ប្រតិកម្មជុំវិញការចាប់ខ្លួននិងសម្លាប់អ្នកកាសែត RFI នៅម៉ាលី
ចុះផ្សាយនៅថ្ងៃ៖
ស្តាប់ - ០៣:៤៨
ព័ត៌មានស្តីពីការសម្លាប់អ្នកកាសែត RFI ទាំងពីររូប បានធ្វើឲ្យមានប្រតិកម្មពីគ្រប់ទិសទៅ រាប់ចាប់តាំងពីថ្នាក់ដឹកនាំរបស់វិទ្យុ RFI ផ្ទាល់ ថ្នាក់ដឹកនាំរដ្ឋាភិបាលបារាំង និងសហភាពអឺរ៉ុប រហូតដល់ក្រុមប្រឹក្សាសន្តិសុខអ.ស.ប។
កាលពីយប់ថ្ងៃសៅរ៍ម្សិលមិញ ក្រោយពីទទួលបានដំណឹងស្តីពីការចាប់ជំរិត និងសម្លាប់ទាំងពីររូបរបស់ RFI លោកស្រី Marie-Christine Saragosse ប្រធានអគ្គនាយិកានៃវិទ្យុបារាំង RFI បានបញ្ចេញប្រតិកម្មភ្លាមៗ ដោយបានបង្ហាញនូវការសោកសង្រេងផង និងកំហឹងផង ហើយក្នុងពេលជាមួយគ្នា លោកស្រីបានបញ្ជាក់ថា ទង្វើអមនុស្សធម៌នេះនឹងមិនអាចបិទមាត់អ្នកកាសែតរបស់ RFI បាននោះទេ។ “ខ្ញុំមិនដឹងថា តើគួរសោកសង្រេង ឬក៏គួរផ្ទុះកំហឹងទេ... ខ្ញុំខឹងដោយសារតែ RFI តាំងពីដើមមកបានធ្វើការយ៉ាងល្អ នៅអាហ្វ្រិក ធ្វើឲ្យអ្នកស្តាប់នៅអាហ្វ្រិកចូលចិត្តច្រើន។ អ្នកកាសែតទាំងពីរនាក់របស់យើង កំពុងតែធ្វើការ ដូចដែលយើងធ្លាប់ធ្វើពីមុនៗ គឺយើងចង់ផ្តល់ឱកាសឲ្យប្រជាជនម៉ាលី ពីគ្រប់និន្នាការនយោបាយទាំងអស់ អាចបញ្ចេញមតិយោបល់របស់ពួកគេ នៅក្នុងពេលដែលការបោះឆ្នោតតំណាងរាស្រ្តជិតចូលមកដល់ ហើយអ្នកកាសែតទាំងពីររូប គឺសុទ្ធសឹងជាអ្នកកាសែតជើងចាស់។
ពេលខ្លះ យើងចេះតែគិតថា សេរីភាពសារព័ត៌មានកើតមាននៅគ្រប់ទីកន្លែង។ ក៏ប៉ុន្តែ តាមរយៈការចុះទៅយកការណ៍ដល់កន្លែង យើងដឹងថា នៅមានកន្លែងច្រើនណាស់ ដែលសេរីភាពសារព័ត៌មាននៅជាបញ្ហាចោទខ្លាំងនៅឡើយ។ ហើយរូបខ្ញុំផ្ទាល់ រួមជាមួយនឹងការិយាល័យនិពន្ធរបស់ RFI-France 24-MCD ខ្ញុំគិតថា អ្វីដែលកើតឡើង កាលពីម្សិលមិញនេះ ធ្វើឲ្យយើងមានកំហឹង ហើយកំហឹងនេះវានឹងធ្វើឲ្យយើងកាន់តែចង់បំពេញការងាររបស់យើង ដោយមិនបណ្តោយឲ្យពួកតិរិច្ឆានមកបំបិទមាត់របស់ពួកយើង”។
លោកហ្វ្រង់ស័រ ហូឡង់ ប្រធានាធិបតីបារាំង ក្រៅពីបានថ្កោលទោសទង្វើអមនុស្សធម៌នេះ បានចូលរួមរំលែកទុក្ខដល់ក្រុមគ្រួសាររបស់អ្នកកាសែតទាំងពីររូប ក៏ដូចជាដល់សហការីទាំងអស់របស់ RFI។ ប្រធានាធិបតីម៉ាលី បានទូរស័ព្ទមកលោកហ្វ្រង់ស័រ ហូឡង់ កាលពីយប់ថ្ងៃសៅរ៍ម្សិលមិញ ដើម្បីសំដែងនូវការចូលរួមរំលែកទុក្ខរបស់ប្រជាជនម៉ាលី ហើយក្នុងពេលជាមួយគ្នា ប្រមុខរដ្ឋទាំងពីរបានប្តេជ្ញាថានឹងបន្តដោយមិនបន្ធូរដៃនូវយុទ្ធនាការប្រយុទ្ធប្រឆាំងនឹងភេរវកម្មនៅម៉ាលី។
ចំណែកលោកស្រី Aurélie Filipettie ដែលជារដ្ឋមន្រ្តីក្រសួងវប្បធម៌ និងព័ត៌មានបារាំងវិញ បានថ្លែងប្រាប់វិទ្យុ RFI ថា អ្នកកាសែតទាំងពីររូបរបស់ RFI បានបូជាជីវិតក្នុងបុព្វហេតុដ៏ខ្ពង់ខ្ពស់មួយ គឺដើម្បីសិទ្ធិសេរីភាពក្នុងការផ្តល់ព័ត៌មាន។ “យើងមានក្តីសោកសង្រេងក្រៃលែង នៅថ្ងៃនេះ ចំពោះការបាត់បង់ Ghislaine Dupont និង Claude Verlon ដែលសុទ្ធសឹងជាអ្នកកាសែតអាជីពជើងចាស់។ ពួកគេបានស្លាប់ក្នុងលក្ខខណ្ឌគួរឲ្យសង្វេគ ក៏ប៉ុន្តែ ស្លាប់ដើម្បីសិទ្ធិសេរីភាពក្នុងការផ្តល់ព័ត៌មាន។ ពួកគេទាំងពីរនាក់បូជាជីវិត មិនមែនដើម្បីផ្សព្វផ្សាយសំឡេងរបស់ប្រទេសបារាំងទៅបរទេសទេ ក៏ប៉ុន្តែ គឺដើម្បីផ្សព្វផ្សាយទស្សនវិស័យរបស់បារាំង អំពីសិទ្ធិសេរីភាពសារព័ត៌មាន ទៅដល់គ្រប់ទីកន្លែងនៅលើពិភពលោក ដែលនេះគឺជាការបូជាជីវិត ដើម្បីបុព្វហេតុដ៏ឧត្តុង្គឧត្តមបំផុត”។
នៅខាងក្រៅប្រទេសបារាំងវិញ ប្រតិកម្មជុំវិញការសម្លាប់អ្នកកាសែត RFI ក៏មានច្រើនដែរ។ លោក José Manuel Barosso ប្រធានគណៈកម្មការអឺរ៉ុបបានលើកឡើងថា ទង្វើអមនុស្សធម៌ដែលបានកើតឡើងនៅម៉ាលី កាលពីម្សិលមិញនេះ គឺជាដាស់តឿនថ្មីមួយទៀត អំពីករណីយកិច្ចរបស់យើង ក្នុងការប្រយុទ្ធប្រឆាំងនឹងពួកភេរវជន នៅគ្រប់ទីកន្លែងទាំងអស់ ហើយថា សហភាពអឺរ៉ុបនឹងបន្តគាំទ្របារាំង និងរដ្ឋាភិបាលម៉ាលី ព្រមទាំងសហគមន៍អន្តរជាតិ ដើម្បីស្តារឡើងវិញនូវសន្តិសុខ និងសណ្តាប់ធ្នាប់ នៅក្នុងប្រទេសម៉ាលី។
ក្រុមប្រឹក្សាសន្តិសុខអ.ស.ប ក៏បានចេញសេចក្តីថ្លែងការណ៍មួយដែរ កាលពីថ្ងៃសៅរ៍ម្សិលមិញ ដោយបានថ្កោលទោសយ៉ាងខ្លាំងក្លាបំផុតចំពោះការចាប់ជំរិត និងធ្វើឃាតអ្នកកាសែតទាំងពីររូបរបស់វិទ្យុបារាំង RFI ហើយបានទាមទារឲ្យអាជ្ញាធរម៉ាលីបើកការស៊ើបអង្កេតឲ្យបានហ្មត់ចត់ជុំវិញរឿងនេះ ដើម្បីនាំយកជនដៃដល់ទៅផ្តន្ទាទោសតាមច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ