រុស្ស៊ីនិងកាហ្សាក់ស្ថានជាម្ចាស់ផ្ទះទទួល“ល្បែងសឹកអន្តរជាតិឆ្នាំ២០១៦”
ចុះផ្សាយនៅថ្ងៃ៖
តាំងពីថ្ងៃសៅរ៍៣០កក្កដាមក ដែលនឹងពន្យារទៅលុះរហូតដល់ថ្ងៃ១៣សីហា នៅលើដែនដីរុស្ស៊ី និងកាហ្សាក់ស្ថាន បន្តប្រព្រឹត្តទៅល្បែងអន្តរជាតិនៃកងទ័ពឆ្នាំ-២០១៦ចូលរួមដោយយោធាប្រមាណ៣.០០០នាក់ តំណាងឲ្យ២០ប្រទេសទ្វីបអឺរ៉ុប អាស៊ី អាហ្វ្រិក និង អាមេរិកឡាទីន។ គេចែកជាក្រុមប្រកួតចំនួន១២៨ក្រុម ប្រជែងគ្នា បញ្ចេញថ្វីដៃប្រយុទ្ធលើដីគោក ក្នុងអាកាស និងនៅសមុទ្រ តាមវិញ្ញាសា២៣មុខ នៅលើវាលវង់ល្បងពិសោធ ចំនួន ២០លាតសន្ធឹងលើទឹកដីធំល្ហល្ហេវនៃរដ្ឋទាំងពីរ។
ល្បែងអន្តរជាតិនៃកងទ័ពឆ្នាំ-២០១៦ ត្រូវបានសម្ពោធ កាលពីថ្ងៃសៅរ៍៣០កក្កដា នៅ ឯវាលវង់មួយបែបនេះ គឺវាលវង់កងអាកាសឈ្មោះ Aliabino មិនឆ្ងាយប៉ុន្មានពីរដ្ឋធានីម៉ូស្គូ។
ថ្លែងក្នុងពិធីនោះ រដ្ឋមន្ត្រីការពារជាតិរុស្ស៊ី-ប្រទេសម្ចាស់ផ្ទះ លោកនាយឧត្តមសេនីយ Serguei Shoigu លើកឡើងជាអាទ៏ ៖
-សម្រាប់យោធា ដែលតំណាងឲ្យប្រទេសខ្លួននិមួយៗ ការចូលរួមក្នុងល្បែងសឹកនេះ គឺមានន័យ ជាកិត្យានុភាព ហើយបើទទួលបានជ័យជំនះក្នុងការប្រកួតនេះ គឺជាកិត្តិយសតែម្តង។
-ខ្ញុំសូមជូនពរដល់គ្រប់តែអ្នកចូលរួមប្រកួតឲ្យចេះបង្ហាញនូវភាពជំនាញ នូវអំណត់អត់ធ្មត់ក្នុងការប្រកួតដ៏សុចរិត ហើយដណ្តើមឲ្យបាននូវសិទ្ធិជាអ្នកបញ្ចេញថ្វីដៃឆើតជាងគេ។
បន្ទាប់មក មានប្រព្រឹត្តទៅ ការលោតឆ័ត្រយោងដេរដាស ពេញក្នុងផ្ទៃមេឃ និងការហោះ បញ្ចេញរាងនៃយន្តហោះប្រដេញទាំងក្រុមៗ ជូនទស្សនិកជន ជាង១៥០០០នាក់ដែលបានទៅជួបជុំគ្នា អបអរសាទរចំពោះពិធីសម្ពោធល្បែងសឹកអន្តរជាតិនោះ។
ចំណែក២០ប្រទេសដែលចូលរួម គឺមានឈ្មោះដូចតទៅ៖ ចិន ឥណ្ឌា ប៉ាគីស្ថាន ម៉ុងហ្គោលី កូវ៉ែត អេហ្ស៊ីប អ៊ីរ៉ង់ អង់ហ្គោឡា ស៊ីមបាបវ៉េ វេណេស៊ុយអេឡា នីការ៉ាហ្កា ស៊ែរប៊ី អារមេនី ក្រិក បេឡារុស តាហ្ស៊ីគីស្ថាន អាស៊ែរបែដហ្សាន កៀហ្គីស៊ីស្ថាន ហើយប្រាកដណាស់ រុស្ស៊ី និងកាហ្សាក់ស្ថាន។
វត្តមានជាអ្នកសង្កេតការណ៍ គឺតំណាងនៃ៩ប្រទេស និយាយឲ្យចំ ៖ អូទ្រីស អាល់ហ្សេរីអាល្លឺម៉ង់ អ៊ីស្រាអែល ឥណ្ឌូណេស៊ី គុយបា ភូមា ណាមីប៊ី អារ៉ាប៊ី សាអ៊ូឌីត។
ក្នុងចំណោម២៣វិញ្ញាសានោះ មានវិញ្ញាសាបែបយ៉ាង Biathlon រថក្រោះចូលរួមប្រកួត ដោយក្រុមយោធាគ្រប់ប្រទេស លើកលែងតែអេហ្ស៊ីប និងប៉ាគីស្ថាន។ វាប្រព្រឹត្តទៅ នៅវាលវង់ ជាយក្រុងម៉ូស្គូ។ ខ្លឹមសារវា គឺនៅត្រង់រថក្រោះត្រូវបើអោយផុតចម្ងាយ៣វង់ មួយវង់ៗប្រវែង៧គ.ម. ទាំងឆ្លងកាត់បណ្តើរ ឧបសគ្គចំនួនរាប់សឹប នៅតាមផ្លូវបែបយ៉ាង អូរទឹក ដីទួលរណ្តៅប្រឆាំងរថក្រោះ ហើយបាញ់បណ្តើរទៅលើស៊ីបចំនួ៨ រួចក្នុងករណី បើ ស្រាប់តែបើកឃ្លាតចេញពីខ្សែផ្លូវនោះ គឺត្រូវពិន័យឲ្យបើកបន្ថែមមួយវង់ទៀត ដូច្នេះគឺខាតពេល ទំរាំអាចទៅដល់ទីដៅ ដែលកត់ត្រាដោយគណៈមេប្រយោគ កត់ត្រាទាំង កម្រិតបាញ់ត្រូវចំស៊ីប។
សម្រាប់ប្រកួតក្នុងវិញ្ញាសានេះ រុស្ស៊ីប្រគល់ទៅឲ្យក្រុមប្រកួត មកពីប្រទេសឯទៀត គឹរថក្រោះធុន T-72 ដូចរុស្ស៊ីដែរ។ ប៉ុន្តែ ប្រទេសចិនបាននាំមកជាមួយតាម ក្បួនរថភ្លើងមកកាន់រុស្ស៊ីតែម្តង គឺរថក្រោះខ្លួនធុនType-96 A។
ការបាញ់ផ្គក់នៃពួកSniper ចូលរួមដោយ ១០ប្រទេស គឺ បេឡារុស វេណេស៊ុយអេឡា ក្រិក ឥណ្ឌា អ៊ីរ៉ង់ កាហ្សាក់ស្ថាន ចិន ម៉ុងហ្គោលី រុស្ស៊ី និងស៊ឹមបាបវេ។ ខាងវិញ្ញាសានេះ វាលវង់ប្រកួត គឺនៅលើដែនដីកាហ្សាក់ស្ថាន។
ខាងភាពថ្នឹកប្រយុទ្ធនៃពួកពីឡុត ចូលរួមដោយពីឡុត១០០នាក់ តំណាងឲ្យរុស្ស៊ី ចិន ប៉ាគីស្ថាន បេឡារុស អាស៊ែរបែដហ្សាន និងកាហ្សាក់ស្ថាន។ លើកលែងតែចិនដែលបើក យន្តហោះចំបាំងរបស់ខ្លួនធុន JH-7 ក្រុមប្រកួតឯទៀតប្រតិបត្តិការគឺតាមយន្តហោះចំបាំងរុស្ស៊ីធុន Sdukhoi Mig iLushin ប្រភេទប្លែកៗ និងឧទ្ធម្ភាគចក្រយោធាធុន Mi Ka ច្រើនបែបដែរ។
ការប្រកួតនេះប្រព្រឹត្តទៅនៅក្នុងផ្ទៃមេឃខេត្ត Riazan ខាងត្បូងប្រទេសរុស្ស៊ី ជាទីដែលមានមូលដ្ឋានទ័ពអាកាសដ៏ល្បីរបស់រុស្ស៊ីស្ថិតនៅ។
ខាងនាវិកឡើងគោក ប្រពឹត្តទៅនៅមាត់សមុទ្របាល់ទិក ត្រង់ខេត្ត Kaliningrad ប៉ែកខាងលិចបង្អស់របស់រុស្ស៊ី ចូលរួមដោយពួកម៉ារីនអង់ហ្គោឡា វេណេស៊ុយអេឡា អ៊ីរ៉ង់ កាហ្សាក់ស្ថាន ចិន ប៉ាគីស្ថាន និងរុស្ស៊ី។
ខាងដណ្តើមយក"ពានរង្វាន់សមុទ្រ" ជាការប្រកួតរវាងនាវាចំបាំងលើផ្ទៃទឹកសមុទ្រខ្មៅ និងសមុទ្រCaspienne ចូលរួមដោយអាស៊ែរបែដហ្សាន កាហ្សាក់ស្ថាន ចិន និងរុស្ស៊ី។
ខាងមុជទៅជម្រៅជ្រៅក្នុងសមុទ្រ វាប្រព្រឹត្តទៅ នៅឯវាលវង់ខាងមុជទៅជម្រៅជ្រៅនៃសមុទ្រ នៅអមសាលារបស់កងនាវារុស្ស៊ីប្រចាំសមុទ្រខ្មៅនៅក្រុងផែ Sebastopol ទឹកដីគ្រីមេ ចូលរួមដោយអ៊ីរ៉ង់ រុស្ស៊ី វេណេស៊ុយអេឡា សុទ្ធតែល្បីខាងមុជទៅជម្រៅជ្រៅ។
ខាងសង់ស្ពានពោងក្រោមឈ្មោះថា "ទឹកចំហ" កាត់លើទន្លេ Oka នៅតំបន់ ស៊ីបេរីខាងកើតចូលរួមដោយប្រទេសដែលល្បីខាងឯកទេសកម្មនេះ គឺចិន រុស្ស៊ី ស៊ែរប៊ី។ ការប្រកួតនេះមាន ន័យសំខាន់សម្រាប់កងទ័ពបោះពួយតាមផ្លូវគោក ទៅកាន់ទីដៅដោយមិនអាស្រ័យនឹងឧបសគ្គ នៅពីមុខខ្លួនឡើយ។
ជាការកត់សម្គាល់ រុស្ស៊ីចូលរួមក្នុងគ្រប់តែ២៣វិញ្ញាសា ចិនចូលរួមក្នុង២២វិញ្ញាសា ហើយកាហ្សាក់ស្ថានចូលរួមក្នុង២១វិញ្ញាសា។ ការប្រកួតនេះប្រព្រឹត្តទៅនៅលើដែនដីរាប់លាន គីឡូម៉ែត្រក្រឡា លាតសន្ធឹងពីតំបន់ស៊ីបេរីនៅខាងកើត រហូតដល់ខេត្តរុស្ស៊ី នៅប៉ែកខាង លិចបង្អស់ និងពីក្រុង Saint-Petersbourg នៅប៉ែកពាយ័ព្យ រហូតដល់ក្រុងផែSebastopol ខាងត្បូងបំផុត និងនៅលើដែនដីកាហ្សាក់ស្ថានទៅផង។
ល្បែងសឹកលើកនេះ គឺជាលើកទី២ ។ ក្នុងឆ្នាំមុន ពីក្នុងចំនោម១៧ប្រទេសដែលបានចូលរួម ជាប់លេខ-១ គឺរុស្ស៊ី បាន៣១មេដាយមាស និង៣មេដាយប្រាក់។ ចិនជាប់លេខ-២ ដោយ មេដាយមាស៣ មេដាយប្រាក់ ១៨ និងមេដាយសំរឹទ្ធ៨។ បេឡារុសជាប់លេខ-៣ ដោយ មេដាយមាស១ មេដាយប្រាក់១០ និងមេដាយសំរឹទ្ធ ១២។
ចំណែកលទ្ធផលផ្លូវការនៃល្បែងអន្តរជាតិកងទ័ពឆ្នាំ២០១៦ នឹងត្រូវប្រកាសគឺនៅពេលបិទបញ្ចប់វា ថ្ងៃសៅរ៍១៣សីហា ខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ