ប៉ូលីសចរាចរណ៍ក្នុងទីក្រុងភ្នំពេញផ្តើមផាកពិន័យជាថ្មី ៣ខែក្រោយការបោះឆ្នោត
ក្រោយការបោះឆ្នោតកាលពីថ្ងៃទី ២៨កក្កដា ប៉ូលីសចរាចរណ៍ ដែលធ្លាប់តែដាក់ប៉ុស្តិ៍ផាកពិន័យ នៅតាមកន្លែងមួយចំនួន ក្នុងទីក្រុងភ្នំពេញ បានផ្អាកសកម្មភាពមួយរយៈ។ ប៉ុន្តែ នៅក្នុងពេលថ្មីៗនេះ ប៉ូលីសបានវិលមកផាកពិន័យ នៅកន្លែងដែលគេធ្លាប់ផាកដូចដើមវិញហើយ។ ការផ្តើមរឹតបន្តឹងសណ្តាប់ធ្នាប់ចរាចរណ៍ឡើងវិញ ត្រូវបានគេពន្យល់ថា ស្ថានការណ៍នយោបាយហាក់មានភាពប្រសើរឡើងវិញបន្តិចម្តងៗ ដែលអាចឲ្យគេអនុវត្តច្បាប់ចរាចរណ៍បានឡើងវិញ។
ចុះផ្សាយនៅថ្ងៃ៖
ស្តាប់ - ០១:៥១
បីខែក្រោយការបោះឆ្នោត ប៉ូលីសចរាចរណ៍ចាប់ផ្តើមផាកពិន័យអ្នកបើកបរយាន្តជំនិះគ្រប់ប្រភេទក្នុងទីក្រុងភ្នំពេញ វិញហើយ។ លោក ចេវ ហាក់ នាយការិយាល័យនគរបាលចរាចរណ៍ផ្លូវគោករាជធានីភ្នំពេញបានប្រាប់វិទ្យុបារាំងអន្តរជាតិនៅព្រឹកថ្ងៃសុក្រនេះថា ការវិលមករឹតបន្តឹងសណ្តាប់ធ្នាប់ចរាចរណ៍ជាថ្មីក្រោយថ្ងៃបោះឆ្នោតនេះ គឺព្រោះតែស្ថានភាពនយោបាយបច្ចុប្បន្នមានភាពធូរស្រាលមិនដូចក្នុងអំឡុងពេលទើបបោះឆ្នោតរួចនោះឡើយ។
លោក ចែវ ហាក់ បានឲ្យដឹងទៀតថា មូលហេតុដែលនាំឲ្យប៉ូលិសផ្អាកការផាកពិន័យ ក្នុងអំឡុងពេលកន្លងទៅក៏ព្រោះតែកងកម្លាំងសមត្ថកិច្ចជាប់រវល់ការពារសន្តិសុខ សណ្តាប់ធ្នាប់ក្នុងទីក្រុង ខណៈដែលគណបក្សប្រឆាំងធ្វើមហាបាតុកម្ម និងកូដកម្មផ្សេងៗទៀត។ លោក ចែវ ហាក់ បានបន្តថា រហូតមកដល់ពេលនេះ ក៏នៅតែមានការពង្រឹងកងកម្លាំង នៅតាមកន្លែងខ្លះៗ ដើម្បីត្រួតពិនិត្យពីភាពប្រែប្រួលគ្រប់យ៉ាង ដែលអាចកើតមានផងដែរ។
មន្ត្រីប៉ូលិសចរចារណ៍ដដែល បានបន្ថែមថាប្រជាជនក្នុងពេលបច្ចុប្បន្ន បានយល់ដឹងច្រើនពីច្បាប់ចរាចរណ៍ ដូច្នេះទើបការផាកពិន័យមិនបានធ្វើជាទ្រង់ទ្រាយធំដុំ ដូចកាលពីមុន។ ប៉ុន្តែ ប៉ូលីសចរាចរណ៍ផ្លូវគោក នៅតែបន្តអនុវត្តច្បាប់នេះ រហូតប្រជាជនចេះគោរពច្បាប់ ឲ្យបានគ្រប់ៗគ្នា។
យ៉ាងណាក៏ដោយ ការបន្ធូរបន្ថយផ្នែកសណ្តាប់ធ្នាប់មួយរយៈនេះត្រូវបានមជ្ឈដ្ឋានខ្លះយល់ថាជាការកាត់បន្ថយការខឹងសម្បាររបស់មហាជនចំពោះសមត្ថកិច្ចតែប៉ុណ្ណោះ។
មានការរិះគន់ថា ការអនុវត្តច្បាប់គ្រប់ប្រភេទគួរតែធ្វើគ្រប់ពេលវេលាដោយមិនត្រូវលើកលែងតាមកាលៈទេសៈឡើយ។
សូមបញ្ជាក់ថា គិតត្រឹមរយៈពេល ៩ខែ ក្នុងឆ្នាំ ២០១៣ នៅទីក្រុងភ្នំពេញ គ្រោះថ្នាក់ចរណ៍បានកើតឡើង ៥១៥ករណី បណ្តាលឲ្យមនុស្សស្លាប់ ២០៣ នាក់។ ក្នុងពេលថ្មីៗ សាលារាជធានីភ្នំពេញ ក៏បានចេញសេចក្តីជូនដំណឹងមួយ ហាមឃាត់មិនឲ្យរថយន្តដឹកជញ្ជូនទំនិញធន់ធ្ងន់ចរាចរណ៍ ចេញ-ចូល ក្នុងទីក្រុងភ្នំពេញ ចាប់ពីម៉ោង ៥ព្រឹក រហូតដល់ម៉ោង ៩យប់។ បំរាមនេះចាប់ផ្តើមអនុវត្តពីថ្ងៃទី១វិច្ឆិកានេះផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ