ផ្នែកចារកិច្ចបារាំងចេញរបាយការណ៍ចោទថា កងទ័ពស៊ីរីបានប្រើអាវុធគីមី ថ្ងៃ៤មេសា
ថ្ងៃពុធនេះ រដ្ឋាភិបាលបារាំងបានចោទកងទ័ពស៊ីរី ពេញមាត់តែម្តង ថាបានប្រើអាវុធផ្ទុកសារធាតុពុលសារ៉ាំង វាយប្រហារតំបន់ Khan Cheikhoun ខាន់ ឈែកឈូន ភាគពាយព្យស៊ីរី កាលពីថ្ងៃ៤មេសា។ ផ្នែកចារកិច្ចបារាំង បានធ្វើការស៊ើបអង្កេតដោយផ្ទាល់ដល់ស៊ីរី មុននឹងចេញសេចក្តីសន្និដ្ឋានចោទប្រកាន់នៅថ្ងៃពុធនេះ។ ការវាយប្រហារ ដោយអាវុធគីមីនៅស៊ីរីថ្ងៃ៤មេសា បានសម្លាប់មនុស្ស៨៧នាក់ ក្នុងនោះមានកុមារ៣១នាក់។
ចុះផ្សាយនៅថ្ងៃ៖ កែប្រែថ្ងៃទី៖
បារាំងចោទថា ការវាយប្រហារដោយអាវុធគីមី នៅស៊ីរី នៅភូមិ Khan Cheikhoun ភាគពាយព្យស៊ីរី កាលពីថ្ងៃ៤មេសា គឺជាស្នាដៃរបស់កងទ័ពស៊ីរីប្រាកដណាស់។ បើយោងតាមឯកសាររបស់ផ្នែកចារកិច្ចបារាំង ដែលបានចុះទៅស៊ើបអង្កេតដល់ស៊ីរី រដ្ឋាភិបាលស៊ីរីនៅមានអាវុធគីមីនៅឡើយ ដែលនេះជាការរំលោភលើកិច្ចព្រមព្រៀងឆ្នាំ២០១៣ ដែលតំរូវអោយស៊ីរីកំទេចអាវុធគីមីអោយអស់ពីប្រទេស។
ផ្នែកចារកិច្ចបារាំងបានដកស្រង់យកសារធាតុពុលសារ៉ាំងដែលគេប្រើវាយប្រហារភូមិស៊ីរី ឆាន់ ឈែកឃូន កាលពីថ្ងៃ៤មេសា មកពិនិត្យមើល ប្រៀបធៀបជាមួយសារធាតុពុលសារ៉ាំងដែលប្រើក្នុងការវាយប្រហារនៅសារ៉ាកេប ភាគពាយព្យស៊ីរី កាលពីឆ្នាំ២០១៣។ សារធាតុសារ៉ាំងនៅភូមិខាន់ ឈែកឃូន ដូចគ្នាទៅនឹងសារធាតុគីមីប្រើវាយប្រហារ ឆ្នាំ២០១៣ដែរ។ គឺថា ក្រុមស៊ើបអង្កេតរកឃើញថា មានសារធាតុម្យ៉ាងដែលអភិវឌ្ឈន៍ដោយវិទ្យាស្ថានស្រាវជ្រាវរបស់ស៊ីរី ដើម្បីជួយរដ្ឋាភិបាលលោកអាសាដ។ កាលពីថ្ងៃចន្ទ អ្នកស្រាវជ្រាវ វិទ្យាសាស្ត្រនៅវិទ្យាស្ថានស៊ីរីមួយនេះ ចំនួន២៧១នាក់ ត្រូវបានអាមេរិកដាក់ទណ្ឌកម្ម។
បារាំងសន្និដ្ឋានទៀតថា ព្រឹកថ្ងៃ៤មេសា គឺយន្តហោះកងទ័ពស៊ីរីពិសេសយន្តហោះប្រដេញ Sukhoi 22 ដែលបានចេញពីមូលដ្ឋានអាកាសChayrat ដើម្បីវាយប្រហារភូមិខាន់ ឈែកឃូន ព្រោះមានតែកងទ័ពស៊ីរីទេ ដែលមានមធ្យោបាយវាយប្រហារបែបនេះ។
បារាំងចេញឯកសារស៊ើបអង្កេតចោទរដ្ឋាភិបាលលោកអាសាដ ថ្ងៃពុធនេះ ជាការឆ្លើយតបនឹងលោកអាសាដដែលបានចោទថា ប្រទេសលោកខាងលិចបានប្រឌិដ្ឋរឿងវាយប្រហារដោយអាវុធគីមីថ្ងៃ៤មេសាឡើង ដើម្បីយកលេសវាយប្រហារស៊ីរី។ ផ្នែកចារកិច្ចបារាំងបានអះអាងថា តាំងពីខែមេសា ឆ្នាំ២០១៣មក មានការវាយប្រហារចំនួន៥ នៅស៊ីរី ជាការវាយប្រហារដែលប្រើសារធាតុពុលសារ៉ាំង។
រដ្ឋាភិបាលស៊ីរីតែងរងការចោទប្រកាន់ថា បានប្រើអាវុធគីមីសម្លាប់មនុស្ស។ តែស៊ីរីតែងបដិសេធហើយតែងទំលាក់កំហុសទៅខាងក្រុមឧទ្ទាម។ ការវាយប្រហារដោយអាវុធគីមីថ្ងៃ៤មេសា បានធ្វើអោយអាមេរិកប្រតិកម្មឡើងនៅថ្ងៃ៧មេសា ដោយបានបាញ់មីស៊ីល៥៩ដើម ទៅលើមូលដ្ឋានទ័ពអាកាសស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ