ប៉េកាំង និងសេអ៊ូល បង្ហាញជំហរថា នឹងមានទំនាក់ទំនង់ល្អប្រសើររវាងគ្នាឡើងវិញ
កូរ៉េខាងត្បូង និងចិន បានបញ្ជាក់ជំហរថានឹងវិលទៅរកទំនាក់ទំនងជាធម្មតាឡើងវិញ ទៅលើផ្នែកការទូត សន្តិសុខ និងពាណិជ្ជកម្ម។ នេះគឺជាលទ្ធផលនៃការជជែកពិភាក្សាគ្នា រវាងប្រមុខការទូតកូរ៉េខាងត្បួង និងអនុរដ្ឋមន្ត្រីការបរទេសចិន ដែលបានជួបគ្នានៅក្រុងប៉េកាំង នៅថ្ងៃច័ន្ទ និងថ្ងៃអង្គារ៍នេះ។ ការប្រកាសជំហរដូច្នេះ គឺធ្វើឡើងនៅក្នុងជំនួប៦ភាគី ដើម្បីពិភាក្សាគ្នាពីវិបត្តិនុយក្លែអ៊ែរកូរ៉េខាងជើង ដែលមានប្រទេសចិន កូរ៉េទាំងពីរ អាមេរិក រុស្ស៊ី និងជប៉ុន។ សូមជម្រាបថា ទំនាក់ទំនងកូរ៉េខាងត្បួង និងចិន បានតានតឹងខ្លាំង នារយៈពេលចុងក្រោយនេះ ទាក់ទិននឹងវិបត្តិនុយក្លែអ៊ែរកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
រដ្ឋមន្ត្រីការបរទេសកូរ៉េខាងត្បូង បានថ្លែងថា ភាគីចិននិងកូរ៉េខាងត្បូង បានយល់ស្របគ្នា ចំពោះការរឹតចំណងទាក់ទងរវាងគ្នាឲ្យបានល្អ ដើម្បីនាំមកនូវផលប្រយោជន៍រួម ហើយនិងធ្វើឲ្យកិច្ចសហការប្រតិបត្តិគ្នា មានភាពប្រក្រតីឡើងវិញ។ ភាគីការទូតចិនវិញ ថ្លែងថា ការពង្រឹងទំនាក់ទំនងរវាងប្រទេសទាំងពីរ គឺមានសារៈសំខាន់ណាស់។
សូមបញ្ជាក់ថា តាំងតែពីកូរ៉េខាងជើងរបស់ គីម ជុងអ៊ុន បង្កើនការសាកល្បងបាញ់មីស៊ីល និងពន្លឿនគម្រោងផលិតនុយក្លែអ៊ែរមក, ទំនាក់ទំនាក់រវាងចិននិងកូរ៉េខាងត្បួង ក៏បានធ្លាក់ចុះដុនដាបខ្លាំងណាស់ដែរ។ ដើម្បីសុវត្ថិភាព កូរ៉េខាងត្បូង បានបំពាក់ខែលការពារប្រឆាំងមីស៊ីល ដែលជួយបំពាក់ដោយអាមេរិក ជាសម្ព័ន្ធមិត្ត។ ចំណែកចិនវិញ គឺមិនសុខចិត្តទេ ព្រោះចិនគិតថា អាមេរិក ប្រើគ្រឿងឧបករណ៍នោះសម្រាប់ស៊ើបការណ៍ពីប្រទេសចិន ហើយម្យ៉ាងទៀត ខែលការពារប្រឆាំងមីស៊ីលនេះ គឺប៉ះពាល់ដល់យុទ្ធសាស្ត្រយោធារបស់ចិន។ ភ្លាមៗនោះ ទីក្រុងប៉េកាំង បានដាក់ទណ្ឌកម្មសេដ្ឋកិច្ចកូរ៉េខាងត្បួង គឺតាមរយៈ ការរឹតបណ្តឹងចំពោះក្រុមហ៊ុនកូរ៉េខាងត្បួងដែលរកស៊ីលើទឹកដីចិន ហើយថែមទាំង បានហាមឃាត់ក្រុមហ៊ុនទេសចរណ៍កូរ៉េខាងត្បួង មិនឲ្យនាំភ្ញៀវទៅប្រទេសចិនថែមទៀត។ ការបណ្តឹងច្រកផ្លូវសេដ្ឋកិច្ចនេះ គឺប៉ះពាល់ខ្លាំងណាស់ចំពោះកូរ៉េខាងត្បូង ព្រោះថា ចិនគឺជាអ្នកវិនិយោគទុនធំជាងគេនៅកូរ៉េខាងត្បូង។
នៅថ្ងៃច័ន្ទនិងថ្ងៃអង្គារ៍ ដើមសប្តាហ៍នេះ ក្នុងជំនួបនៅទីក្រុងប៉េកាំង មន្ត្រីជាន់ផ្នែកការទូតនិងផ្នែកសន្តិសុខរបស់ប្រទេសទាំងពីរ បាននិយាយត្រូវរ៉ូវគ្នា និងរកច្រកផ្លូវសហការល្អជាមួយគ្នាឡើងវិញ។ តែយ៉ាងណាក៏ដោយ ចិន នៅតែស្នើឲ្យកូរ៉េខាងត្បូងបញ្ជាក់ជំហរសមស្របមួយចំពោះរឿងបំពាក់ខែលប្រឆាំងមីស៊ីល ហើយនឹងត្រូវចេះគ្រប់គ្រងស្ថានការណ៍ដោយមានភាពបត់បែន។
ចិននិងកូរ៉េខាងត្បួង អាចនឹងប្រកាសបញ្ជាក់កាន់តែច្បាស់ពីជំហរទំនាក់ទំនងរបស់ខ្លួន នៅសប្តាហ៍ក្រោយនេះ។ តាមការប្រកាសរបស់វិមានប្រធានាធិបតីកូរ៉េខាងត្បួង, ប្រមុខរដ្ឋនៃប្រទេសទាំងពីរ គឺលោក ស៊ី ជីងពីង និងលោក មូន ចៃអ៊ីន នឹងត្រូវជួបពិភាក្សាគ្នា ក្នុងអំលុងជំនួបកំពូលនៃសហប្រតិបត្តិសេដ្ឋកិច្ចក្នុងតំបន់អាស៊ីប៉ាស៊ីហ្វីក ហៅកាត់ថា APEC ដែលនឹងធ្វើឡើង នៅថ្ងៃទី១០និង១១វិច្ឆិកា នៅខេត្តដាណាង ប្រទេសវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ