សេដ្ឋកិច្ចជាគន្លឹះសោសម្រាប់ពង្រីកទំនាក់ទំនងអាមេរិក-រុស្ស៊ី
សេចក្តីនេះថ្លែងដោយលោកប្រធានាធិបតីអាមេរិក បារ៉ាក់ អូបាម៉ា ក្នុងសម្ភាសន៍ ដែលថ្ងៃនេះតែម្តង បានត្រូវលើកយកមកផ្សាយទាំងស្រុង ដោយទូរទស្សន៍រដ្ឋរុស្ស៊ី និង ចុះផ្សាយ ដោយកាសែតរដ្ឋាភិបាលរុស្ស៊ីឈ្មោះ Rossiskaya Gazeta។ សម្ភាសន៍នេះ ត្រូវ ពួកអ្នកកាសែតរុស្ស៊ីសុំបានពីលោក អូបាម៉ា ពីរថ្ងៃមុនឱកាសខួបកំណើតរបស់លោក ដែលថ្ងៃស្អែកទី៤សីហា នឹងមានអាយុគម្រប់បាន ៥០ឆ្នាំគត់។
ចុះផ្សាយនៅថ្ងៃ៖
ស្តាប់ - ០១:៥៧
តបនឹងសំណូមពរសុំយោបល់គាត់ថា តើអ្វីទៅជាព្រឹត្តិការណ៍ធំៗ ដែលមានន័យ គួរឲ្យកត់សម្គាល់ជាងគេ សម្រាប់ប្រវត្តិសាស្ត្រពិភពលោក ក្នុង៥០ឆ្នាំចុងក្រោយ លោក អូបាម៉ា បានលើកឡើងជាពិសេស អំពីការចប់ទៅនៃយុគ “សង្គ្រាមត្រជាក់”។ លោក អូបាម៉ា សង្កត់ធ្ងន់ថា “ពេលខ្ញុំកើតមក កាលពី៥០ឆ្នាំមុន គ្មាននរណាអាចនឹកស្មានឡើយថា រុស្ស៊ី និង ស.រ.អា. នឹងក្លាយទៅជាដៃគូនឹងគ្នាលើឆាកអន្តរជាតិ”។
អំពីប្រទេសរុស្ស៊ី ប្រធានាធិបតីអាមេរិកលើកឡើងថា គឺសហប្រតិបត្តិការនៅតាមមុខព្រួញសេដ្ឋកិច្ច ដែលដើរតួគន្លឹះ ក្នុងការអភិវឌ្ឍន៍ទំនាក់ទំនងទ្វេភាគី ហេតុដែលស៊ីគ្នានឹងបន្ទាត់ធ្វើទំនើបកម្មប្រទេសរុស្ស៊ី ប្រកាសដោយលោកប្រធានាធិបតី មេដវេដេវ ផ្ទាល់។
ប្រមុខរដ្ឋអាមេរិកបានវាយតម្លៃខ្ពស់ ដល់ការខំប្រឹងប្រែងរបស់សមភាគីរុស្ស៊ី គឺលោក មេដវេដេវ ខាងផ្តល់ថាមពលថ្មី ដល់ទំនាក់ទំនងជាមួយអាមេរិក តាមរយៈការចុះសន្ធិសញ្ញាស្តីអំពីការកាត់បន្ថយយ៉ាងក្រាស់ក្រែលតទៅទៀត សក្តានុពលយុទ្ធសាស្ត្របរមាណូរបស់មហាអំណាចទាំងពីរ ក្នុងនាមពង្រឹងសន្តិសុខលើពិភពលោក។
តាមប្រសាសន៍លោកអូបាម៉ា “ប្រធានាធិបតីមេដវេដេវ ជាអ្នកស្នេហាមាតុភូមិដ៏បរិសុទ្ធ។ គាត់ជាអ្នកការពារយ៉ាងអង់អាច ផលប្រយោជន៍របស់រុស្ស៊ី។ ព្រមជាមួយនេះ លោកមេដវេដេវក៏ទទួលស្គាល់ដែរថា ផ្លូវឆ្ពោះទៅកាន់ភាពចម្រើនរុងរឿងរបស់ប្រទេសរុស្ស៊ីត្រូវតែឆ្លងកាត់តាមរយៈការធ្វើសហប្រតិបត្តិការជាមួយពិភពក្រៅ ដោយឈរលើមូលដ្ឋានទ្វេភាគី ក៏ដូចជាពហុភាគី។ រួចជាផ្លែផ្កា លោកមេដវេដេវ កំពុងទទួល នូវការគោរពពីសំណាក់មជ្ឈដ្ឋានធំទូលំទូលាយ”។
លោកអូបាម៉ា ក្នុងសម្ភាសន៍ខ្លួន ក៏មិនភ្លេចសរសើរឡើយ ដល់រដ្ឋបុរសរុស្ស៊ីម្នាក់ទៀត ដែលស្ថិតនៅក្នុង “សម្ព័ន្ធកាន់អំណាច” នៅរុស្ស៊ី គឺលោកនាយករដ្ឋមន្ត្រី ពូទីន ដែលគាំទ្រទាំងស្រុងដល់ការផ្តល់ថាមពលថ្មី ដល់ទំនាក់ទំនងរបស់រុស្ស៊ី ជាមួយអាមេរិក។ តាមលោកអូបាម៉ា ពិតជាការគាំទ្រនេះ ដែលក្នុង២ឆ្នាំចុងក្រោយ បានលើកទំនាក់ទំនង រុស្ស៊ី-អាមេរិក ឲ្យល្អប្រសើរមែនទែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ