មេដឹកនាំប្រឆាំងរុស្ស៊ីត្រូវតុលាការកាត់ឲ្យជាប់ពន្ធនាគារ៥ឆ្នាំ
អ្នកប្រឆាំងនៅរុស្ស៊ី ដែលល្បីខាងប្រយុទ្ធទល់នឹងអំពើពុករលួយ លោក Alexei Navalny រសៀលម្សិលមិញ ត្រូវបានតុលាការ កាត់ទោសឲ្យជាប់ពន្ធនាគារ ៥ឆ្នាំ ប៉ុន្តែ ក្នុង លក្ខណៈព្យួរទោស ព្រមទាំងតម្រូវឲ្យបង់ប្រាក់ពិន័យ ៨.៤០០ ដុល្លារ តាមបទគៃបន្លំប្រាក់។ ក្រោយពីឮសាលក្រមនោះ គាត់ថ្លែងថា ការកាត់ទោសរូបគាត់ មានលក្ខណៈនយោបាយ សុទ្ធសាធ បំពេញតាមកុម្ម៉ង់របស់វិមានក្រេមឡាំង ដើម្បីដកសិទ្ធិគាត់ ជាបេក្ខជនគ្រោះថ្នាក់ អាចឈ្នោះឆ្នោត កុំឲ្យចូលប្រឡូក ក្នុង ការបោះឆ្នោតប្រធានាធិបតីនៅរុស្ស៊ី ក្នុងឆ្នាំ ២០១៨។
ចុះផ្សាយនៅថ្ងៃ៖
ស្តាប់ - ០១:៥២
គួរនិយាយថា អ្នកស្រុករុស្ស៊ីណាដែលគាំទ្រ លោក Alexei Navalny គឺ គេពេញចិត្ត នឹង ភាពប្តេជ្ញារបស់គាត់ ប្រយុទ្ធទល់នឹងអំពើពុករលួយដែលបន្តស៊ីរូងប្រទេស។ គាត់ល្បី ដោយ ហ៊ាន កកូរកកាយទ្រព្យសម្បត្តិ ពួកមន្ត្រីរដ្ឋការណាដែលស្តុកស្តម្ភ មកផ្សព្វផ្សាយ ឲ្យប្រជាជន ដឹងឮ។ ម៉្លោះហើយ បានជាគាត់ក្លាយជា បុគ្គលដែលគ្រោះថ្នាក់សម្រាប់រដ្ឋអំណាច។
តាមពិត ការកាត់ទោសថ្ងៃ៨កុម្ភៈម្សិលមិញ គឺជាការសូត្រឡើងវិញនៃ សាលក្រមបែបនេះ កាលពីឆ្នាំ២០១៣ ដែលបន្ទាប់មក ត្រូវបានគាត់ប្តឹងតវ៉ា ទៅតុលាការអឺរ៉ុបខាងសិទ្ធិមនុស្ស ដែលបានកាត់ក្តីឲ្យគាត់ឈ្នះ ដោយថែមទាំងបានតម្រូវឲ្យ រដ្ឋរុស្ស៊ី បង់ប្រាក់ជម្ងឺចិត្ត ៤៨.០០០អឺរ៉ូ ទៅគាត់ទៅផង។ ស្របនឹងការសម្រេចចិត្តនេះរបស់តុលាការអឺរ៉ុប តុលាការកំពូល រុស្ស៊ី ក៏បានបញ្ជាឲ្យ តុលាការទីរួមខេត្ត Kirov នៅចម្ងាយ ៩០០គ.ម. ខាងកើតពីរដ្ឋធានីម៉ូស្គូ ពិនិត្យមើលសំណុំរឿងគាត់សាឡើងវិញ។ គឺ ក្នុងខេត្តនេះឯង ដែលកាលពីឆ្នាំ២០០៩ គាត់ បានធ្វើជាទីប្រឹក្សាអភិបាលខេត្តសេរីនិយមគ្នីគ្នាគាត់ ហើយស្រាប់តែជាប់ចោទ ក្នុងការគៃបន្លំ ប្រាក់របស់ក្រុមហ៊ុនរដ្ឋខាងកាប់ឈើ អស់ប្រមាណ កន្លះលានដុល្លារ។
គ្រាន់តែឮការកាត់ទោសគាត់សាជាថ្មី លោក Navalny បានប្រកាស មិនទទួលស្គាល់ សាលក្រម នេះទេ។ គាត់ថា ស្របនឹងរដ្ឋធម្មនុញ្ញប្រទេស គាត់មានសិទ្ធិពេញទី ក្លាយជាបេក្ខជន ក្នុង ការបោះឆ្នោតប្រធានាធិបតីនៅរុស្ស៊ី ក្នុងឆ្នាំក្រោយ។ ហើយគាត់ពិតជានឹង ចូលប្រឡូកមែន។ ប៉ុន្តែ បើការព្យួរទោសនោះ នៅតែមានសុពលភាព នោះ ស្របនឹងច្បាប់រុស្ស៊ី គាត់អាចត្រូវ ដកសិទ្ធិ រហូតដល់១០ឆ្នាំ មិនអាចជាប់ឆ្នោតអ្វីណាឡើយ។
កាលពីខែតុលាឆ្នាំ២០១៣ គាត់បានទទួលសម្លេងគាំទ្រ ដល់ ២៧,២% ជាប់ចំណាត់ថ្នាក់ទី២ក្នុង ការបោះឆ្នោតរើសអភិបាលក្រុងម៉ូស្គូ ដោយចាញ់តែបេក្ខភាពដែលជំនិតនឹងវិមានក្រេមឡាំង។ លោក Navalny សព្វថ្ងៃអាយុ ៤០ឆ្នាំ បន្តស្ថិតនៅជា គូប្រឆាំងយ៉ាងយូរ ទល់នឹងលោក ប្រធានាធិបតីពូទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ