ការកំណត់តំលៃទូរស័ព្ទ ត្រូវបានបកស្រាយថា ដោយសារមានការប្រកួតប្រជែង មិនស្មោះត្រង់
នៅរសៀល ថ្ងៃច័ន្ទ ទី ៩ធ្នូនេះ រដ្ឋមន្ត្រីក្រសួងប្រៃសណីយ៍ និងទូរគមនាគមន៏ បានរៀបចំសន្និសីទកាសែតមួយ ទាក់ទងទៅនឹងបញ្ញត្តិកម្មលើសេវាទូរស័ព្ទ។ ជាសន្និសីទ ដែលផ្តោតសំខាន់ ទៅលើការបកស្រាយ ពីការកំណត់ថ្លៃអប្បបរមានៃការហៅទូរស័ព្ទ នៅក្នុងប្រទេសកម្ពុជា។ លោក ប្រាក់ សុខុន រដ្ឋមន្ត្រី ក្រសួង ប្រៃសណីយ៍ និងទូរគមនាគមន៏ បានថ្លែង នៅក្នុងសិន្និសីទនោះថា ដោយសារតែមានភាពមិនស្មោះត្រង់ ក្នុងការប្រកួតប្រជែង រវាងក្រុមហ៊ុនទូរស័ព្ទ នៅក្នុងប្រទេស ដូច្នេះទើបមានការកំណត់តំលៃអប្បបរមានេះ។
ចុះផ្សាយនៅថ្ងៃ៖
ស្តាប់ - ០២:៤៤
នៅក្រសួងប្រៃសណីយ៍ និងទូរគមនាគមន៏ នារសៀលថ្ងៃច័ន្ទ ទី៩ធ្នូនេះ មានរៀបចំសន្និសីទកាសែតមួយ ទាក់ទងនឹងការកំណត់តំលៃអប្បបរមា នៃសេវាទូរស័ព្ទ នៅក្នុងប្រទេសកម្ពុជា។
នៅក្នុងសន្និសីទនោះ លោកប្រាក់ សុខុន រដ្ឋមន្ត្រី ក្រសួងប្រៃសណីយ៍ និងទូរគមនាគមន៏ បានថ្លែងថា មានមូលហេតុចម្បង ៤យ៉ាង ដែលបានរុញច្រាន ឲ្យមានការកំណត់តំលៃអប្បបរមានេះ ដែលរួមមាន ទីមួយ គឺដើម្បីទប់ស្កាត់ការប្រកួតប្រជែងមិនស្មោះត្រង់។ ទីពីរ ធានាគុណភាពសេវាកម្មឲ្យមានការកើនឡើង។ ទីបី ធ្វើឲ្យតម្លៃមូលដ្ឋានមានលក្ខណៈសមរម្យ។ និងទីបួន ធានាចំណូលរដ្ឋឲ្យមានស្ថិរភាព ពីព្រោះរយៈពេល៥ឆ្នាំកន្លងមក ចំណូលរដ្ឋដែលបានមកពីវិស័យទូរគមនាគមន៍មានការធ្លាក់ចុះ។
យ៉ាងណាក៏ដោយ រដ្ឋមន្ត្រី ក្រសួងប្រៃសណីយ៍ បានអះអាងថា នេះគ្រាន់តែជាវិធានការបណ្តោះអាសន្នប៉ុណ្ណោះ ពីព្រោះស្ថាប័នរបស់លោកត្រូវជួបប្រជុំជាមួយអ្នកជំនាញជាតិ អន្តរជាតិ នាពេលខាងមុខទៀត ដើម្បីកំណត់គោលការណ៍មួយច្បាស់លាស់។
គួររម្លឹកថា កាលពីថ្ងៃទី២១ ខែវិច្ឆិកាកន្លងទៅនេះ ទីស្ដីការគណៈរដ្ឋមន្ត្រី បានសម្រេចដាក់ឲ្យដំណើរការនូវ សេចក្ដីប្រកាសអន្តរក្រសួង រវាងក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុ ដោយបានកំណត់ឲ្យក្រុមហ៊ុនបំរើសេវាទូរស័ព្ទចល័តទាំងអស់ នៅក្នុងប្រទេសកម្ពុជា កំណត់ការហៅចេញក្នុងប្រព័ន្ធ យ៉ាងតិចអប្បបរមា ៤.៥សេន ក្នុងមួយនាទី និងក្រៅប្រព័ន្ធ ៥.៩៥សេន ក្នុងមួយនាទី។
តាមការឆ្លើយបំភ្លឺរបស់ក្រសួងសេដ្ឋកិច្ច និងហិរញ្ញវត្ថុ អត្រាអ្នកប្រើប្រាស់ទូរស័ព្ទ មានការកើនឡើង ពីមួយឆ្នាំ ទៅមួយឆ្នាំ។ ដោយក្នុងឆ្នាំ ២០០៨ មានអ្នកប្រើលេខ ទូរស័ព្ទ ប្រមាណជា ៣លាន៨សែននាក់ ហើយនៅឆ្នាំ ២០១២ អត្រាជាវលេខទូរស័ព្ទ បានហក់ឡើង រហូតដល់ ១៩លានលេខ។ ប៉ុន្តែបើគិតត្រឹម ១១ខែ ក្នុងឆ្នាំ ២០១៣ ពន្ធរដ្ឋគ្រប់ប្រភេទ ដែលបានមកពីសេវាទូរស័ព្ទនេះ គឺមានតែ ៨០លានដុល្លា តែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ