រុស្ស៊ីស្នើលក់អាវុធទៅឲ្យហ្វីលីពីនដែលជាសម្ព័ន្ធមិត្តអាមេរិក
រុស្ស៊ីត្រៀមខ្លួនជានិច្ចក្នុងការផ្គត់ផ្គង់គ្រឿងសព្វាវុធល្អៗទៅឲ្យហ្វីលីពីន និងចង់បង្កើនទំនាក់ទំនងជាមួយហ្វីលីពីនឲ្យកាន់តែជិតស្និទ្ធិ។ នេះបើតាមការអះអាងរបស់ឯកអគ្គរដ្ឋទូតរុស្ស៊ីប្រចាំទីក្រុងម៉ានីល នៅក្នុងឱកាសដែលនាវាចម្បាំងរបស់រុស្ស៊ី កំពុងបំពេញទស្សនកិច្ចនៅក្នុងប្រទេសហ្វីលីពីន ដែលជាសម្ព័ន្ធមិត្តចាស់ឆ្នាំរបស់សហរដ្ឋអាមេរិក ប៉ុន្តែ កំពុងមានទំនាក់ទំនងប្រេះឆានឹងគ្នា ចាប់តាំងពីលោកឌុយទែរតេចូលកាន់តំណែង។
ចុះផ្សាយនៅថ្ងៃ៖
គេនៅចាំបានថា លោកឌុយទែរតេធ្លាប់បានលើកឡើងពីបំណងចង់ផ្តាច់សម្ព័ន្ធភាពជាមួយអាមេរិក ហើយងាកទៅចងសម្ព័ន្ធភាពជាមួយចិន និងរុស្ស៊ី។ ជាការគូសបញ្ជាក់ពីការពង្រឹងទំនាក់ទំនងហ្វីលីពីន-រុស្ស៊ី នៅសប្តាហ៍នេះ នាវាចម្បាំងរុស្ស៊ីចំនួន២គ្រឿងបានចូលសំចត នៅក្នុងទីក្រុងម៉ានីល ដែលជារឿងមិនធ្លាប់មាន សម្រាប់ប្រទេសដែលជាសម្ព័ន្ធមិត្តដ៏ចាស់ឆ្នាំរបស់សហរដ្ឋអាមេរិក។
គឺនៅលើនាវាចម្បាំងនេះហើយ ដែលឯកអគ្គរដ្ឋទូតរុស្ស៊ីប្រចាំទីក្រុងម៉ានីល បានប្រកាសថា ការពង្រីកទំនាក់ទំនងអន្តរជាតិ មិនមែនមានន័យថា ចាំបាច់ត្រូវតែជ្រើសរើសប្រទេសមួយ ហើយបោះចោលប្រទេសមួយផ្សេងទៀតនោះទេ តែគឺរក្សាដៃគូចាស់ ហើយបង្កើតដៃគូថ្មីបន្ថែម ហើយថា រុស្ស៊ីត្រៀមខ្លួនជានិច្ច ដើម្បីធ្វើជាដៃគូ និងជាសម្ព័ន្ធមិត្តថ្មីមួយទៀតរបស់ហ្វីលីពីន។
រុស្ស៊ីក៏បានស្នើផងដែរចង់លក់គ្រឿងសព្វាវុធទៅឲ្យហ្វីលីពីន នៅក្នុងពេលដែលសហរដ្ឋអាមេរិកកំពុងពិចារណាផ្អាកការលក់អាវុធទៅឲ្យហ្វីលីពីន ដោយសារតែភាពចម្រូងចម្រាសជុំវិញយុទ្ធនាការប្រយុទ្ធប្រឆាំងគ្រឿងញៀនរបស់លោកឌុយទែរតេ។
គេនៅចាំបានថា នៅពេលដែលអាមេរិកលើកឡើងពីការចង់ហាមឃាត់ការលក់អាវុធទៅឲ្យហ្វីលីពីន លោកឌុយទែរតេបានឆ្លើយតបវិញដោយកំហឹងថា បើអាមេរិកមិនលក់ លោកនឹងទៅទិញពីអ្នកផ្សេង គឺពីចិន និងរុស្ស៊ី។ ស្របជាមួយនឹងការថ្លែងបែបនេះ ប្រធានាធិបតីហ្វីលីពីនបានបញ្ជូនរដ្ឋមន្រ្តីការបរទេស និងការពារជាតិរបស់ខ្លួន ឲ្យទៅកាន់ទីក្រុងម៉ូស្គូ កាលពីខែមុន ដើម្បីជជែកពីការបង្កើនទំនាក់ទំនង ហ្វីលីពីន-រុស្ស៊ី។
កាលពីថ្ងៃពុធ ឯកអគ្គរដ្ឋទូតរុស្ស៊ីប្រចាំទីក្រុងម៉ានីលបានប្រកាសសន្យាថា រុស្ស៊ីត្រៀមខ្លួនក្នុងការផ្គត់ផ្គង់គ្រឿងសព្វាវុធគ្រប់ប្រភេទទៅឲ្យហ្វីលីពីន ទោះជាអាវុធធុនស្រាល រហូតដល់ឧទ្ធម្ភាគចក្រ យន្តហោះ នាវាមុជទឹក និងគ្រឿងសព្វាវុធផ្សេងទៀត ដែលសុទ្ធសឹងជាអាវុធធុនទំនើប និងជាអាវុធថ្មីៗមិនមែនជជុះ។
កងទ័ពជើងទឹករបស់រុស្ស៊ីក៏បានប្រកាសឲ្យដឹងផងដែរ កាលពីថ្ងៃអង្គារកន្លងទៅថា ខ្លួនកំពុងរៀបចំផែនការ ដើម្បីធ្វើសមយុទ្ធរួមគ្នាជាមួយនឹងកងទ័ពជើងទឹកហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ