អង្គការសេដាក គ្រោងនឹងពង្រីកទីផ្សារបន្លែសរីរាង្គនៅក្នុងឆ្នាំ ២០១៤
អង្គការសេដាកគ្រោងនឹងពង្រីកទីផ្សារបន្លែសរីរាង្គនៅក្នុងឆ្នាំ ២០១៤នេះ សម្រាប់ក្រុមប្រជា កសិករផលិតបន្លែសរីរាង្គ និងអ្នកប្រើប្រាស់ដែលគិតគូរអំពីសុខភាព។ គម្រោងនេះ ត្រូវបាន ធ្វើឡើងបន្ទាប់ពីក្រុមអ្នកផលិតបន្លែសរីរាង្គ បានមកជួបជុំគ្នា នឹងចែករំលែកបទពិសោធន៏ ទៅវិញទៅមក នៅក្នុងកិច្ចប្រជុំពេញអង្គរមួយនៅក្នុងខេត្តកំពង់ឆ្នាំង ចាប់តាំងពីថ្ងៃ ទី ១៦ធ្នូ ដល់ថ្ងៃទី ១៩ធ្នូនេះ។
ចុះផ្សាយនៅថ្ងៃ៖
ស្តាប់ - ០១:៥៧
ក្រុមអ្នកផលិតបន្លែសរីរាង្គសរុបចំនួន ៧១ នាក់មកពីខេត្តចំនួន ៤ រួមមានខេត្តកំពង់ឆ្នាំង កំពង់ស្ពឺ តាកែវ និង កំពត បាននិងកំពុងជួបជុំគ្នាចែករំលែកនូវបទពិសោធន៍ជោគជ័យនិងឆ្លុះបញ្ចាំងពីភាពរីកចំរើនការងារផលិតបន្លែសរីរាង្គក្នុងឆ្នាំ ២០១៣ ។ ជំនួបនេះបានធ្វើឡើងចាប់ពីថ្ងៃទី ១៦ ដល់ ១៩ ខែធ្នូ ឆ្នាំ ២០១៣ នៅសណ្ឋាគារសូវណ្ណភូមិ ខេត្តកំពង់ឆ្នាំង។
កិច្ចប្រជុំពេញអង្គរបស់ក្រុមអ្នកផលិតបន្លែសរីរាង្គនេះ រៀបចំដោយអង្គការ សេដាក សហការជាមួយអង្គការ អភិវឌ្ឍន៍អាឡឺម៉ង់ (ជីអាយហ្សិត) ដើម្បីពិភាក្សាអំពីផែនការជាយុទ្ឋសាស្ត្រក្នុងការជួយគាំទ្រកសិករ ក្លាយជាអ្នកដាំបន្លែអាជីពផ្គត់ផ្គង់មកកាន់ទីផ្សារ។
លោក ហ៊ីម ខទៀត មន្ត្រីទំនាក់ទំនងព័ត៌មានរបស់អង្គការសេដាក បានប្រាប់វិទ្យុបារាំងអន្តរជាតិថា បន្ទាប់ពីកិច្ចប្រជុំអស់រយៈពេល ៤ថ្ងៃមកនេះ អង្គការ និងប្រជាកសិករទាំង៤ខេត្ត បានយល់ព្រមនឹងបង្កើនការផលិតរបស់ខ្លួន នៅក្នុងឆ្នាំ ២០១៤ ដើម្បីផ្គត់ផ្គង់ទីផ្សារបន្ថែម។ លោក ហ៊ីម ខទៀត បានបញ្ជាក់ថា អង្គការសេដាក ក៏នឹងផ្តល់ការបណ្តុះបណ្តាលដល់ការដាំដុះបន្លែសរីរាង្គនេះ ដល់ប្រជាកសិករ ដែលមានបំណងចង់បានប្រាក់ចំណូលខ្ពស់ និងគិតគូរពីសុខភាពគ្រូសារ និងអ្នកបរិភោគបន្លែរបស់គាត់ផងដែរ។
កន្លងមក អង្គការសេដាក ក្រោមកិច្ចសហការជាមួយ និងអង្គអភិវឌ្ឍន៍អាឡឺម៉ង់ ជីអាយហ្សិត បានគាំទ្រ និងរៀបចំចងក្រងក្រុមកសិករអ្នកផលិតបន្លែសរីរាង្គសម្រាប់បរិភាគ និងលក់មកកាន់ទីផ្សារភ្នំពេញបានចំនួន ១០០នាក់ ចាប់តាំងពីឆ្នាំ ២០០៣មក នៅក្នុងខេត្តចំនួន ៤ រួមមានខេត្តកំពត តាកែវ កំពង់ស្ពឺ និងកំពង់ឆ្នាំង។ នៅក្នុងឆ្នាំ ២០១៣នេះ ពួកគាត់បានផ្គត់ផ្គង់ បន្លែមកកាន់ទីផ្សារក្នុងក្រុងភ្នំពេញបានចំនួន ៥០តោន។
ហើយនៅក្នុងឆ្នាំ ២០១៤ ខាងមុខ លោក ហ៊ីម ខទៀតអះអាងថា ខាងអង្គការ និងក្រុមអ្នកផលិតគ្រោងនឹងបង្កើនការផលិតរបស់ខ្លួនពីពីរទៅ បីដង ដើម្បីបំពេញតម្រូវការដល់អ្នកនិយមប្រើបន្លែសរីរាង្គ ដែលគិតគូរពីសុខភាពជាចំបង និងជួយគាំទ្រដល់ប្រជាកសិករផលិតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ