លោក សម រង្ស៊ី៖ ដើម្បីដោះស្រាយបញ្ហាជាតិ ទាមទារឲ្យគណបក្សទាំងពីរធ្វើការរួមគ្នា
បញ្ហាដែលជាទុក្ខកង្វល់របស់ប្រទេសជាតិ គឺទាមទារឲ្យគណបក្សជាប់ឆ្នោតទាំងពីរធ្វើការរួមគ្នា ទើបអាចដោះស្រាយបាន។ នេះគឺជាការលើកឡើងរបស់លោក សម រង្ស៊ី ប្រធានគណបក្សសង្គ្រោះជាតិ នៅក្នុងពិធីជួបសំណេះសំណាលជាមួយពលរដ្ឋខ្មែរនៅទីក្រុងឡូវែល សហរដ្ឋអាមេរិក។ ជំនួបរវាងប្រមុខបក្សប្រឆាំងរូបនេះ ជាមួយអ្នកគាំទ្រនៅទីក្រុងឡូវែល បានរៀប ចំឡើងនៅថ្ងៃទី២៤ខែឧសភា និងត្រូវបានផ្សព្វផ្សាយតាមរយៈទំព័រសង្គមរបស់លោក សម រង្ស៊ី កាលពីថ្ងៃសុក្រម្សិល មិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
លោក សម រង្ស៊ី៖ រឿងច្រើនណាស់ ដែលយើងម្នាក់ឯង យើងមិនអាចធ្វើអីបាន។ ទាល់តែយើងរកកម្លាំង រកធនធាន រកចំណេះ រកជំនាញ រកបទពិសោធ ដើម្បីគួបផ្សំគ្នា បានអាចដោះស្រាយបញ្ហាដ៏លំបាក ដូចជាបញ្ហាអាយុជីវិតប្រទេសជាតិ។ ត្រូវតែដោះយ៉ាងម៉េច? ឥឡូវបើដោះតាមរបៀបមុន មានតែគណបក្សតែមួយខំ តែខំយ៉ាងណាដោះអត់ចេញ។ ហើយបញ្ហាហ្នឹងនៅរ៉ាំរ៉ៃ ធ្វើឲ្យប្រទេសជាតិយើងជួបការលំបាក។
នេះគឺជាប្រសាសន៍របស់លោក សម រង្ស៊ី ប្រធានគណបក្សសង្គ្រោះជាតិ ដែលបានថ្លែងទៅកាន់អ្នកគាំទ្ររបស់ខ្លួននៅទីក្រុងឡូវែល សហរដ្ឋអាមេរិក កាលពីថ្ងៃទី២៤ខែឧសភា។
នៅក្នុងឱកាសនោះ លោក សម រង្ស៊ី ក៏បានលើកឡើងផងដែរ អំពីវប្បធម៌សន្ទនា។ លោកថា តាមរយៈវប្បធម៌សន្ទនា គណបក្សសង្គ្រោះជាតិ នឹងលើកយកបញ្ហាដែលជាទុក្ខកង្វល់របស់ជាតិ ទៅជជែកជាមួយគណបក្សប្រជាជនកម្ពុជា ដើម្បីដោះស្រាយរួមគ្នា។ បើទោះបីជាលោកមិនទាន់មានឱកាសច្រើនលើសលុបក៏ដោយ ក៏លោកបានអះអាងថា នឹងលើកឡើងពីបញ្ហាជាអាទិភាពរបស់ជាតិទៅជជែកជាមួយគណបក្សកាន់អំណាច។ បើតាមប្រមុខបក្សប្រឆាំងរូបនេះ បញ្ហាអាទិភាពរបស់ជាតិដែលត្រូវពិភាក្សាជាមួយបក្សកាន់អំណាចរួមមាន៖ បញ្ហាបូរណភាពទឹកដី បញ្ហាអន្តោប្រវេសន៍ បញ្ហាដីធ្លី បញ្ហាទ្រព្យសម្បត្តិរបស់ជាតិ និងបញ្ហាជីវភាពរស់នៅរបស់ប្រជាពលរដ្ឋជាដើម។
ចំពោះកម្រិតនៃការយកចិត្តទុកដាក់ និងឆន្ទះរបស់គណបក្សកាន់អំណាច ក្នុងការដោះស្រាយបញ្ហាទាំងនេះយ៉ាងណានោះ លោកសម រង្ស៊ី អះអាងថា លោកមិនអាចបង្ខំបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ