ប្រធានាធិបតីអាមេរិកនិងតួកគីជជែកគ្នាពីយុទ្ធនាការកំចាត់ក្រុមជីហាតរដ្ឋអ៊ីស្លាម
សេតវិមានបានផ្តល់ដំណឹងថា ម្សិលមិញនេះ លោកអូបាម៉ាបានទូរសព្ទទៅប្រធានាធិបតីតួកគី អ៊ែរដូហ្កាន ជជែកជាមួយលោកអ៊ែរដូហ្កាន ពីការប្រយុទ្ធប្រឆាំងក្រុមភេរជនរដ្ឋអ៊ីស្លាម នៅដើមបូព៌ា។ លោកអូបាម៉ាបានសង្កត់ធ្ងន់ពីការសហការស្អិតរមួត រវាងអាមេរិកនិងតួកគី ដើម្បីបន្តដាក់សម្ពាធលើក្រុមភេរវជនតទៅទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៨
ថ្ងៃពុធម្សិលមិញ ពេលជជែកតាមទូរសព្ទជាមួយប្រធានាធិបតីតួកគី អ៊ែរដូហ្កាន លោកអូបាម៉ាបានទទួលស្គាល់ និងលើកសរសើរតួកគី ដែលបានចូលរួមក្នុងការប្រយុទ្ធក្រុមជីហាតរដ្ឋអ៊ីស្លាម និងបានគាំទ្រកងកម្លាំងក្នុងស្រុកស៊ីរី។ ការជួយជ្រោមជ្រែងពីតួកគី បានជួយកំចាត់ក្រុមភេរវជន តាមព្រំដែនតួកគី និងតាមភាគពាយព្យប្រទេសស៊ីរី ក្នុងពេលកន្លងមកដែរ។
ប្រធានាធិបតីអាមេរិកបានសរសើរតួកគីផងដែរ ដែលបន្តចរចាជាមួយអ៊ីរ៉ាក់ ទាក់ទងនឹងតួនាទីតួកគី ក្នុងប្រទេសសម្ព័ន្ធមិត្ត ដើម្បីកំទេចក្រុមជីហាតនៅអ៊ីរ៉ាក់។ កាលពីថ្ងៃសៅរ៍ នាយករដ្ឋមន្ត្រីអ៊ីរ៉ាក់ បានលើកឡើងថា ពេលនេះ អ៊ីរ៉ាក់មានជំហរប្រឆាំងមិនអោយតួកគីចូលរួមវាយលុកយកទីក្រុងមូស៊ូល ពីក្រុមជីហាតទេ។
ទោះយ៉ាងនេះក្តី ក៏ប្រធានាធិបតីតួកគី លោកអ៊ែរដូហ្កាន នៅតែប្រកាសបន្តគាំទ្របូរណភាពដែនដីអ៊ីរ៉ាក់ដែរ។ ដើម្បីលើកទីកចិត្តតួកគី លោកអូបាម៉ាបានសំដែងការគាំទ្រចំពោះកិច្ចការហាមឃាត់ក្រុមគួដឌីស្ថានមកពីចលនាPKK មិនអោយក្រុមនះរកបានជម្រកជ្រកកោននៅភាគខាងជើងអ៊ីរ៉ាក់ដាច់ខាត។ តួកគី អាមេរិក និងសហភាពអឺរ៉ុបចាត់ទុកក្រុមPKK ថា ជាក្រុមភេរវជន។
ទំនាក់ទំនងរវាងអាមេរិកនិងតួកគីបានធ្លាក់ចុះដុនដាប ក្រោយមានរដ្ឋប្រហារមិនបានសម្រេចខែកក្កដា នៅតួកគី។ តួកគីចោទចលនាក្រុមប្រឆាំងរបស់លោកហ្គូឡិន ថានៅពីក្រោយខ្នងរដ្ឋប្រហារ និងទាមទារច្រើនលើក ច្រើនសារ អោយអាមេរិកបញ្ជូនលោកហ្គូឡិនអោយតួកគី កាត់ទោស។ តែអាមេរិកបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ