រោងចក្រនុយក្លេអ៊ែរក្នុងពិភពលោកនឹងបន្តកើនចំនួន យ៉ាងហោចដល់ឆ្នាំ២០៣០
រោងចក្រនុយក្លេអ៊ែរក្នុងពិភពលោកនឹងបន្តកើនចំនួន យ៉ាងហោចក៏ដល់ឆ្នាំ២០៣០ដែរ ពិសេសនៅទ្វីបអាស៊ី។ នៅឆ្នាំ២០៣០ អំណាចផលិតថាមពល អាចកើនឡើងយ៉ាងតិច១,៩ភាគរយ។ នេះជាការសន្និដ្ឋានបែបប្រុងប្រយ័ត្ន របស់ទីភ្នាក់ងារថាមពលបរមាណូអន្តរជាតិAIEA បើទោះជានៅអឺរ៉ុប ចំនួនរោងចក្រនុយក្លេអ៊ែរបានថយចុះ ក្រោយមានមហន្តរាយនៅ Fukushimaក៏ដោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
យោងតាមការសិក្សាចុះផ្សាយនៅថ្ងៃសុក្រនេះ ដោយទីភ្នាក់ងារថាមពលបរមាណូអន្តរជាតិ AIEA គិតដល់ឆ្នាំ២០៣០ រោងចក្រនុយក្លេអ៊ែរនឹងបន្តកើនចំនួន ក្នុងពិភពលោក។ រោងចក្រនុយក្លេអ៊ែរក្នុងពិភពលោក នឹងធ្វើការផលិតថាមពល រហូតដល់ ៣៩០,២ gigawatts (GW) ប្រៀបនឹងឆ្នាំ២០១៥ ដែលបរិមាណផលិតមានត្រឹមតែ៣៨២ GW ។
ទោះបែបនេះក្តី ក៏តួលេខនេះនៅមានដែនកំណត់។ ដោយឡែក មូលហេតុដែលនាំអោយគេសាងសង់រោងចក្របន្ថែម ក្នុងពេល១៥ឆ្នាំទៅមុខ ក៏ដោយសារតែរោងចក្រនុយក្លេអ៊ែរជាច្រើនក្នុងពិភពលោក មានអាយុកាលចំណាស់ទៅហើយ។ ក្នុងពិភពលោក សព្វថ្ងៃនេះ មានប្រតិករនុយក្លេអ៊ែរកំពុងដំណើរការចំនួន៤៥០។ ក្នុងនោះ ប្រតិករជាងពាក់កណ្តាល បានដំណើរការជាង៣០ឆ្នាំហើយ។
ទោះមានគ្រោះមហន្តរាយនុយក្លេអ៊ែរនៅហ្វ៊ួគូស្ហ៊ីម៉ា ប្រទេសជប៉ុន ឆ្នាំ២០១១ ក៏ប្រទេសដូចជាចិន រឺក៏កូរ៉េខាងត្បូង នៅតែបន្តអភិវឌ្ឍន៍ឧស្សហកម្មនុយក្លេអ៊ែររបស់ខ្លួន។ រោងចក្រនុយក្លេអ៊ែរនៅចុងបូព៌ា ដែលសព្វថ្ងៃផលិតបានថាមពលជិត ៩៤ GW អាចផលិតដល់ជាងជាង១៣២ GW សម្រាប់១៥ឆ្នាំទៅមុខ។ រោងចក្រនៅមជ្ឈិមបូព៌ានិងអាស៊ីខាងត្បូងក៏បង្កើនការផលិតដូចគ្នា ក្នុងពេលខាងមុខ។
នៅអឺរ៉ុប រុស្ស៊ី កំពុងសង់ប្រតិករចំនួន៧ ហើយបេឡារុសវិញសង់ប្រតិករ២ដែរ។ ដោយឡែក បើយោងតាមទីភ្នាក់ងារថាមពលបរមាណូអន្តរជាតិ បើគិតជារួម ការផលិតនៅតាមរោងចក្រនុយក្លេអ៊ែរនៅអឺរ៉ុបខាងកើត អាចថយចុះវិញបន្តិច គឺថយដល់៤៩,៩ GW ប្រៀបនឹងតួលេខ១១២,៧ GW បច្ចុប្បន្ន។ នៅអឺរ៉ុបខាងលិច និងនៅអាមេរិកខាងជើងវិញ ក៏នឹងមានការថយចុះទៅវិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ