ហ្វីលីពីនទាមទារឲ្យចិនគោរពសេចក្តីសម្រេចតុលាការក្រុងឡាអេ
ចាប់តាំងពីតុលាការអាជ្ញាកណ្តាលក្រុងឡាអេចេញសេចក្តីសម្រេចរបស់ខ្លួនមក គេសង្កេតឃើញថា ហ្វីលីពីនដែលជាអ្នកឈ្នះហាក់ព្យាយាមបង្ហាញនូវជំហរទន់ភ្លន់ច្រើនចំពោះចិន។ ក៏ប៉ុន្តែ នៅថ្ងៃព្រហស្បតិ៍នេះ រដ្ឋាភិបាលក្រុងម៉ានីលបានចាប់ផ្តើមដំឡើងសំឡេងឡើងវិញ ដោយបានទាមទារឲ្យចិនគោរពតាមសេចក្តីសម្រេចរបស់តុលាការ ហើយថានឹងលើកយកបញ្ហានេះនៅក្នុងជំនួបកំពូលអាស៊ី-អឺរ៉ុប ដែលនៅបើកធ្វើនៅក្នុងប្រទេសម៉ុងហ្គោលី នៅថ្ងៃសុក្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
នៅក្រោយពេលដែលតុលាការអាជ្ញាកណ្តាលក្រុងឡាអេចេញសេចក្តីសម្រេច កាលពីថ្ងៃអង្គារ គេសង្កេតឃើញមានឥរិយាបថផ្ទុយគ្នាស្រឡះ រវាងចិន និងហ្វីលីពីន។
ចិនបានបញ្ចេញប្រតិកម្មទាំងកំហឹង ដោយបានបញ្ជាក់ថា ខ្លួននឹងមិនគោរពតាមសេចក្តីសម្រេចរបស់តុលាការ ព្រមទាំងបានព្រមានដល់ប្រទេសជាប់ជម្លោះកុំឲ្យប្រែរុញតំបន់សមុទ្រចិនខាងត្បូងទៅក្នុងភ្នក់ភ្លើងសង្រ្គាម។
ហ្វីលីពីនវិញគ្រាន់តែបានបង្ហាញនូវការពេញចិត្តចំពោះសេចក្តីសម្រេចរបស់តុលាការ ដោយមិនប្រកាសជោគជ័យលើចិន ហើយក៏មិនបានទាមទារឲ្យចិនគោរពសេចក្តីសម្រេចនេះដែរ។ ឥរិយាបថនេះ គឺស្របទៅនឹងជំហររបស់លោកឌុយទែរតេ ប្រធានាធិបតីថ្មីរបស់ហ្វីលីពីន ដែលចាប់តាំងពីបានឡើងកាន់តំណែងមក បានបង្ហាញនូវជំហរទន់ភ្លន់ចំពោះចិន ទាក់ទងនឹងសមុទ្រចិនខាងត្បូងនេះ។
ក៏ប៉ុន្តែ អ្វីៗហាក់មានការប្រែប្រួលទៅវិញ ដោយនៅថ្ងៃព្រហស្បតិ៍នេះ ក្រសួងការបរទេសហ្វីលីពីនបានចេញផ្សាយសេចក្តីប្រកាសព័ត៌មានមួយទាមទារឲ្យចិនគោរពទាមសេចក្តីសម្រេចតុលាការក្រុងឡាអេ ហើយថា ហ្វីលីពីននឹងលើកយកបញ្ហានេះទៅជជែក នៅក្នុងជំនួបកំពូលអាស៊ី-អឺរ៉ុប ដែលនឹងបើកធ្វើនៅក្នុងប្រទេសម៉ុងហ្គោលី នៅថ្ងៃសុក្រ និងថ្ងៃសៅរ៍ខាងមុខនេះ ហើយដែលចិនក៏មានវត្តមាននៅក្នុងនោះផងដែរ។ ក៏ប៉ុន្តែ រដ្ឋាភិបាលក្រុងប៉េកាំងធ្លាប់បានលើកឡើងតាំងពីថ្ងៃចន្ទថា បញ្ហាជម្លោះសមុទ្រចិនខាងត្បូង មិនគួរត្រូវយកទៅជជែកនៅក្នុងជំនួបកំពូលអាស៊ី-អឺរ៉ុបនោះទេ។
គួរបញ្ជាក់ថា តាំងពីដើមរៀងមក ចិនតែងតែជំទាស់ដាច់ខាតមិនឲ្យលើកយកជម្លោះសមុទ្រចិនខាងត្បូងនេះ ទៅជជែកនៅក្នុងកិច្ចប្រជុំពហុភាគីណាមួយនោះទេ ដោយទាមទារដោះស្រាយនៅក្នុងក្របខ័ណ្ឌទ្វេភាគីដាច់ដោយឡែកជាមួយនឹងភាគីជម្លោះនីមួយៗ។ ដូច្នេះ ការណ៍ដែលហ្វីលីពីនព្យាយាមលើកយកបញ្ហានេះនៅក្នុងជំនួបកំពូលអាស៊ី-អឺរ៉ុបខាងមុខនេះ ប្រាកដជានឹងធ្វើឲ្យចិនខឹងសម្បារទៀតជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ