បេក្ខជនចាញ់ឆ្នោតប្រធានាធិបតីប្តឹងតវ៉ាទៅតុលាការធម្មនុញ្ញ
នៅថ្ងៃពុធ ទី ២៣កក្កដា គឺនៅមួយថ្ងៃក្រោយប្រកាសលទ្ធផលបោះឆ្នោត របស់គណៈកម្មាធិការបោះឆ្នោតក្នុងទីក្រុងហ្សាកាតា បេក្ខជនចាញ់ឆ្នោត លោកប្រាបូវូ ស៊ូបៀនតូ បានប្រកាសថា លោកនឹងប្តឹងជំទាស់លទ្ធផលបោះឆ្នោត ទៅតុលាការធម្មនុញ្ញឥណ្ឌូណេស៊ី។ យោងតាមលទ្ធផលបោះឆ្នោត ប្រកាសជាផ្លូវការ កាលពីថ្ងៃអង្គារ លោកហ្សូកូ វីដូដូ អតីតចៅហ្វាយក្រុងហ្សាការតា ឈ្នះឆ្នោតធ្វើជាប្រធានាធិបតីឥណ្ឌូណេស៊ី ដោយបានទទួលសំឡេងឆ្នោត ៥៣,១៥ភាគរយ ច្រើនជាងលោកប្រាបូវូ ដែលជាគូប្រជែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ច្បាស់ ដោយគ្មានស្រពិចស្រពិល លោកហ្សូកូ វីដូដូបានទទួលជ័យជំនះយ៉ាងធំធេងទៅលើគូប្រកួតប្រជែង លោកប្រាបូវូ ស៊ូបៀនតូជាមួយនឹងសំឡេងឆ្នោត ជាង៥៣ភាគរយ។ ប៉ុន្តែ លោកប្រាបូវ ស៊ូបៀនតូ ដែលបានទទួលសំឡេងតែ ៤៦,៨៥ភាគរយ បានទាត់ចោលលទ្ធផលបោះឆ្នោត និងបានចោទបក្សពួករបស់លោកហ្សូកូ វីដូដូថាបានលួចបន្លំសន្លឹកឆ្នោតយ៉ាងសន្ធឹកសន្ធាប់ នៅក្នុងអំឡុងពេលបោះឆ្នោត។
តាមអ្នកនាំពាក្យគណបក្សរបស់ប្រាបូវូ គេនឹងដាក់ពាក្យបណ្តឹងទៅតុលាការរដ្ឋធម្មនុញ្ញ នៅថ្ងៃពុធនេះ ដើម្បីជំទាស់លទ្ធផលបោះឆ្នោត។ ការប្តឹងជំទាស់មិនទទួលស្គាល់លទ្ធផលបោះឆ្នោតរបស់បក្សចាញ់ឆ្នោត នឹងអាចធ្វើឲ្យឥណ្ឌូណេស៊ី ប្រទេសមានសេដ្ឋកិច្ចនាំមុខគេនៅអាស៊ីអាគ្នេយ៍ ជួបអស្ថិរភាពនយោបាយ ដែលនឹងជះឥទ្ធិពលអាក្រក់ទៅលើទីផ្សារភាគហ៊ុននៅអាស៊ី។
អ្នកស្រាវជ្រាវម្នាក់នៅសកលវិទ្យាល័យយោធាឥណ្ឌូណេស៊ីអះអាងថា នៅចំពោះមុខចៅក្រមរបស់តុលាការធម្មនុញ្ញ លោកប្រាបូវូនឹងមិនទាមទារថា ខ្លួនជាអ្នកឈ្នះឆ្នោតទេ ដោយសារតែសំឡេងឆ្នោតរបស់លោកប្រាបូវូ មានតិចជាងលោកហ្សូកូ វីដូដូដល់ទៅ ៦ភាគរយ ដែលតំណាងឲ្យសំឡេងឆ្នោតប្រជាជន៨លាននាក់។ ដូច្នេះ គេវាយតម្លៃថា គណបក្សរបស់លោកប្រាបូវូ នឹងព្យាយាមបង្ហាញភស្តុតាងស្តីពីការលួចបន្លំសន្លឹកឆ្នោតរបស់ក្រុមលោកហ្សូកូ វីដូដូ ដើម្បីទាមទារឲ្យគេរៀបចំការបោះឆ្នោតប្រធានាធិបតីសាជាថ្មីឡើងវិញ។
បងប្រុសរបស់លោកប្រាបូវូ ដែលជាមហាសេដ្ឋី និងជាឧបត្ថម្ភថវិកាសម្រាប់យុទ្ធនាការឃោសនាបោះឆ្នោតរបស់លោកប្រាបូវូបានអំពាវនាវ នៅថ្ងៃនេះ កុំឲ្យប្រទេសមហាអំណាចទទួលស្គាល់លោកលោកហ្សូកូវី។ ប៉ុន្តែ តាំងពីថ្ងៃអង្គារ នៅថ្ងៃប្រកាសលទ្ធផលបោះឆ្នោត ប្រមុខការបរទេសអាមេរិក នាយករដ្ឋមន្ត្រីអូស្ត្រាលី និងប្រធានាគណៈកម្មការអឺរ៉ុបបាន សា្វគមអបអររួចហើយដល់ លោកហ្សូកូ វីដូដូ អតីតអ្នកជំនួញ លក់គ្រឿងសង្ហារឹម ដែលបានជាប់ឆ្នោត ក្លាយជាប្រធានាធិបតីឥណ្ឌូណេស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ