RFI ទាមទារឲ្យតុលាការស៊ើបអង្កេតពីទំនាក់ទំនងរវាងការសម្លាប់អ្នកកាសែតនិងចំណាប់ខ្មាំងបារាំង
បីឆ្នាំក្រោយមក ករណីអ្នកកាសែត RFI ពីរនាក់ត្រូវគេសម្លាប់នៅប្រទេសម៉ាលី កំពុងតែរីកផុសផុលឡើងវិញ ក្រោយពីមានព័ត៌មាន អំពីការជាប់ទាក់ទងគ្នា រវាងការសម្លាប់អ្នកកាសែតទាំងពីរ និងចំណាប់ខ្មាំងបារាំង។ ព័ត៌មានដែលត្រូវបានចុះផ្សាយ ដោយទូរទស្សន៍បារាំង កាលពីយប់ថ្ងៃព្រហស្បតិ៍ ហើយថ្នាក់ដឹកនាំវិទ្យុបារាំងអន្តរជាតិបានទាមទារនៅថ្ងៃសុក្រនេះ ឲ្យអាជ្ញាធរបារាំងបើកការស៊ើបអង្កេតលម្អិតជុំវិញរឿងនេះ។
ចុះផ្សាយនៅថ្ងៃ៖ កែប្រែថ្ងៃទី៖
អ្នកកាសែតរបស់ RFI ទាំងពីររូប គឺ ហ្ស៊ីសឡែន ឌុយប៉ុង និងខ្លូត វែរឡុង ត្រូវបានក្រុមជីហាតចាប់ជាចំណាប់ខ្មាំង រួចហើយសម្លាប់ចោល កាលពីថ្ងៃទី២ ខែវិច្ឆិកា ឆ្នាំ២០១៣ នៅក្នុងពេលដែលពួកគេកំពុងយកការណ៍នៅតំបន់ប៉ែកខាងជើងប្រទេសម៉ាលី។ ហេតុការណ៍នេះបានកើតឡើង តែប៉ុន្មានថ្ងៃប៉ុណ្ណោះ ក្រោយពីចំណាប់ខ្មាំងបារាំង ៤នាក់ផ្សេងទៀត ត្រូវបានក្រុមជីហាតដោះលែង។
ក្នុងរយៈពេលជាច្រើនខែកន្លងទៅនេះ ការសង្ស័យបានកើតមានឡើងខ្លាំង ជុំវិញទំនាក់ទំនង រវាងការសម្លាប់អ្នកកាសែតទាំងពីររូប និងការចរចាដោះលែងចំណាប់ខ្មាំង ហើយ
ព័ត៌មានកាន់តែច្បាស់បញ្ជាក់អំពីសម្មតិកម្មនេះ ត្រូវបានចុះផ្សាយនៅក្នុងបទយកការណ៍ស៊ើបអង្កេតមួយ របស់ទូរទស្សន៍បារាំង France 2 កាលពីយប់ថ្ងៃព្រហស្បតិ៍។
យោងតាមព័ត៌មានដែលបានពីសក្ខីកម្មរបស់សមាជិកក្រុមជីហាតដោយផ្ទាល់ ក៏ដូចជា អតីតមន្រ្តីចារកិច្ច និងមន្រ្តីទូតបារាំង ការដោះលែងចំណាប់ខ្មាំងបារាំងទាំង ៤នាក់ គឺកើតចេញពីការចរចាដ៏ស្មុគស្មាញ និងដ៏សែនចម្រូងចម្រាស់ ទម្រាំឈានដល់ការព្រមព្រៀងដោះលែងជាថ្នូរនឹងការបង់លុយរាប់សិបលានអឺរ៉ូ។ ក៏ប៉ុន្តែ ក្រុមជីហាតអះអាងថា ក្រោយពីដោះលែងចំណាប់ខ្មាំងរួចហើយ ពួកគេឃើញថា លុយដែលបារាំងបង់ជាថ្នូនឹងចំណាប់ខ្មាំងនេះ មិនគ្រប់ទៅតាមចំនួនដែលបានព្រមព្រៀង។ ហេតុដូច្នេះហើយបានជាគេគិតថា ក្រុមជីហាតបានចាប់ខ្លួន និងសម្លាប់អ្នកកាសែត RFI ទាំងពីររូប ដើម្បីជាការសងសឹក។
រហូតមកទល់នឹងពេលនេះ រដ្ឋាភិបាលបារាំងបានបដិសេធមិនព្រមធ្វើអត្ថាធិប្បាយអ្វីទាំងអស់ជុំវិញព័ត៌មាននេះ ហើយការទាមទារដោយទទូចរបស់ RFI ក៏ដូចជាក្រុមគ្រួសារអ្នកកាសែតទាំងពីររូប ឲ្យរដ្ឋាភិបាលបញ្ចេញជាសាធារណៈនូវឯកសារសម្ងាត់ ទាក់ទងនឹងសំណុំរឿងនេះ ក៏តែងតែទទួលបាននូវការឆ្លើយតបអវិជ្ជមាន។
ហេតុដូច្នេះហើយបានជា ថ្នាក់ដឹកនាំវិទ្យុបារាំងអន្តរជាតិបានដាក់ក្តីសង្ឃឹមលើស្ថាប័នតុលាការ ដោយបានទាមទារ នៅក្នុងសេចក្តីថ្លែងការណ៍ចេញផ្សាយនៅថ្ងៃសុក្រនេះ ទាមទារឲ្យតុលាការបារាំងធ្វើការស៊ើបអង្កេតទៅលើរាល់ព័ត៌មាន ដែលមាន ជុំវិញការជាប់ទាក់ទង រវាងការសម្លាប់អ្នកកាសែត និងការចរចាបង់លុយដោះលែងចំណាប់ខ្មាំង។
គួរបញ្ជាក់ថា ការបង់លុយជាថ្នូរនឹងការដោះលែងចំណាប់ខ្មាំង គឺជានយោបាយដែលតែងទទួលរងនូវការរិះគន់ ដោយសារតែគេគិតថា ធ្វើបែបនេះ គឺលើកទឹកចិត្តឲ្យក្រុមភេរវជនយកការចាប់ចំណាប់ខ្មាំងធ្វើជាជំនួញ។ ហេតុដូច្នេះហើយបានជា តាំងពីដើមរៀងមក រដ្ឋាភិបាលបារាំងតែងតែលាក់បាំងការណ៍សម្ងាត់ ជុំវិញដំណើរការចរចាដោះលែងចំណាប់ខ្មាំងរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ