យន្តហោះចម្បាំងRafale របស់បារាំងកំពុងទាក់ទាញចំណាប់អារម្មណ៍ម៉ាឡេស៊ី
កងទ័ពម៉ាឡេស៊ីកំពុងចាប់អារម្មណ៍លើយន្តហោះចម្បាំង Rafale របស់បារាំង។ នេះបើតាមការបង្ហើបអោយដឺងពីប្រភពជិតដិតនឺងក្រសួងការពារជាតិ ម៉ាឡេស៊ី នៅថ្ងៃពុធ២២មីនានេះ។ យន្តហោះចម្បាំង Rafaleអាចស្ថិតក្នុងកិច្ចសន្យាទិញសម្ភារយោធារបស់កងទ័ពដែនអាកាស ម៉ាឡេស៊ី។ សប្តាហ៍ក្រោយនេះ ប្រធានាធិបតីបារាំងនឺងធ្វើទស្សនកិច្ចនៅម៉ាឡេស៊ី ហើយអាចនឺងផ្សព្វផ្សាយលក់យន្តហោះRafaleទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
យោងតាមប្រភពជិតដិតនឺងក្រសួងការពារជាតិម៉ាឡេស៊ី ដែលសុំមិនបញ្ចេញអត្តសញ្ញាណ កងទ័ពម៉ាឡេស៊ីពេលនេះ កំពុងចាប់អារម្មណ៍លើយន្តហោះចម្បាំងរ៉ាហ្វាល់ របស់បារាំង។ យន្តហោះរ៉ាហ្វាល់បារាំង ជាផលិតផលរបស់ក្រុមហ៊ុន Dassault Aviation។ រ៉ាហ្វាល់មួយគ្រឿង អាចលក់តម្លៃជាង២ពាន់លានដុល្លារ។ ម៉ាឡេស៊ីកំពុងចង់ទិញយន្តហោះចម្បាំង១៨គ្រឿង មកប្រើ ដើម្បីជំនួសយន្តហោះចម្បាំងរុស្ស៊ី ចាស់ៗ ប្រភេទMig-29។
ទន្ទឹមនេះដែរ សារព័ត៌មានជាច្រើនបានចុះផ្សាយថា ម៉ាឡេស៊ីកំពុងផ្តោតជម្រើស រវាងយន្តហោះរ៉ាហ្វាល់បារាំង និងយន្តហោះអឺរ៉ូហ្វៃថឺ ទីហ្វុន Eurofighter Typhoon ដែលជាផលិតផលរបស់ក្រុមហ៊ុនអង់គ្លេសBAE Systems។ ក្រុមហ៊ុនBAE Systems នេះឃោសនាយន្តហោះខ្លួនយ៉ាងផុសផុលមក ៦ឆ្នាំហើយ ខុសពីក្រុមហ៊ុនបារាំងដែលមិនចង់លេចមុខមាត់។ ដោយឡែក ម៉ាឡេស៊ីទំនងជាលែងចាប់អារម្មណ៍យន្តហោះចម្បាំងរុស្ស៊ី និងស៊ុយអែតទៀតហើយ។
ម៉ាឡេស៊ីផ្តោតការចាប់អារម្មណ៍លើយន្តហោះចម្បាំងបារាំង ធ្វើអោយបារាំងត្រេកអរមិនតិចទេ។ កន្លងមក ក្រុមហ៊ុន Dassault បារាំងធ្លាប់សម្រេចបានកិច្ចសន្យាលក់យន្តហោះរ៉ាហ្វាល់ជាមួយប្រទេសអេហ្ស៊ីប កាតា និងឥណ្ឌា។ ចំពេលប្រធានាធិបតីបារាំង ហ្វ្រង់ស៊័រ ហូឡង់ និងរដ្ឋមន្ត្រីការពារជាតិបារាំងហ្សង់ អ៊ីវ ឡឺឌ្រីយ៉ង់ ត្រូវបំពេញទស្សនកិច្ចនៅម៉ាឡេស៊ី ថ្ងៃចន្ទសប្តាហ៍ក្រោយនេះ ប្រធានាធិបតីនិងរដ្ឋមន្ត្រីការពារជាតិបារាំងច្បាស់ជាត្រូវផ្សព្វផ្សាយគុណភាពផលិតផលយន្តហោះចម្បាំងជាតិខ្លួនហើយ។ គួរបញ្ជាក់ដែរថា សប្តាហ៍ក្រោយនេះ ប្រធានាធិបតីបារាំងក៏បំពេញទស្សនកិច្ចនៅសិង្ហបុរី និងឥណ្ឌូណេស៊ីដែរ។
ដោយឡែក ម៉ាឡេស៊ីប្រហែលត្រូវការពេលយ៉ាងហោច២ឆ្នាំ មុននឺងសម្រេចថា តើត្រូវទិញយកយន្តហោះចម្បាំងរ៉ាហ្វាល់របស់បារាំង រឺយ៉ាងណា។ ពេលនេះ នាយករដ្ឋមន្ត្រីណាជីព រ៉ាហ្សាក់ កំពុងជាប់រវល់នឹងផ្តោតសកម្មភាពលើបញ្ហាក្នុងស្រុក ព្រោះម៉ាឡេស៊ីត្រូវរៀបចំការបោះឆ្នោតនៅឆ្នាំ២០១៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ