ហ្វីលីពីនចង់ឲ្យកងទ័ពជប៉ុនប្តូរពីស្វ័យការពារ មកអាចអន្តរាគមក្នុងជម្លោះតំបន់
ហ្វីលីពីននឹងគាំទ្រគំនិតរដ្ឋាភិបាលជប៉ុន ដែលចង់បោះបង់ចោលធម្មនុញ្ញសន្តិភាព ដែលជប៉ុនបានអនុវត្ត ចាប់តាំងពីចប់សង្គ្រាមលោកលើកទីពីរ។ រដ្ឋធម្មនុញ្ញជប៉ុនដែលបានចែងមិនឲ្យជប៉ុនប្រើសព្វាវុធ ឬអាវុធនុយក្លេអ៊ែរ ដើម្បីយកទៅធ្វើសង្គ្រាមជាមួយប្រទេសដទៃ។ ជំហរយ៉ាងដូច្នេះរបស់ហ្វីលីពីនត្រូវបានគេលឺចេញពីមាត់របស់រដ្ឋលេខាធិការក្រសួងការបរទេសហ្វីលីពីន ក្នុងបទសម្ភាសន៍មួយ ជាមួយកាសែតThe Financial Times ចេញផ្សាយនៅថ្ងៃចន្ទនេះ។
ចុះផ្សាយនៅថ្ងៃ៖
ស្តាប់ - ០២:១១
រដ្ឋាភិបាលហ្វីលីពីនសុខចិត្តចេញមុខ គំាទ្រ ជប៉ុន ដែលជាអតីតសត្រូវរបស់ខ្លួន ឲ្យ លុបចោលនូវធម្មនុញ្ញសន្តិភាព ដែលជប៉ុនចាប់អនុវត្ត ចាប់តាំងពីជប៉ុនចាញ់ ក្នុងសង្រ្គាមលោកលើកទីពីរមក។ បើតាម រដ្ឋលេខាធិការនៃក្រសួងការបរទេសហ្វីលីពីន ជប៉ុនគួរតែដំឡើងតួនាទីកងទ័ពរបស់ខ្លួន ពីស្វ័យការពារ មកអាចអន្តរាគម ឬលូកដៃដោយសេរី ក្នុងជម្លោះ នៅក្នុងតំបន់។ ក្នុងន័យនេះ គឺ ហ្វីលីពីនមានចេតនាចង់ឲ្យជប៉ុនអាចមានសិទ្ធិលូកដៃក្នុងជម្លោះ នៅសមុទ្រចិនភាគខាងត្បូង បើទោះជាជប៉ុនមិនមែនជាភាគីជម្លោះក៏ដោយ។ សម្រាប់ហ្វីលីពីន ដែលកំពុងមានជម្លោះដណ្តើមកោះជាមួយចិន នៅសមុទ្រចិនភាគខាងត្បូង មានតែសព្វាវុធជប៉ុនទេ ដែលអាចប្រជែងកម្លាំង ទប់ទល់ជាមួយចិនបាន។
គួររំលឹកឡើងវិញបន្តិចថា នៅសម័យសង្រ្គាមលោកលើកទីពីរ ជប៉ុនធ្លាប់ចូលកាន់កាប់ ហ្វីលីពីននៅឆ្នាំ ១៩៤១។ ក្នុងរយៈពេលកាន់កាប់៣ឆ្នាំ ជនសង្ស័យថា ជាឧទ្ទាមទ័ពព្រៃត្រូវទាហានជប៉ុនសម្លាប់ និងធ្វើទារុណកម្ម ចំណែកស្រ្តីហ្វីលីពីន មួយចំនួនត្រូវទាហានជប៉ុនចាប់យកទៅធ្វើជាស្រ្តីបម្រើតណ្ហា។ ហើយតាមអ្នកប្រវត្តិសាស្រ្តហ្វីលីពីន ប្រជាជនស៊ីវិលហ្វីលីពីនយ៉ាងតិចមួយលាននាក់បានស្លាប់នៅក្នុង សម័យសង្រ្គាមលោកលើកទីពីរ។
ដោយពិតទៅ ការលើកឡើងរបស់មន្រ្តីរដ្ឋាភិបាលហ្វីលីពីនបានធ្វើឡើង នៅតែប៉ុន្មានថ្ងៃមុនការបោះឆ្នោតសភាជាតិជប៉ុន ដែលត្រូវធ្វើ នៅថ្ងៃទី ១៦ធ្នូខាងមុខ។ ការស្ទង់មតិបានបង្ហាញថា គឺប្រធានបក្សប្រឆាំង លោកShinzo Abe ដែលមានប្រជាប្រិយភាពខ្លាំង នឹងអាចឈ្នះឆ្នោត ឡើងធ្វើជាអនាគតនាយករដ្ឋមន្រ្តីជប៉ុន។ កាលពីឆ្នាំ ២០០៧ លោក Shinzo Abe ដែលកាន់តំណែងជានាយករដ្ឋមន្រ្តីជប៉ុន បានស្នើឲ្យគេសើរើលើធម្មនុញ្ញសន្តិភាព ឡើងវិញ។
សូមបញ្ជាក់ថា រដ្ឋធម្មនុញ្ញសន្តិភាពត្រូវបានអាមេរិក តម្រូវឲ្យរដ្ឋាភិបាលបង្កើត និងចាប់អនុវត្ត នៅឆ្នាំ ១៩៤៧ គឺនៅក្រោយពេលដែលជប៉ុនបានចាញ់សង្រ្គាមលោកលើកទីពីរ។ កាលណោះ លោកAbe ធ្លាប់បានចាត់ទុកធម្មនុញ្ញសន្តិភាពថា មិនស្របនឹងស្ថានភាពនយោបាយអន្តរជាតិបច្ចុប្បន្ន ព្រោះវាតម្រូវឲ្យជប៉ុនផលិតអាវុធ ដើម្បីធ្វើស្វ័យការពារខ្លួន ប៉ុន្តែ ជប៉ុនមិនអាចយកអាវុធទៅវាយប្រហារប្រទេសណាផ្សេងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ