិត្ត ទោះជាសេចក្តីសម្រេចនោះពិបាកក៏ដោយចុះ ដើម្បីស្វែងរកដំណោះស្រាយសន្តិភាពជាមួយប៉ាឡេស្ទីន។ សំណើរបស់លោកអូបាម៉ា ធ្វើឡើងនៅពេលកិច្ចពិភាក្សាស្វែងរកសន្តិភាពរវាងអ៊ីស្រាអែលនិងប៉ាឡេស្ទីន ជិតដល់ពេលវេលាបញ្ចប់ តំរូវអោយមានកិច្ចព្រមព្រៀងក្របខណ្ឌចាំបាច់មួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
នៅក្រុងវ៉ាស៊ីនតោន ថ្ងៃចន្ទម្សិលមិញ ប្រធានាធិបតីអាមេរិក បារ៉ាក់ អូបាម៉ា បានជួបពិភាក្សាជាមួយនាយករដ្ឋមន្ត្រីអ៊ីស្រាអែល បិនយ៉ាមីន នេតានីយ៉ាហ៊ូ និងបានសុំអោយលោកនេតានីយ៉ាហ៊ូ ធ្វើការសម្រេចចិត្តដ៏លំបាក ដើម្បីទទួលបានដំណោះស្រាយសន្តិភាពសម្រាប់អ៊ីស្រាអែលនិងប៉ាឡេស្ទីន។ លោកអូបាម៉ាលើកឡើងថា លោកគិតថា រដ្ឋហ្ស៊ីហ្វរបស់អ៊ីស្រាអែល និងរដ្ឋប៉ាឡេស្ទីន នៅតែអាចបង្កើតបាន ហើយប្រជាជនទាំងពីរភាគី អាចរស់នៅក្បែរគ្នា ប្រកបដោយសន្តិភាពនិងសុវត្ថិភាពសន្តិសុខ។
នាយករដ្ឋមន្ត្រីអ៊ីស្រាអែលបែរជាឆ្លើយតបវិញថា គឺខាងប៉ាឡេស្ទីនឯណោះទៅវិញទេ ដែលមិនបានបំពេញកាតព្វកិច្ចក្នុងដំណើរការស្វែងរកសន្តិភាពជាមួយអ៊ីស្រាអែល។ លោកនេតានីយ៉ាហ៊ូលើកឡើងថា កន្លងមក អ៊ីស្រាអែលបានខិតខំសម្រេចអោយដំណើរការស្វែងរកសន្តិភាពបានជឿនលឿនទៅមុខ បែបយ៉ាង អ៊ីស្រាអែលបានដកខ្លួនពីក្រុងជាច្រើននៅស៊ីហ្ស៊កដានី អ៊ីស្រាអែលបានដោះលែងអ្នកទោសជាភេរវជនរាប់រយនាក់ រឺក៏បានរំលាយចោលតំបន់អាណានិគមជនជាតិហ្ស៊ីហ្វជាដើម។ ប៉ុន្តែ ភាគីប៉ាឡេស្ទីនបែរជានៅតែបង្កភេរវកម្ម និងញុះញង់អោយមានការស្អប់ខ្ពើមអ៊ីស្រាអែលទៅវិញ។
ការឆ្លើយតបរបស់នាយករដ្ឋមន្ត្រីអ៊ីស្រាអែល ទៅនឹងសំណើប្រធានាធិបតីអាមេរិក សបង្ហាញថា មេដឹកនាំអ៊ីស្រាអែលនិងអាមេរិក ទាំង២រូបនេះ គ្មានទស្សនៈដូចគ្នានោះទេ។ មិនត្រឹមតែឆ្លើយតបបែបនេះទេ លោកនេតានីយ៉ាហ៊ូ ថែមទាំងបានលើកឡើងទៅលោកអូបាម៉ាទៀតថា បញ្ហានុយក្លេអ៊ែរអ៊ីរ៉ង់ ការហាមឃាត់អ៊ីរ៉ង់មិនអោយធ្វើអាវុធបរមាណូឯណោះទេ ទើបជាបញ្ហាសំខាន់នៅពេលនេះ។ ទោះយ៉ាងនេះក្តី លោកអូបាម៉ាធ្លាប់បានរំលឹកអ៊ីស្រាអែលរួចហើយទាក់ទង ការកើនឡើងនៃការសាងសង់លំនៅដ្ឋានក្នុងតំបន់អាណានិគមជនជាតិហ្ស៊ីហ្វ។ លោកអូបាម៉ារំលឹកថា ប្រសិនបើប៉ាឡេស្ទីនសន្និដ្ឋានថា រដ្ឋប៉ាឡេស្ទីនប្រកបដោយបូរណភាព មិនអាចកើតឡើងបាន នោះការគ្រប់គ្រងផលវិបាកជាលក្ខណៈអន្តរជាតិ ពីសំណាក់អាមេរិក នឹងមានព្រំដែនកំណត់។
កិច្ចពិភាក្សាស្វែងរកសន្តិភាពរវាងអ៊ីស្រាអែលនិងប៉ាឡេស្ទីន នឹងបិទបញ្ចប់នៅថ្ងៃ២៩មេសាខាងមុខ។ ភាគីទាំង២ត្រូវតែសម្រេចអោយបាននូវកិច្ចព្រមព្រៀងក្របខណ្ឌមួយ ស្តីពីលក្ខន្តិកៈចុងក្រោយ ទាក់ទងបញ្ហាព្រំដែន តំបន់អាណានិគម សន្តិសុខ លក្ខន្តិកៈក្រុងហ្សេរុយសាឡិម រួមទាំងជនភៀសខ្លួនប៉ាឡេស្ទីនផងដែរ។ យោងតាមប្រមុខការទូតអាមេរិក ចនឃែររី ប្រសិនបើកិច្ចចរចាមិនអាចបញ្ចប់តាមថ្ងៃកំណត់ទេ កិច្ចចរចានឹងបន្តធ្វើទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ