Ohioជារដ្ឋសំខាន់មួយ កំណត់ការចាញ់ឈ្នះរបស់បេក្ខជនប្រធានាធិបតីអាមេរិក
ដោយសាតែ ព្យុះសង្ឃាSandyដែលកំពុងវាយប្រហារតំបន់ឆ្នេរខាងកើតសហរដ្ឋអាមេរិកដែលក្នុងនោះក៏មានក្រុងវ៉ាស៊ីនតោន ដែលមានវិមានរដ្ឋាភិបាលស្ថិតនៅផងនោះ បេក្ខជនប្រធានាធិបតីបានលុបចោលកម្មវិធីឃោសនាបោះឆ្នោតនៅក្នុងរដ្ឋអូហៃអូ Ohio។ អូហៃអូគឺជារដ្ឋដ៏សំខាន់មួយសម្រាប់បេក្ខជនទាំងពីរ។ ក្នុងន័យថា លោកមីត រ៉ូមនីនឹងត្រូវប្រញាប់រៀបចំកម្មវិធីបន្ទាន់ ដើម្បីត្រឡប់មករដ្ឋអូហៃអូ បន្ទាប់ពីការថមថយនៃ ព្យុះសង្ឃរា។
ចុះផ្សាយនៅថ្ងៃ៖
ស្តាប់ - ០១:៥០
តាមទម្លាប់ ឬតាមការចំណាំ គ្មានបេក្ខជនប្រធានាធិបតីអាមេរិកណាមួយដែលឈ្នះក្នុងការបោះឆ្នោតបានធ្វើជាប្រធានាធិបតីអាមេរិក ដោយមិនបានឈ្នះការបោះឆ្នោតក្នុងរដ្ឋអូហៃអូនោះឡើយ។ អូហៃអូគឺជារដ្ឋមួយក្នុងចំណោមរដ្ឋចំនួន៩ដែលសហរដ្ឋអាមេរិកហៅថា Swing state នៅក្នុងការបោះឆ្នោតម្តងៗ។ បានន័យថា ក្នុងចំណោមរដ្ឋទាំង៥២របស់អាមេរិក គឺ មានរដ្ឋមួយចំនួនដែលបោះឆ្នោតអោយគណបក្សប្រជាធិបតេយ្យរហូត និងរដ្ឋមួយចំនួនទៀត ប្រជាជនបោះឆ្នោតគាំទ្រគណបក្សសាធារណរដ្ឋ។
នៅសល់រដ្ឋចំនួន៩ ដែលពេលខ្លះប្រជាជនបោះឆ្នោតគាំទ្រគណបក្សប្រជាធិបតេយ្យ និងពេលខ្លះទៀតប្រជាជនអាមេរិកបោះឆ្នោតគាំទ្រគណបក្សសាធារណរដ្ឋ។ ហេតុដូច្នេះហើយ ជាធម្មតា រាល់ការបោះឆ្នោតប្រធានាធិបតីម្តង បេក្ខជនមកពីខាងគណបក្សទាំងពីរបានចំណាយថាមពលយ៉ាងច្រើន និងយ៉ាងខ្លាំងតាមតែអាចធ្វើបាន ដើម្បីប្រកួតប្រជែងដណ្តើមប្រជាប្រិយភាពគ្នានៅក្នុងរដ្ឋទាំង៩នេះ។ ហើយក្នុងចំណោមរដ្ឋទាំង៩នោះ អូហៃអូគឺជារដ្ឋសំខាន់ជាងគេមួយដែលតាមចំណាំ គឺជាកត្តាកំណត់ការចាញ់ឈ្នះរបស់បេក្ខជនប្រធានាធិបតី។
លោកបារ៉ាក់ អូបាម៉ា ថ្វីដ្បិតតែធ្លាប់បានឈ្នះនៅក្នុងរដ្ឋអូហៃអូនេះក៏ដោយ បេក្ខជនប្រធានាធិបតីរូបនេះមិនត្រូវធ្វេសប្រហែសឡើយ។ ប៉ុន្តែ ដោយសារតែអាមេរិកកំពុងទទួលរងនូវការវាយប្រហារដោយព្យុះសង្ឃរា Hurricane Sandy លោកអូបាម៉ា ដែលមានគម្រោងមកជួបជុំឃោសនាបោះឆ្នោតនៅអូហៃអូ នៅថ្ងៃចន្ទនេះជាមួយលោកប៊ីល គ្លីនតុន បានលុបចោលកម្មវិធីនេះវិញ។
ចំណែកឯលោក មីត រ៉ូមនីវិញកំពុងតែព្យាយាមរកឱកាសត្រឡប់មករដ្ឋអូហៃអូនេះបន្ទាប់ពីព្យុះសង្ឃរា ខណៈដែលប្រជាប្រិយភាពលោកកំពុងតែកើនឡើងប្រកិតនឹងប្រជាប្រិយភាពរបស់លោកអូបាម៉ា។
គួររម្លឹកថា ការបោះឆ្នោតប្រធានាធិបតីអាមេរិកនឹងប្រព្រឹត្ត ទៅនៅថ្ងៃទីអង្គារទី៦វិច្ឆិកាសប្តាហ៍ក្រោយនេះហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ