អង្គការOpep៖ផលិតកម្មប្រេងក្នុងខែតុលាកន្លងទៅ បានកើនខ្ពស់
អង្គការប្រទេសនាំប្រេងចេញ ហៅកាត់ថា អង្គការOpep បានគូសបញ្ជាក់នៅថ្ងៃសុក្រនេះថា ប្រេងដែលគេបូមបាន ក្នុងខែតុលាកន្លងទៅ មានបរិមាណខ្ពស់ រហូតដល់៣៣លាន៦សែន៤ម៉ឺនបារីល ឯណោះ ក្នុងមួយថ្ងៃ។ ផ្ទុយទៅវិញ ប្រទេសអង្គការOpep ទើបតែបានសម្រេចកិច្ចព្រមព្រៀងកាត់បន្ថយការផលិតប្រេង កាលពីខែកញ្ញាប៉ុណ្ណោះ ដើម្បី ទប់មិនអោយប្រេងឆៅធ្លាក់ថ្លៃខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ខែតុលាកន្លងទៅ ក្រុមប្រទេសនៃអង្គការនាំប្រេងចេញ Opep បានបូមប្រេងក្នុងបរិមាណ៣៣លាន៦សែន៤ម៉ឺនបារីល ក្នុងមួយថ្ងៃ។ គិតទៅ គឺមានការកើនបរិមាណដល់ទៅ២សែន៣ម៉ឺន៦ពាន់បារីលក្នុងមួយថ្ងៃ។ នីហ្សេរីយ៉ា លីប៊ី និងអ៊ីរ៉ាក់ មានភាពសកម្មក្នុងការបូមយកប្រេង ក្នុងបរិមាណសន្ធឹកសន្ធាប់ ខណៈប្រទេសទាំងនេះ កំពុងមានជម្លោះហិង្សាក្នុងស្រុក។
បណ្តាប្រទេសមិនមែនសមាជិកអង្គការOpep វិញ ក៏បានបង្កើនការផលិតប្រេងដែរ កាលពីខែតុលា។ សម្រាប់ការផលិតប្រេងគ្រប់ប្រភេទក្នុងពិភពលោក បរិមាណផលិតបានកើនថែមជាង៩សែន៧ម៉ឺនបារីល ក្នុងមួយថ្ងៃ គិតសម្រាប់ពេល១ខែ។ ការវិវត្តន៍នៃដំណើរការផលិតប្រេង ត្រូវបានទីភ្នាក់ងារថាមពលអន្តរជាតិ កត់សម្គាល់ផងដែរ ក្នុងរបាយការណ៍មួយ ចុះផ្សាយកាលពីថ្ងៃព្រហស្បតិ៍។ សម្រាប់ឆ្នាំ២០១៧ អង្គការOpep រំពឹងថា តំរូវការប្រេងក្នុងពិភពលោក នឹងកើនដល់៩៥លាន៥សែន៥ម៉ឺនបារីល ក្នុងមួយថ្ងៃ។
គួររំលឹកថា កាលពីខែកញ្ញា បណ្តាប្រទេសអង្គការOpep បានសម្រេចចេញកិច្ចព្រមព្រៀងកាត់បន្ថយការផលិតប្រេង ដើម្បីទប់ស្កាត់មិនអោយតម្លៃប្រេងឆៅធ្លាក់ចុះខ្លាំង។ Opep ចង់អោយការផលិតប្រេង ធ្វើបានតែចំណុះ៣២លាន៥សែនបារីល ទៅ៣៣លានបារីលប៉ុណ្ណោះក្នុងមួយថ្ងៃ។ អ៊ីរ៉ាក់ អ៊ីរ៉ង់ លីប៊ី រឺក៏នីហ្សេរីយ៉ាមិនចង់កាត់បន្ថយការផលិតប្រេងរបស់ខ្លួនទេ។
ថ្ងៃ៣០វិច្ឆិកា ខាងមុខនេះ អង្គការOpepនឹងបើកកិច្ចប្រជុំ នៅទីក្រុងវីយេន ដើម្បីចែកកូតាតាមប្រទេស ដើម្បីសម្រេចទិសដៅកាត់បន្ថយការផលិតប្រេងនេះអោយបាន។ ទន្ទឹមនេះដែរ Opep ចង់សម្រេចបានកិច្ចព្រមព្រៀងជាមួយប្រទេសផលិតប្រេងធំៗ ដូចជារុស្ស៊ីជាដើម។ ក្រុងម៉ូស្គូមានជំហរគាំទ្រការជំរុញសន្ទុះតម្លៃប្រេងអោយឡើងថ្លៃក្នុងទីផ្សារឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ