ប្រធានាធិបតីស្រីលង្កាចេញមុខការពាររឿងការចោទប្រកាន់ឧក្រិដ្ឋកម្មសង្រ្គាម
នៅថ្ងៃព្រហស្បតិ៍ ទី១៤ វិច្ឆិកានេះ លោកប្រធានាធីបតីស្រីលង្កាម៉ាហ៊ីនដា រ៉ាយ៉ាប៉ាក់សេបានប្រកាសឲ្យដឹងថា លោកត្រៀមខ្លួនរួចជាស្រេចដើម្បីការពារប្រទេសទល់នឹងការចោទប្រកាន់ឧក្រិដ្ឋកម្មសង្រ្គាមនាសម័យយុទ្ធនាការបោសសំអាតពួកឧទ្ទាមតាមូលក្នុងឆ្នំា ២០០៩។ ការប្រកាសរបស់លោករ៉ាយ៉ាប៉ាក់សេពេលនេះបានធ្វើឡើង មួយថ្ងៃមុនការផ្តើមជំនួបកំពូល Commonwealth ក្នុងទីក្រុងកូឡុំបូដែលមានប្រមុខរដ្ឋ និងប្រមុខរដ្ឋាភិបាលមួយចំនួនបានធ្វើពហិការមិនចូលរួម។
ចុះផ្សាយនៅថ្ងៃ៖
ស្តាប់ - ០២:០៤
មានថ្នាក់ដឹកនំាចំនួន ៣ប្រទេស គឺកាណាដា ឥណ្ឌា និងកោះម៉ូរីសបានសម្រេចមិនចូលរួមនៅក្នុងជំនួបកំពូល Commonwealth។ មូលហេតុ មកពីប្រទេសទំាងនេះចង់សម្តែងកំហឹងប្រឆំាងនឹងរដ្ឋាភិបាលស្រីលង្កាដែលមិនយល់ព្រមឲ្យមានការស៊ើបអង្កេតខ្នាតអន្តរជាតិមួយជុំវិញឧក្រិដ្ឋកម្មក្នុងសម័យយុទ្ធនាការបង្ក្រាបក្រុមឧទ្ទាមតាមូលក្នុងឆ្នំា ២០០៩។ « យើងបានបើកចំហ ដោយគ្មានការលាក់លាមអ្វីទំាងអស់ នេះជាការថ្លែងរបស់លោកប្រធានាធិបតីស្រីលង្កាម៉ាហ៊ីនដា រ៉ាយ៉ាប៉ាក់សេនៅចំពោះមុខក្រុមអ្នកកាសែត »។
ជាមួយគ្នានេះ លោករ៉ាយ៉ាប៉ាក់សេក៏បានប្រាប់ឲ្យដឹងផងដែរថា លោកបានត្រៀមខ្លួនរួចជាស្រេចដើម្បីជួបជជែកជាមួយលោកនាយករដ្ឋមន្រ្តីអង់គ្លេស David Cameron ជុំវិញការចោទប្រកាន់ដែលថា ទាហានស្រីលង្កាបានសម្លាប់ជនស៊ីវិលនៃក្រុមជនជាតិភាគតិចតាមូលរហូតដល់ទៅ ៤០ ០០០នាក់ក្នុងឱកាសយុទ្ធនាការបង្ក្រាបក្រុមឧទ្ទាមតាមូលកាលពីឆ្នំា ២០០៩។ លោក David Cameron បានប្រកាសឲ្យដឹងថា លោកនឹងធ្វើដំណើរទៅកាន់តំបន់ Jaffna ដែលជាទីកន្លែងមានផ្ទុះឡើងនូវការវាយប្រហារគ្នាយ៉ាងបង្ហូរឈាមរវាងកម្លំាងរដ្ឋាភិបាល និងពួកឧទ្ទាមតាមូល។
« មានវត្តមាននៅក្នុងប្រទេសស្រីលង្កា គឺជាឱកាសមួយដើម្បីស្វែងរកការពិតជុំវិញបញ្ហាមួយចំនួន ពិសេសពីរឿងការគោរពសិទ្ធិមនុស្ស » នេះជាការបញ្ជាក់របស់លោក David Cameron។ ជាការឆ្លើយតបវិញ លោករ៉ាយ៉ាប៉ាក់សេដែលបានជាប់ឆ្នោតប្រធានាធិបតីស្រីលង្កាក្នុងឆ្នំា ២០០៥ បានរម្លឹកជាថ្មីថា ស្រីលង្កាមានប្រព័ន្ធតុលាការ មានគណៈកម្មការសិទ្ធិមនុស្ស ហើយអង្គការ Commonwealth ក៏បានត្រៀមខ្លួនដើម្បីជួយពង្រឹងបន្ថែម។ « បើអ្នកណាម្នាក់ចង់ប្តឹងស្រីលង្កាពីបទរំលោភសិទ្ធិមនុស្ស ដូចយ៉ាងការធ្វើទារុណកម្ម ឬចាប់រំលោភ យើងមានប្រព័ន្ធតុលាការដើម្បីឆ្លើយតប » នេះជាការបញ្ជាក់របស់ លោករ៉ាយ៉ាប៉ាក់សេ។
គួររម្លឹកជូនថា កាលពីខែមេសា ឆ្នំា ២០១១ អង្គការសហប្រជាជាតិបានចេញផ្សាយរបាយការណ៍មួយដោយបានចោទរបបទីក្រុងកូឡុំបូពីបទឧក្រិដ្ឋកម្មសង្រ្គាមក្នុងឆ្នំា ២០០៩ ប្រឆំាងជនស៊ីវិល។ ចំណែកក្រុមឧទ្ទាមតាមូលវិញក៏បានជាប់ចោទពីបានយកក្រុមជនស៊ីវិលធ្វើជាខែលនៅក្នុងប្រយុទ្ធទល់នឹងកម្លំាងរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ