អារ៉ាប៊ីសាអ៊ូឌីត ធានាថានឹងស្តារសមត្ថភាពផលិតប្រេងឱ្យដល់កម្រិតដើមវិញក្នុងពេលឆាប់ៗ
រដ្ឋមន្ត្រីក្រសួងថាមពលអារ៉ាប៊ីសាអ៊ូឌីត អះអាងថា អារ៉ាប៊ីសាអ៊ូឌីត អាចនឹងស្តារសមត្ថភាពផលិតប្រេងឱ្យកម្រិតដូចដើមវិញ នៅចុងខែវិច្ឆិកាខាងមុខ។ ការធានាអះអាងដូច្នេះ គឺបន្ទាប់ពី រោងចក្របូមប្រេងឆៅដ៏ធំចំនួនពីរកន្លែងរបស់អារ៉ាប៊ីសាអ៊ូឌីត ត្រូវរងការវាយប្រហារ កាលពីសប្តាហ៍មុន។ ក្រោយការវាយប្រហារទៅលើរោងចក្រនេះ, ពិភពលោកកំពុងតែជ្រួលច្របល់ ដ្បិតការផលិតប្រេងរបស់អារ៉ាប៊ីសាអ៊ូឌីត ធ្លាក់ចុះពាក់កណ្តាល ហើយការនាំចេញទៅកាន់ប្រទេសអ្នកប្រើប្រាស់លើលោក ធ្លាក់ចុះចំនួនប្រមាណ៦ភាគរយ។
ចុះផ្សាយនៅថ្ងៃ៖ កែប្រែថ្ងៃទី៖
«ពីរបីថ្ងៃចុងក្រោយនេះ អារ៉ាប៊ីសាអ៊ូឌីត បានប្រឹងប្រែងស្តារផលិតកម្មប្រេង ដោយបានស្រោចស្រង់មកឡើងវិញ បានចំនួនពាក់កណ្តាលនៃការខាតបង់។» នេះជាបន្ទូលរបស់ព្រះអង្គម្ចាស់ Abdel Aziz ben Salman ដែលបានថ្លែងបញ្ជាក់ នៅក្នុងសន្និសីទសារព័ត៌មាន ពីកំពង់ផែដឹកប្រេង ជីដដាហ៍ (Jeddah) នៅភាគខាងលិចប្រទេស។
ព្រះអង្គរដ្ឋមន្ត្រីក្រសួងថាមពលអារ៉ាប៊ីសាអ៊ូឌីតរូបនេះ អះអាងទៀតថា «បើដំណើរការស្រោចស្រង់ការផលិតប្រេងនេះ ដំណើរការល្អតទៅទៀត នោះរាជាណាចក្រអារ៉ាប៊ីសាអ៊ូឌីត នឹងអាចផលិតប្រេងបាន ១១លានធុងបារិលក្នុងមួយថ្ងៃ នៅចុងខែកញ្ញានេះ ហើយនៅចុងដំណាច់ខែវិច្ឆិកាខាងមុខ គឺអាចផលិតបាន ១២លានធុងបារិសក្នុងមួយថ្ងៃៗ ដូចដើមវិញ»។
គួររម្លឹកថា ប្រទេសមហាសេដ្ឋីប្រេងមួយនេះ បានរងការវាយប្រហារដោយយន្តហោះឌ្រូន ទៅលើរោងចក្រប្រេង ចំនួនពីរកន្លែង កាលពីថ្ងៃទី១៤កញ្ញា សប្តាហ៍មុន។ ហេតុការណ៍នេះបង្កក្តីព្រួយបារម្ភខ្លាំងដល់ប្រទេសអ្នកនាំចូលប្រេងសម្រាប់ប្រើប្រាស់។ ប្រទេសខ្លះ បានពិចារណាយកប្រេងដែលជាស្តុករក្សាទុករបស់ខ្លួនប្រើប្រាស់បណ្តោះអាសន្នសិន។ បារាំង អង់គ្លេស អាល្លឺម៉ង់ ចិន បានស្នើឱ្យមានយន្តការដោះស្រាយរួមមួយ ដើម្បីឆ្លើយតបនឹងសភាពការណ៍។ សហរដ្ឋអាមេរិករបស់លោក ដូណាល់ ត្រាំ បានចង្អុរមុខប្រទេសអ៊ីរ៉ង់ ជាគូបដិបក្ខ ថាជាអ្នកនៅពីក្រោយអំពើវាយប្រហារនេះ។
ក៏ប៉ុន្តែ អ៊ីរ៉ង ថាក្រុមឧទ្ទាមហួតទីទេ ជាអ្នកវាយប្រហារជង្រុកប្រេងនោះ ហើយក្រុមឧទ្ទាមហួតទី ក៏បានអះអាងដោយខ្លួនឯងដែរ ថានោះជាស្នាដៃរបស់ខ្លួន។ ទន្ទឹមនេះ អ៊ីរ៉ង់ ដែលជាសម្ព័ន្ធមិត្តរបស់ក្រុមឧទ្ទាមនេះ ក៏ព្រលយពាក្យឌឺដងដល់ អារ៉ាប៊ីសាអ៊ូឌីត ដែលជាគូសត្រូវ ថា«ឱ្យចេះរៀនទាញយក បទពិសោធពីព្រឹត្តិការណ៍វាយប្រហារនេះផង»។
ពីប្រទេសបារាំងវិញ លោកប្រធានាធិបតីវ័យក្មេង អេម៉ាណុយអែល ម៉ាក្រុង បានហៅទូរសព្ទផ្ទាល់ទៅកាន់ព្រះរាជាអារ៉ាប៊ីសាអ៊ូឌីត ហើយបារាំងបានសន្យាថានឹងបញ្ជូនអ្នកជំនាញបច្ចេកទេសទៅជួយចូលរួមស៊ើបអង្គេត ពីហេតុការណ៍វាយប្រហារដោយយន្តហោះឌ្រូននោះ។ អាមេរិកវិញ របស់លោក ដូណាល់ ត្រាំ ក៏បានបញ្ជូនប្រមុខការទូត ទៅពីកំពង់ផែដឹកប្រេង ជីដដាហ៍ ដើម្បីរិះរកវិធីសាស្ត្រដោះស្រាយ និងរកមធ្យោបាយដើម្បីវាយបក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ