ពិធីបុណ្យច្រត់ព្រះនង្គ័ល៖ គោឧសភរាជបរិភោគតែពោត
កម្ពុជាបានប្រារព្ធព្រះរាជពិធីច្រត់ព្រះនង្គ័លនៅក្នុងខេត្តកំពង់ចាមនៅថ្ងៃនេះ។ ក្នុងចំណោមអាហារផ្សងប្រផ្នូលទាំង៧មុខ គោឧសភរាជបានបរិភោគតែពោតមួយមុខប៉ុណ្ណោះ។ ក្រសួងព្រះបរមរាជវាំងបានរើសយកខេត្តកំពង់ចាមជាទីកន្លែងរៀបចំព្រះរាជពិធីច្រត់ព្រះនង្គ័លនៅឆ្នាំនេះ ដោយសារតែវាលព្រះមេរុដែលជាទីរៀបចំព្រះរាជពិធីនេះ ត្រូវបានរក្សាជាអនុស្សាវរីយ៍នៃពិធីបូជាព្រះបរមសពព្រះរតនកោដ។
ចុះផ្សាយនៅថ្ងៃ៖
ស្តាប់ - ០១:៤៥
ព្រះមហាក្សត្រ ព្រះបាទ ព្រះបរមនាថ នរោត្តម សីហមុនី ត្រូវបានអមព្រះរាជដំណើរដោយ ប្រធានរដ្ឋសភា លោកហេង សំរិន លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីការពារជាតិ និងមន្ត្រីជាន់ខ្ពស់នៅក្នុងរដ្ឋាភិបាលជាច្រើនទៀត ដើម្បីចូលរួមក្នុងព្រះរាជពិធីច្រត់ព្រះនង្គ័លនៅក្នុងក្រុងកំពង់ចាម។
ព្រះរាជពិធីនេះត្រូវបានរៀបចំធ្វើនៅលើទីលានបាល់ទាត់របស់ក្រុងនេះ ដោយមានសិស្ស និងប្រជាជនជាច្រើនចួលរួមផងដែរ។
ដោយសារតែមិនទាន់អាចរៀបចំព្រះរាជពិធីនេះនៅលើទីវាលព្រះមេរុនៅមុខសារមន្ទីរជាតិបាន ក្រសួងព្រះបរមរាជវាំងបានជ្រើសរើសយកខេត្តកំពង់ចាម ដើម្បីរៀបចំព្រះរាជពិធីច្រត់ព្រះនង្គ័លនេះ ពីព្រោះ ខេត្តកំពង់ចាមត្រូវបានស្គាល់ថា ជាខេត្តកសិកម្មមួយ។
នៅក្នុងព្រះរាជពិធីច្រត់ព្រះន័ង្គលនៅព្រឹកមិញនេះ គោឧសភរាជបានបរិភោគតែពោតមួយមុខប៉ុណ្ណោះ ក្នុងចំណោមអាហារ៧មុខ ដែលជាអាហារផ្សងប្រផ្នូលសម្រាប់ការទទួលទិន្នផលរបស់កម្ពុជានៅពេលខាងមុខ។ គោឧសភរាជមិនបានបរិភោគ ស្រូវ សណ្តែក ល្ង ទឹក ស្រា និងស្មៅឡើយ។
គោឧសភរាជបានបរិភោគតែ ពោត លោកអាចារ្យ បាគូក្នុងព្រះបរមរាជវាំងបានប្រកាសថា ក្នុងឆ្នាំនេះ ដំណាំពោត នឹងទទួលបានទិន្នផលល្អប្រសើរ។ ប៉ុន្តែ លោកអាចារ្យក៏បានបន្តបញ្ជាក់ដែរថា នេះគឺជាការផ្សងប្រផ្នូល ទៅតាមទំនៀមទំលាប់នៃព្រះរាជពិធីច្រត់ព្រះនង្គ័ល ដែលមានតាំងពីបុរាណកាលមកប៉ុណ្ណោះ និងជាការប្រកាសថា រដូវវប្បមង្គលចូលមកដល់ហើយ។ ដូច្នេះសូមប្រជាកសិករ រៀបចំការងារបង្កបង្កើនផលឲ្យបានទទួលនូវទិន្នផលខ្ពស់ ដើម្បីលើកស្ទួយកម្រិតជីវភាពអោយបានប្រសើរ។
គួរបញ្ជាក់ផងដែរថាដោយសារតែព្រះរាជពិធីច្រត់ព្រះនង្គ័លត្រូវរៀបចំធ្វើនៅក្នុងទឹកដីខេត្តកំពង់ចាម លោកអភិបាលខេត្ត លន់ លីមថៃ ត្រូវបានជ្រើសរើសអោយធ្វើជាស្តេចមាឃ និងភរិយារបស់លោកគឺលោកស្រី ស្រ៊ុន ណាង គឺជាមេហួរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ