ប្រមុខរដ្ឋម៉ាល់ឌីវចុះចេញពីតំណែង
ម៉ាល់ឌីវដែលគេចាត់ទុកថា ជាឋានសួគ៌លោកីយ៍ ដោយសារតែកោះតូចធំដ៏ល្អប្រណិតចំនួនជាង១០០០នៅក្នុងមហាសមុទ្រឥណ្ឌា កំពុងពើបប្រទះនឹងវិបត្តិនយោបាយ។ នៅថ្ងៃអង្គារទី៧កុម្ភៈនេះ លោកប្រធានាធិបតីMohamed Nasheed បានបង្ខំចិត្តលាលែងចេញពីតំណែង ក្រោយពីមានបាតុកម្មរបស់គណបក្សប្រឆាំងអស់ជាច្រើនសប្តាហ៍មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៦
លោកប្រធានាធិបតីម៉ាល់ឌីវ Mohamed Nasheed បានប្រកាសលាលែងចេញពីតំណែងនៅក្នុងការថ្លែងសារមួយដែលផ្សាយបន្តផ្ទាល់តាមទូរទស្សន៍ នៅថ្ងៃអង្គារទី៧កុម្ភៈនេះ។
លោកប្រមុខរដ្ឋនៃទីប្រជុំកោះមួយនេះដែលឋិតនៅក្នុងមហាសមុទ្រឥណ្ឌា បានពន្យល់ថា លោកសុខចិត្តលាលែងពីតំណែង ជាជាងប្រើកម្លាំងយោធាវាយបង្ក្រាបពួកបាតុករ។ ជាច្រើនសប្តាហ៍កន្លងមកហើយ ដែលគណបក្សប្រឆាំងដឹកនាំដោយអតីតប្រធានាធិបតីMaumoon Abdul Gayoom ធ្វើបាតុកម្មទាមទារឲ្យលោកMohamed Nasheed ចុះចេញពីអំណាច។ គណបក្សប្រឆាំងចោទលោកប្រមុខរដ្ឋថា ប្រើអំណាចផ្តាច់ការ ក្រោយពីអាជ្ញាធរបានចាប់ខ្លួនប្រធានសាលាឧក្រិដ្ឋ ដែលជាប់សង្ស័យថាបានប្រព្រឹត្តអំពើពុករលួយ។
នៅថ្ងៃអង្គារនេះដែរ កងទ័ពម៉ាល់ឌីវបានបដិសេធថា គ្មានរដ្ឋប្រហារដូចពាក្យចចាមអារ៉ាមបានលេចឮឲ្យដឹងនោះទេ។ ក៏ប៉ុន្តែ កងទ័ពបានស្នើឲ្យលោកប្រធានាធិបតីចុះចេញពីតំណែង ដើម្បីអនុញ្ញាតឲ្យប្រទេសចេញរួចពីភាពទ័លច្រកនយោបាយ។ នេះបើយោងទៅតាមអ្នកនាំពាក្យរបស់កងទ័ព។
សូមជម្រាបថា លោកMohamed Nasheed គឺជាប្រធានាធិបតីម៉ាល់ឌីវទីមួយបង្អស់ដែលត្រូវបានតែងតាំងដោយការបោះឆ្នោតជាសកលកាលពីឆ្នាំ២០០៨។ លោកជាសកម្មជនសិទ្ធិមនុស្សម្នាក់ ដែលមុននឹងបានជាប់ឆ្នោតជាប្រធានាធិបតី បានជាប់ពន្ធនាគារជាច្រើនដង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ