អ.ស.ប. ព្រួយបារម្ភខ្លាំងពីការរំលោភសិទ្ធិមនុស្ស នៅភាគខាងត្បួងហ្វីលីពីន
ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ បានថ្លែងពីថ្ងៃ២៨ធ្នូនេះថា ការអនុវត្តច្បាប់អាជ្ញាសឹក នៅកោះមិនដាណាវ គឺរំលោភសិទ្ធិមនុស្សធ្ងន់ធ្ងរ។ ច្បាប់អាជ្ញាសឹក ដែលដាក់ចេញដោយ ប្រធានាធិបតី រូឌ្រីហ្គោ ឌុយទែរតេ (Rodrigo Duterte) និងដែលបានអនុវត្តជាង៥ខែមកនេះ បានសម្លាប់មនុស្សជាង១ ១០០ នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
មានការអនុវត្តទង្វើឃោរឃៅជាច្រើនទៅលើក្រុមមនុស្សកាន់សាសនាអ៊ីស្លាម ដែលរស់នៅលើកោះ មិនដាណាវ ភាគខាងត្បូងហ្វីលីពីន។ ពលរដ្ឋកាន់សាសនាអ៊ីស្លាម ត្រូវអាជ្ញាធរជម្លៀសខ្លួនឲ្យទៅរស់នៅក្នុងសហគមន៍ផ្សេង។ ហើយក្នុងចំណោមអ្នកស្លាប់ ទាំងជាង១ពាន់នាក់នោះ មានមួយចំនួនធំ គឺជាសកម្មជនការពារសិទ្ធិមនុស្សផង។ ទាំងនេះគឺយោងទៅតាមការពន្យល់ពីមន្ត្រីជំនាញរបស់ក្រុមប្រឹក្សាសិទ្ធិមនុស្សនៃអង្គការសហប្រជាជាតិ។
ការបំពានសិទ្ធិមនុស្សនេះ ត្រូវបានអង្គការសហប្រជាជាតិ ថ្លែងក្តីព្រួយបារម្ភជាខ្លាំង ព្រោះថាការរំលោភបំពានសិទ្ធិមនុស្សធ្ងន់ធ្ងរបែរនេះ បានបង្កការខូតខាតយ៉ាងច្រើនសម្បើម ដែលគ្មានផ្លូវនឹងអាចជួសជុលមកវិញបានឡើយ។
ច្បាប់អាជ្ញាសឹក របស់ហ្វីលីពីន បានផ្តល់អំណាចយ៉ាងខ្លាំងដល់កម្លាំងអាជ្ញាធរ ដើម្បីកម្ទេចពួកអង្គការរដ្ឋអ៊ីស្លាមជីហាដ នៅលើកោះមិនដាណាវ។ លោកប្រធានាធិបតីហ្វីលីពីន យល់ថា កោះមិនដាណាវ និង ទីក្រុង ម៉ារ៉ាវី គឺជាជង្រុករបស់ពួកភេរវជន ជាបណ្តុំក្រុមអ៊ីស្លាមដែលនិយមប្រើអំពើហិង្សា និងជាសំបុកពួកប្រដាប់អាវុធកុំម្មុយនីស។ ហេតុដូច្នេះហើយ គឺត្រូវតែមានវិធានការតឹងរឹងសម្រាប់ទប់ទល់ពួកនេះ។
សូមបញ្ជាក់ថា ច្បាប់អាជ្ញាសឹក ដែលដាក់ចេញដោយ លោក ឌុយទែរតេ តាំងពីខែឧសភានោះ គឺក្រោយពីពួកជីហាដបានឈ្លានពានចូលគ្រប់គ្រងទីក្រុង ម៉ារ៉ាវី តែទីបំផុត ត្រូវបានលោក ឌុយទែរតេ ចេញបញ្ជាឲ្យធ្វើប្រតិបត្តិការយោធាកម្ទេចចោល។
យ៉ាងណាក៏ដោយ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ នៅតែសម្តែងក្តីព្រួយបារម្ភ។ បារម្ភព្រោះខ្លាចក្រែងច្បាប់អាជ្ញាសឹកនេះ នៅតែបន្តអូសបន្លាយការអនុវត្តរហូតដល់ដាច់ឆ្នាំ២០១៨ថែមទៀត ដែលនេះ នឹងកាន់តែធ្វើឲ្យយោធាប្រើថ្នាំខ្លាំងទៅលើប្រជាពលរដ្ឋស្លូតត្រង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ