រុស្ស៊ីប្រកាសដកហត្ថលេខាខ្លួនពីសន្ធិសញ្ញាក្រុងរ៉ូម ដែលបានបង្កើតតុលាការព្រហ្មទណ្ឌអន្តរជាតិ
ស្របនឹងក្រិត្យចេញថ្ងៃពុធ១៦វិច្ឆិកា ដោយលោកប្រធានាធិបតីពូទីន រុស្ស៊ីដកហត្ថលេខាខ្លួនចេញពីលក្ខន្តិកៈក្រុងរ៉ូម ដែលជាសន្ធិសញ្ញាស្ថាបនិកតុលាការព្រហ្មទណ្ឌអន្តរជាតិនៅក្រុងLa Haye ក្រោយពីពួកចៅក្រមតុលាការនេះហៅការភ្ជាប់ទឹកដីគ្រីមេមកនឹងរុស្ស៊ីថាជាលទ្ធផលនៃអន្តរាគមន៍កងទ័ពរុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៦
ក្រិត្យលោកពូទីនលើកឡើងថា ម៉ូស្គូអនុម័តសេចក្តីសម្រេចនេះ គឺយោងតាមសំណើក្រសួងយុត្តិធម៌ដោយសម្របយោបល់ជាមួយក្រសួងមន្ទីរឯទៀតនិងជាមួយតុលាការកំពូលរុស្ស៊ី។
ជាការរំលឹក រុស្ស៊ីបានចុះហត្ថលេខាលើលក្ខន្តិកៈក្រុងរ៉ូមនោះ កាលពីថ្ងៃ១៣កញ្ញាឆ្នាំ២០០០ ប៉ុន្តែនៅមិនទាន់ផ្តល់សច្ចាប័ននៅឡើយ។ បែបដូច្នេះ រុស្ស៊ីមិនមែនជាសមាជិកនៃតុលាការព្រហ្មទណ្ឌអន្តរជាតិហៅកាត់ថាCPI ប៉ុន្តែ រុស្ស៊ីសហការជាមួយតុលាការនេះក្នុងឋានៈជាប្រទេសសង្កេតការណ៍។ CPI មានភារៈកាត់ទោសជនណាដែលជាប់ចោទក្នុងការប្រព្រឹត្តឧក្រិដ្ឋកម្មប្រឆាំងមនុស្សជាតិនិងឧក្រិដ្ឋកម្មសង្គ្រាម។
អ្នកនាំពាក្យវិមានក្រេមឡាំង លោក Dmitri Peskov ពន្យល់បំភ្លឺថា ការដកហត្ថលេខានោះគឺតម្រូវទៅតាមផលប្រយោជន៍ជាតិសហព័ន្ធរុស្ស៊ី។
អំពីខ្លឹមសារក្រិត្យលោកប្រធានាធិបតីពូទីន ក្រសួងការបរទេសរុស្ស៊ីចង្អុលឲ្យឃើញថា ៖
-តុលាការព្រហ្មទណ្ឌអន្តរជាតិ CPI មិនបានឆ្លើយឲ្យបានយ៉ាងស័ក្តិសមឡើយ តបនឹងក្តីរំពឹងទៅលើតុលាការនេះ ហើយមិនដែលក្លាយសោះឡើយជាស្ថាប័នឯករាជ្យមែនពិត ដោយដើរតួជាអ្នកអារកាត់រកយុត្តិធម៌អន្តរជាតិ។ ជាក់ស្តែង ក្នុងសកម្មភាពខ្លួន១៤ឆ្នាំកន្លងទៅ តុលាការ CPI បានចេញសាលក្រមវិនិច្ឆ័យតែ៤ច្បាប់ប៉ុណ្ណោះ ទាំងចំណាយដល់ទៅជាង១.០០០លានដុល្លារ។
ដោយឆ្អែតដល់កទ្រាំលែងបាន ក្រសួងការទូតរុស្ស៊ីក៏ស្តីបន្ទោសតុលាការ CPI ថា ភ្ជង់ស្មារតីតែមកលើអ្វីៗដែលតុលាការនេះចាត់ទុកជាឧក្រិដ្ឋកម្មប្រព្រឹត្តដោយកងសេនាជន Ossetie និងពួកទាហានរុស្ស៊ី ក្នុងសង្គ្រាមនៅ Georgie ខែសីហាឆ្នាំ២០០៨ ប៉ុន្តែបិទមាត់ធ្វើគចំពោះឧក្រិដ្ឋកម្មកងទ័ពGeorgie ផ្ទាល់ ក៏ដូចជាចោទរុស្ស៊ីថាគាំទ្រដល់ពួកបះបោររុស្ស៊ីនិយមនៅតំបន់ខាងកើតអ៊ុយក្រែន ប៉ុន្តែធ្វើគចំពោះឧ្រិដ្ឋកម្មពួកជាតិនិយមអ៊ុយក្រែន ទល់នឹងអ្នកស្រុកនៅតំបន់បះបោរនោះ។
ក្រសួងការបរទេសរុស្ស៊ីទាញយកសេចក្តីសន្និដ្ឋានថា នៅពីមុខកាលៈទេសៈបែបនេះ ម៉ូស្គូលែងអាចទុកចិត្តលើតុលាការព្រហ្មទណ្ឌអន្តរជាតិក្រុងឡាអេ ហើយក្រោយពីដកហត្ថលេខាខ្លួនចេញពីសន្ធិសញ្ញាដែលបង្កើតតុលាការនេះ រុស្ស៊ីលែងមានកាតព្វកិច្ចអ្វីណាទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ