ជម្លោះបូរណភាពសមុទ្រចិន៖ចិនបរិហារតបអាមេរិកនិងជប៉ុនវិញ ថាប្រើសំដីផ្គើន
ចុះផ្សាយនៅថ្ងៃ៖
ស្តាប់ - ០៥:៥៧
ភាពតានតឹងក្នុងជម្លោះបូរណភាពដែនទឹក នៅសមុទ្រចិន បានឡើងដល់កំពូល។ នៅថ្ងៃអាទិត្យនេះ ក្រុងប៉េកាំងបានបរិហារតបតនាយករដ្ឋមន្ត្រីជប៉ុន និងប្រមុខការពារជាតិអាមេរិក ថាបានប្រើពាក្យសំដីផ្គើនចិន ក្នុងរឿងជម្លោះបូរណភាពសមុទ្រចិន។ ប្រមុខការពារជាតិអាមេរិក ឆាក់ ហាហ្កែល និងនាយករដ្ឋមន្ត្រីជប៉ុន ស្ហ៊ីនសូ អាបេ បានចោទថា ចិនធ្វើសកម្មភាពបង្កអស្ថិរភាព នៅសមុទ្រចិន។ លោកហាហ្កែលបន្ថែមថា អាមេរិកនឹងមិននៅស្ងៀមឡើយ បើសណ្តាប់ធ្នាប់អន្តរជាតិរងការគំរាមកំហែង។
ចិនមិនអាចទទួលយកពាក្យចោទប្រកាន់ ពីសំណាក់អាមេរិក និងជប៉ុន ក្នុងជម្លោះបូរណភាពដែនទឹក នៅសមុទ្រចិន
មានវត្តមានក្នុងវេទិកាសន្តិសុខអាស៊ីប៉ាស៊ីហ្វិក នៅសិង្ហបុរី ឧត្តមសេនីយ៍ចិន វ៉ាង គ័នចុង Wang Guanzhong លើកឡើងថា ចិនមិនអាចទទួលយកការប្រកាសរបស់មេដឹកនាំនយោបាយទាំង២នេះឡើយ។ គណប្រតិភូចិនដែលមានវត្តមានក្នុងវេទិកាសន្តិសុខអាស៊ីប៉ាស៊ីហ្វិក ចាត់ទុកការប្រកាសបែបនេះ ទៅនឹងសកម្មភាពផ្គើនប្រឆាំងចិន។ រដ្ឋមន្ត្រីការពារជាតិបារាំង បានអំពាវនាវអោយចិននិងជប៉ុនចេះអត់ធ្មត់នឹងគ្នា ចៀសវាងធ្វើអោយជម្លោះកាន់តែដុនដាបខ្លាំង។
ក្នុងរឿងជម្លោះដែនទឹក នៅសមុទ្រចិនខាងត្បូងនេះ ចិនមិនអាចបណ្តោយអោយអាមេរិក និងជប៉ុន ចោទខ្លួនបានស្រេចតែក្បាលចិត្តទេ ព្រោះថា ចិនគិតថា ខ្លួនចេះអត់ធ្មត់ ចេះគិតដល់ដំណោះស្រាយសន្តិវិធី។ ប្រមុខការពារជាតិអាមេរិក ហ៊ានប្រើពាក្យថា ចិនបង្កអស្ថិរភាពនៅសមុទ្រចិនបែបនេះ ចិនយល់ថា វាមិនមែនការប៉ុនប៉ងរកដំណោះស្រាយទេ តែវាជាសកម្មភាពផ្គើនទៅវិញទេ។ ចិនធ្លាប់ប្រាប់ថា ដំណោះស្រាយក្នុងជម្លោះបូរណភាពដែនទឹកនេះ គេអាចចរចាគ្នារវាងប្រទេសនិមួយៗបាន មិនចាំបាច់ដល់ថ្នាក់ធ្វើអោយក្លាយជាបញ្ហាអន្តរជាតិទេ។ ក្នុងពេលនាយករដ្ឋមន្ត្រីម៉ាឡេស៊ី បំពេញទស្សនកិច្ចនៅចិន ថ្មីៗនេះ ប្រធានាធិបតីស៊ី ជីនពីង ទើបបានសន្យាថា ចិននឹងមិនបង្កភាពវឹកវរ នៅសមុទ្រចិនទេ ដូច្នេះ ប្រើពាក្យចោទចិនថា បង្កអស្ថិរភាព ចិនមិនអាចទប់ចិត្តបានទេ។
គួររំលឹកថា ភាពតានតឹងបានឡើងដល់កំពូលនៅសមុទ្រចិន គឺចាប់ពីដើមខែឧសភាមុននេះមក ពេលចិនបានបោះគ្រឿងចក្រដើម្បីខួងបូមប្រេងនៅបាតសមុទ្រ ក្នុងតំបន់ប្រជុំកោះប៉ារ៉ាសែល ជាប់ជម្លោះជាមួយវៀតណាម។ ដោយសារទង្វើនេះ ប្រជាជនវៀតណាមបានបះបោរធ្វើបាតុកម្មក្នុងស្រុក ប្រឆាំងផលប្រយោជន៍ចិន វាយប្រហាររោងចក្របរទេសជាច្រើន ធ្វើអោយមានមនុស្សរបួសនិងស្លាប់ ក្នុងនោះជនជាតិចិនក៏មានស្លាប់ដែរ។ បន្ទាប់មកចិន ក៏ជម្លៀសប្រជាជនចេញពីវៀតណាម និងព្យួរផែនការពាណិជ្ជកម្មមួយចំនួនជាមួយវៀតណាមផងដែរ។ ដោយសាររឿងនេះ វៀតណាមខូចមុខមាត់សម្រាប់ការវិនិយោគក្នុងស្រុក ប៉ះពាល់ដល់សេដ្ឋកិច្ចជាតិ។
តែនៅម្ខាងទៀតនោះ វៀតណាមចោទចិនថា បានចូលមកឈ្លានពានធ្វើសកម្មភាពបូមប្រេង ក្នុងតំបន់សេដ្ឋកិច្ចផ្តាច់មុខវៀតណាម។ វៀតណាមហ៊ានរហូតគម្រាមប្តឹងចិនទៅតុលាការអន្តរជាតិទៀតផង។ តែចិនហាក់មិនញញើតនឹងការគម្រាមនេះទេ ព្រោះថា សម្រាប់ចិន សកម្មភាពខួងបូមប្រេង នៅបាតសមុទ្រនោះ គ្មានអ្វីខុសច្បាប់អន្តរជាតិទេ។ ចិនសំអាងលើហេតុផលប្រវត្តិសាស្ត្រថា ដែនទឹកមួយចំណែកធំ នៅសមុទ្រចិននេះ គឺជាកម្មសិទ្ធិចិនរាប់រយឆ្នាំ មកហើយ។ ភាពតានតឹងចិន-វៀតណាម បានផ្ទុះជាថ្មីបន្តមកទៀត កាលពីថ្ងៃអង្គារដើមសប្តាហ៍នេះ ពេលទូកនេសាទវៀតណាមបានលិច ដោយសារប៉ះទង្គិចជាមួយទូកចិន នៅមិនឆ្ងាយពីតំបន់ដែលចិនកំពុងខួងបូមប្រេង។
មានហេតុការណ៍តានតឹងថ្មីមួយទៀតដែររវាងចិននិងជប៉ុន គឺថាថ្ងៃសៅរ៍សប្តាហ៍មុន យន្តហោះប្រដេញចិន ២គ្រឿង និងយន្តហោះយោធាជប៉ុនស្ទើរតែបានបើកឆាបគ្នា។ អាមេរិកបានចេញមុខការពារជប៉ុនភ្លាម ដោយព្រមានអោយចិនប្រុងប្រយ័ត្នចំពោះមហិច្ឆតា នៅសមុទ្រចិនខាងកើត។
គួររំលឹកដែរថា សមុទ្រចិនសំបូរធនធានប្រេង និងឧស្ម័ន ដូច្នេះ ប្រទេសជម្លោះនិមួយៗនៅទីនោះ មានដូចជាហ្វីលីពីន តៃវ៉ាន់ រឺក៏ម៉ាឡេស៊ីនោះ ពិតជាចង់បានប្រយោជន៍តែរៀងខ្លួនដូច្នេះហើយ។ ហើយប្រទេសមហាអំណាចធំៗប៉ុណ្ណោះ ដែលហ៊ានក្អេងក្អាងដាក់គ្នា បែបយ៉ាងជប៉ុននិងចិននេះឯង។ ភាពតានតឹងឡើងដល់កំពូលក៏ពិតមែន ប្រទេសនិមួយៗនៅតែប្រកាន់ថា ដោះស្រាយតាមសន្តិវិធី ដូច្នេះ ជម្លោះទឹកដីនេះ វាមិនងាយចប់ទេ។
គ្រប់គ្នាព្រួតគ្នារិះគន់ ចំអកចិន ក្នុងជម្លោះបូរណភាពដែនទឹក ពិសេសអាមេរិកដែលជួយប្រទេសដៃគូនៅអាស៊ី ឈ្លោះជាមួយចិន
ប្រាកដណាស់ អាមេរិកពង្រឹងការគាំទ្រចំពោះប្រទេសដៃគូខ្លួននៅអាស៊ី បែបយ៉ាងជប៉ុន រឺក៏កូរ៉េខាងត្បូង ដើម្បីពង្រីកឥទ្ធិពលខ្លួន និងទប់បន្ថយឥទ្ធិពលចិន។ ម្យ៉ាងទៀត ពេលនេះ ក្នុងសំណុំរឿងអន្តរជាតិក្តៅគគុកផ្សេងៗ អាមេរិកកំពុងប្រឈមជាមួយមហាអំណាចរុស្ស៊ី។ ដូច្នេះ ពេលនេះ អាមេរិកកំពុងភ័យខ្លាចចិនខិតទៅរករុស្ស៊ី។ យើងឃើញថា ចិនក៏មិនខ្លាចនឹងចាប់ដៃរុស្ស៊ី ដើម្បីព្រមានបកទៅអាមេរិកដែរ បែបយ៉ាង កងទ័ពចិននិងរុស្ស៊ីបានធ្វើសមយុទ្ធយោធាជើងទឹកជាមួយគ្នា។
យើងសង្កេតឃើញរឿងរ៉ាវភ័យព្រួយរបស់អាមេរិកនេះច្បាស់ គឺនៅពេលអាមេរិកព្រមានចិន ក្រោយហេតុការណ៍ប៉ះទង្គិចយន្តហោះចិន និងជប៉ុន កាលពី១អាទិត្យមុននេះឯង។ យោងតាមសារព័ត៌មាន យន្តហោះប្រដេញចិន២គ្រឿង បានហោះត្រួតពិនិត្យសមយុទ្ធយោធារវាងចិននិងរុស្ស៊ី នៅភាគខាងជើងសមុទ្រចិនខាងកើត គឺមិនឆ្ងាយពីដែនទឹកជប៉ុនទេ តែយន្តហោះចិនមិនបានចូលក្នុងដែនអាកាសជប៉ុនទេ។ ផ្នែកការពារជាតិចិនថែមទាំងចោទទៅជប៉ុនវិញផងថា យន្តហោះជប៉ុន២គ្រឿងបានចូលមកដែនអាកាសចិន ដោយមិនបានប្រាប់អត្តសញ្ញាណ។ ដូច្នេះ អាចថា យន្តហោះជប៉ុនទាំង២គ្រឿងនេះ ជួយអាមេរិក ដើម្បីមកលួចតាមដានសមយុទ្ធយោធារវាងចិននិងរុស្ស៊ី ក៏ថាបានដែរ។
ពេលវិបត្តិអ៊ុយក្រែនកំពុងពុះកញ្ជ្រោលរាល់ថ្ងៃនេះ មហាអំណាចចិននិងរុស្ស៊ីចាប់ដៃគ្នាផ្នែកយោធា មិនមែនជារឿងល្អសម្រាប់អាមេរិកទេ ពិសេសចិនទើបតែព្រមានថា មិនបង្កភាពវឹកវរមែន តែនឹងប្រតិកម្មតបតទៅនឹងការផ្គើនរបស់ប្រទេសដែលជាប់ជម្លោះ។
បើយើងមើលផ្នែកយោធាចិន៣ឆ្នាំមកនេះទៀតសោត ក្រុងប៉េកាំងបានបង្កើនថវិកាការពារជាតិជាបន្តបន្ទាប់។ ឯអាមេរិកវិញ ចង់កាត់បន្ថយការចាយវាយផ្នែកយោធា ដើម្បីដោះស្រាយវិបត្តិថវិកា។ ដូច្នេះ អាមេរិកចង់មិនចង់ ក៏ញញើតនឹងផ្នែកយោធាចិន ដែលកំពុងតែចាប់ដៃរុស្ស៊ីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ