អង់គ្លេស៖ រុស្ស៊ីមិនគួរចាប់ខ្លួនមនុស្ស សម្រាប់ធ្វើជាល្បែងអុកការទូតនោះទេ!
ថ្ងៃទី៤មករា ប្រមុខការទូតអង់គ្លេស ថ្លែងការសោកស្តាយចំពោះពលរដ្ឋអាមេរិកសញ្ជាតិអង់គ្លេសម្នាក់ ដែលត្រូវរុស្ស៊ីចាប់ខ្លួន និងសម្រេចចោទប្រកាន់ពីបទធ្វើចារកិច្ច។ ទោសនេះ នៅរុស្ស៊ី អាចនឹងត្រូវប្រឈមមុខ ជាប់ពន្ធនាគារ២០ឆ្នាំ។ រដ្ឋមន្ត្រីការបរទេសអង់គ្លេស លើកឡើងថា រុស្ស៊ីមិនគួរចាប់ខ្លួនមនុស្ស សម្រាប់ធ្វើជាល្បែងអុកការទូតនោះទេ ហើយរឿងនេះ អង់គ្លេសមិនអាចទទួលយកបានជាដាច់ខាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
បុរសម្នាក់ឈ្មោះ Paul Whelan ត្រូវរុស្ស៊ីចាប់ខ្លួន កាលពីសប្តាហ៍មុន និងត្រូវតុលាការក្រុងម៉ូស្កូ សម្រេចចោទប្រកាន់ជាផ្លូវការហើយពីថ្ងៃព្រហស្បតិ៍ ពីបទធ្វើចារកម្មប្រឆាំងរុស្ស៊ី។ បុរសនេះ អាយុ៤៨ឆ្នាំ កើតនៅប្រទេសកាណាដា ហើយ មានសញ្ជាតិដល់ទៅ៣ គឺអាមេរិក អង់គ្លេស និងអៀរឡង់។
លោក Paul Whelan មានមុខរបរជាប្រធានទទួលបន្ទុកផ្នែកសុវត្ថិភាព របស់ក្រុមហ៊ុនផលិតរថយន្ត និងលក់គ្រឿងបម្លាស់ឡាន។ លោកធ្វើដំណើរទៅរុស្ស៊ី កាលពីខែមុននេះ គឺដើម្បីទៅចូលរួមមង្គលការរបស់មិត្តភក្តិ។ នេះបើតាមប្រភពពីប្អូនប្រុស របស់ជនជាប់ចោទ។ ក៏ប៉ុន្តែ បើតាមសារព័ត៌មាន The Gardian របស់អង់គ្លេស បុរសរូបនេះ ក៏ធ្លាប់ធ្វើជាប៉ូលីសនិងជាកងទ័ពជើងទឹករបស់អាមេរិកដែរ កាលពី១០ឆ្នាំមុន តែរូបគេត្រូវបញ្ឈប់ពីមុខងារ ដោយសារប្រព្រឹត្តិខុសវិន័យ។
ទោះយ៉ាងណាក៏ដោយ រដ្ឋមន្ត្រីការបរទេសអង់គ្លេសលោក Jeremy Hunt សង្កត់ធ្ងន់ថា គេមិនគួរយកមនុស្សធ្វើជាកូនអុក នៅក្នុងល្បែងការទូតបែបនេះទេ។ លោកក៏បានថ្លែងក្តីបារម្ភជាខ្លាំងចំពោះជនជាប់ឃុំនិងក្រុមគ្រួសាររបស់គេ ដោយសារតែបុរសរូបនេះ មានសញ្ជាតិអង់គ្លេស ដូច្នេះអង់គ្លេស ត្រូវខ្នះខ្នែងឈឺឆ្អាល។ ទន្ទឹមនេះ ឯកអគ្គរដ្ឋទូតអាមេរិកប្រចាំរដ្ឋធានីម៉ូស្កូ ក៏បានចូលទៅសួរសុខទុក្ខបុរសរូបនេះ នៅក្នុងពន្ធនាគារ ហើយមេធាវីការពារក្តីឲ្យជនជាប់ចោទ កំពុងតែដាក់ពាក្យស្នើសុំតុលាការឲ្យកូនក្តីនៅក្រៅឃុំឃាំង ជាថ្នូរនឹងប្រាក់ធានា។
អ្នកវិភាគស្ថានភាពនយោបាយអន្តរជាតិ បានសម្លឹងឃើញថា ការដែលអាជ្ញាធររុស្ស៊ីចាប់ខ្លួនបុរសនេះ គឺដើម្បីជាចំណាប់ថ្នូរ សម្រាប់ដោះដូរមនុស្ស ឬក៏ជាការសងសឹកចំពោះអាមេរិកផង ដែលបានចាប់ខ្លួនចារនារីម្នាក់របស់រុស្ស៊ី កាលពីខែកក្កដា ឆ្នាំ២០១៨។
គួរបញ្ជាក់ថា ចំណងទូតរវាងរុស្ស៊ីនិងបស្ចិមលោក ដែលជាសម្ព័ន្ធមិត្តរបស់អង់គ្លេស មិនសូវជាល្អប៉ុន្មានឡើយ តាំងតែពីមានការបំពុលអតីតភ្នាក់ចារបុរស ជាតិរុស្ស៊ីម្នាក់ ដែលលបស៊ើបការណ៍បម្រើប្រយោជន៍ឲ្យអង់គ្លេស កាលពីខែមីនា ឆ្នាំ២០១៨ មក។ វិបត្តិការទូត បានពុះកញ្ជ្រោល រហូតដល់មានការបណ្តេញមន្ត្រីទូតទៅវិញទៅមកទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ