រដ្ឋាភិបាលហ្វីលីពីនចាត់វិធានការបង្ការទុកមុនបានល្អ ដើម្បីប្រឈមទប់នឹងព្យុះសង្ឃរាហាហ្គ៊ូពីត (Hagupit)
ចុះផ្សាយនៅថ្ងៃ៖
ស្តាប់ - ០៥:៣១
បន្ទាប់ពីបានទៅដល់នៅយប់ថ្ងៃសៅរ៍ ខ្យល់ព្យុះសង្ឃរាហាហ្គ៊ូពីត (Hagupit) បានបោកបក់ឆ្លងកាត់ប្រទេសហ្វីលីពីនសឹងតែទំាងស្រុងនៅថ្ងៃអាទិត្យ ទី៧ ធ្នូនេះ។ ជាមួយនឹងភ្លៀងធ្លាក់ខ្លំាងក្លា និងខ្យល់ក្នុងល្បឿនជាង ២០០គីឡូម៉ែត្រក្នុងមួយម៉ោង ហាហ្គ៊ូពីតបានបង្កឲ្យមានការខូចខាតទ្រព្យសម្បត្តិយ៉ាងដំណំ មកដល់ពេលនេះ រដ្ឋអំណាចក្នុងស្រុកមួយដែលបានរងគ្រោះដោយខ្យល់ព្យុះសង្ឃរាហាហ្គ៊ូពីត (Hagupit) បានប្រកាសឲ្យដឹងថា មានមនុស្សស្លាប់ ៤នាក់ តែរដ្ឋាភិបាលនៅមិនទាន់បានបញ្ជាក់ពីព័ត៌មាននោះទេ។ យ៉ាងណាក៏ដោយ រដ្ឋអំណាចបានធ្វើការជម្លៀសប្រជាជនជាច្រើនពាន់នាក់ទៅដាក់នៅទីកន្លែងសុវត្ថិភាព។
មួយថ្ងៃ មុននឹងខ្យល់ព្យុះសង្ឃរាហាហ្គ៊ូពីត (Hagupit) បានធ្វើដំណើរទៅដល់ទឹកដីហ្វីលីពីននៅយប់ថ្ងៃសៅរ៍ ទី៦ ធ្នូ ហាហ្គូពីតត្រូវបានគេចាត់ចំណាត់ថ្នាក់ទី៥ មានន័យថាជាខ្យល់ព្យុះដែលមានឥទ្ធិពលខ្លំាងផុតលេខ។ តែចំណាត់ថ្នាក់នោះត្រូវបានគេទម្លាក់មកនៅទី៣ វិញ ដោយសារតែឥទ្ធិពលរបស់វាបានចុះខ្សោយបន្តិច។ តែហាហ្គូពីតនៅតែជាខ្យល់ព្យុះសង្ឃរាដែលមានហានិភ័យខ្ពស់ ព្រោះហាហ្គូពីតមានវិជ្ជមាត្រទំហំ ៦០០គីឡូម៉ែត្រ ដោយបាននំាមកជាមួយនូវភ្លៀងធ្លាក់យ៉ាងខ្លំាងក្លា និងខ្យល់បោកបក់ក្នុងល្បឿនជាង ២០០គីឡូម៉ែត្រក្នុងមួយម៉ោង។ ហាហ្គូពីតបានបំផ្លាញបណ្តាញភ្លើងអគ្គិសនីនៅតាមផ្លូវ លំដ្ឋានប្រជាជន ព្រមទំាងបំបាក់ដើមឈើ ក៏ដូចជាអូសទាញជាមួយវានូវរបស់របរនៅតាមទីធ្លាសាធារណៈ។ ជាមួយនឹងវិជ្ជមាត្រទំហំ ៦០០គីឡូម៉ែត្រ ហាហ្គូពីតបានបោកបក់ឆ្លងកាត់ខេត្តចំនួន៥៥ ក្នុងចំណោមខេត្តទំាង ៨៥ ព្រមទំាងបានបង្កគ្រោះថ្នាក់ដល់ប្រជាជនហ្វីលីពីនជិត ៥០លាននាក់ក្នុងចំណោមប្រជាជនសរុបប្រមាណជា ១០០លាននាក់។ ខណៈនេះ ហាហ្គូពីតកំពុងបន្តដំណើររបស់វាដោយឆ្លងកាត់ខេត្តមួយចំនួន និងគ្រោងធ្វើដំណើរទៅដល់ទីក្រុងម៉ានីលនៅថ្ងៃចន្ទ ទី៨ ធ្នូ រួចត្រូវចេញពីហ្វីលីពីនតម្រង់ទៅសមុទ្រចិនខាងត្បូងនៅថ្ងៃអង្គារ ឬក៏ព្រឹកថ្ងៃពុធ ទី១០ ធ្នូ។
រដ្ឋាភិបាលបានចាត់វិធានការបង្ការទុកមុនសម្រាប់ខ្យល់ព្យុះសង្ឃរាហាហ្គូពីត
ក្រៅពីការបំផ្លាញទ្រព្យសម្បត្តិយ៉ាងដំណំ ខ្យល់ព្យុះសង្ឃរាហាហ្គ៊ូពីតមិនបានបង្កគ្រោះថ្នាក់សម្លាប់ជីវិតមនុស្សដូចខ្យល់ព្យុះសង្ឃរាហាយ៉ានកាលពីឆ្នំា ២០១៣ដែលបណ្តាលឲ្យមានមនុស្សស្លាប់ជាង ៧ ០០០នាក់ និងមានជនរងគ្រោះ ៤លាននាក់ផ្សេងទៀត។ នេះអាចថា មកពីហាហ្គូពីតមានឥទ្ធិពលខ្សោយជាងហាយ៉ាន។ តែយ៉ាងណាក៏ដោយ ហេតុផលដែលសំខាន់នោះ គឺមកពីរដ្ឋាភិបាលបានចាត់វិធានការបង្ការទុកជាមុនបានល្អណាស់សម្រាប់ព្យុះសង្ឃរាហាហ្គូពីតពេលនេះ។ តំាងពីមុនការមកដល់របស់ហាហ្គូពីត រដ្ឋអំណាចហ្វីលីពីនបានជម្លៀសប្រជាជនជិត ១លាននាក់ចេញពីតំបន់ដែលគេដឹងមុន យកទៅដាក់ទីកន្លែងសុវត្ថិភាព។
លោកណាវីដាដ មន្រ្តីរបស់អង្គការអន្តរជាតិទទួលបន្ទុកជនបន្លាស់ទីបានអះអាងថាឆ្នំានេះ រដ្ឋាភិបាលទីក្រុងម៉ានីលបានចាត់វិធានគ្រប់បែបយ៉ាងជាមុន ដើម្បីបញ្ជៀសសោកនាដកម្មដូចឆ្នំាទៅមិញ។
« ក្នុងកម្រិតរដ្ឋអំណាចតំបន់ គេអាចនិយាយបានថា គឺមានការចាត់វិធានការបានល្អណាស់។ រដ្ឋអំណាចបានដឹងជាមុននូវតំបន់ ឬទីកន្លែងណាដែលខ្យល់ព្យុះសង្ឃរាហាហ្គូពីតត្រូវឆ្លងកាត់ ក៏ដូចជាទីកន្លែងសុវត្ថិភាពដើម្បីជម្លៀសប្រជាជនទៅដាក់ទីនោះ។ នេះហើយជាភាពខុសគ្នានឹងឆ្នំា ២០១៣។ មួយវិញទៀត មន្រ្តីរដ្ឋអំណាចក្នុងតំបន់ក៏បានត្រៀមទុកជាមុននូវជំនួយគ្រប់បែបយ៉ាងចំពោះជនរងគ្រោះ។ រដ្ឋអំណាចបានត្រៀមទុករួចជាស្រេចនូវទីកន្លែងគ្រប់គ្រាន់ដើម្បីទទួលទទួលជនរងគ្រោះ។ ជាទូទៅ គឺនៅតាមសាកលវិទ្យាល័យ កន្លែងហាត់កីឡា ឬមួយក៏អាគាររដ្ឋាភិបាលជាដើម »
រៀងរាល់ឆ្នំា ហ្វីលីពីនរងគ្រោះព្យុះសង្ឃរាជាមធ្យមចំនួន ២០ដង
ហ្វីលីពីនដែលមានប្រជាជនរស់នៅប្រមាណជា ១០០លាននាក់ និងជាប្រទេសកំពុងអភិវឌ្ឍន៍មួយនៅអាស៊ីត្រូវបានគេចាត់ទុកជាប្រទេសដែលទទួលរងគ្រោះថ្នាក់ខ្លំាងដោយខ្យល់ព្យុះសង្ឃរា ព្រមទំាងទឹកជំនន់សម្លាប់មនុស្សយ៉ាងច្រើន។ ជារៀងរាល់ឆ្នំា ហ្វីលីពីនបានរងគ្រោះដោយខ្យល់ពុះសង្ឃរាជាមធ្យមចំនួន ២០ដង។ ខ្យល់ព្យុះ ៣ឆ្នំាចុងក្រោយបានសម្លាប់មនុស្សជាង ១០ ០០០នាក់។ ក្នុងខែធ្នូ ឆ្នំា ២០១១ ខ្យល់ពុះសង្ឃរាឈ្មោះវ៉ាស្ហ៊ីបានសម្លាប់ប្រជាជនហ្វីលីពីន ១ ២៦៨នាក់ ក្នុងខែធ្នូ ឆ្នំា ២០១២ ខ្យល់ពុះសង្ឃរាឈ្មោះបុប្ផាបានសម្លាប់ប្រជាជនហ្វីលីពីនជាង ១ ៩០០នាក់ ក្នុងខែវិច្ឆិកា ឆ្នំា ២០១៣ ខ្យល់ពុះសង្ឃរាឈ្មោះហាយ៉ានបានសម្លាប់ប្រជាជនហ្វីលីពីនជាង ៧ ៣៥០នាក់។
សម្រាប់ក្រុមអ្នកវិទ្យាសាស្រ្ត វ៉ាស្ហ៊ី បូប្ផា និងហាយ៉ាន ជាខ្យល់ពុះសង្ឃរាដែលបានសម្លាប់មនុស្សច្រើនជាងគេនៅក្នុងលោកនារយៈពេល ៣ឆ្នំាចុងក្រោយនេះ ព្រមទំាងបានទម្លាក់កំហុសលើការផ្លាស់ប្តូរអាកាសធាតុក្នុងលោក ពោលគឺជាកំហុសរបស់មនុស្សលោកតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ