លោកសម រង្ស៊ីទទូចទៅគណបក្សប្រជាជនអោយបង្កើតគណៈកម្មការដោះស្រាយបញ្ហាបោះឆ្នោត
ប្រធានគណបក្សសង្គ្រោះជាតិ លោក សម រង្ស៊ី បានផ្ញើលិខិតមួយទៅ លោក ជា ស៊ីម ប្រធានគណបក្សប្រជាជនកម្ពុជា នៅរសៀលថ្ងៃពុធនេះ ដើម្បីស្នើអោយគណបក្សនេះត្រឡប់មកនិយាយអំពីការបង្កើតគណៈកម្មការឯករាជ្យ ដោះស្រាយភាពមិនប្រក្រតីនៃការបោះឆ្នោត ទន្ទឹមគ្នានឹងក្រុមប្រឹក្សាធម្មនុញ្ញ។ លិខិតរបស់លោកសម រង្ស៊ី ទៅលោកជា ស៊ីម ធ្វើឡើងទន្ទឹមគ្នានឹងការប្រកាសធ្វើសន្និសីទកាសែតរបស់គណបក្សសង្គ្រោះជាតិ នៅថ្ងៃព្រហស្បតិ៍ស្អែក។ សន្និសីទដែលនឹងនិយាយអំពីការរៀបចំការធ្វើមហាបាតុកម្មអហិង្សាដែលគ្រោងធ្វើនៅថ្ងៃ៧ កញ្ញាផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
លោកសម រង្ស៊ី ប្រធានគណបក្សសង្រ្គោះជាតិ បានសរសេរទៅកាន់លោកជា ស៊ីម នៅថ្ងៃពុធនេះ ដើម្បីស្នើឲ្យប្រធានគណបក្សប្រជាជនកម្ពុជាចាត់បញ្ជូនតំណាងរបស់ខ្លួនមួយរូប ឲ្យមកនិយាយជាមួយគណបក្សសង្រ្គោះជាតិ អំពីការបង្កើតគណៈកម្មការឯករាជមួយ ដើម្បីដោះស្រាយភាពមិនប្រក្រតីក្នុងការបោះឆ្នោត។ នេះបើតាមការអះអាងរបស់លោក សម រង្ស៊ី ប្រាប់វិទ្យុបារាំងអន្តរជាតិ។
ប្រសិនបើគណបក្សប្រជាជនកម្ពុជាយល់ព្រមបញ្ជូនតំណាង តាមសំណើមែននោះ លោកសម រង្ស៊ី ទទូចឲ្យបញ្ជូនឥស្សរជន ដែលមានអំណាចសម្រេចចិត្ត។ លោកសម រង្ស៊ី ក៏បានបញ្ជាក់បន្ថែមផងដែរថា លោកក៏ត្រៀមខ្លួនរួចហើយដែរ ក្នុងការជួបជាមួយនឹងលោកនាយករដ្ឋមន្រ្តីហ៊ុន សែន។
នៅក្នុងពេលដែលលោកសម រង្ស៊ី កំពុងទទូចហៅឲ្យគណបក្សប្រជាជនកម្ពុជាឲ្យមកនិយាយពីការបង្កើតគណៈកម្មការឯករាជនោះ លោកក៏មិនបានទាត់ចោលដំណើរការដោះស្រាយបណ្តឹង នៅក្រុមប្រឹក្សាធម្មនុញ្ញនោះដែរ។ ក៏ប៉ុន្តែ លោកបានប្រាប់វិទ្យុបារាំងអន្តរជាតិថា លោកមិនជឿជាក់លើសមត្ថកិច្ចរបស់ក្រុមប្រឹក្សាធម្មនុញ្ញនោះទេ ទើបលោកចង់បានគណៈកម្មការឯករាជ ដែលមានសមាសភាពចម្រុះ ហើយដែលមានតួនាទីស្វែងរកការពិត នៃភាពមិនប្រក្រតី ក្នុងការបោះឆ្នោត។
ពេលនេះ នៅមិនទាន់ឃើញមានប្រតិកម្មយ៉ាងណា ពីគណបក្សប្រជាជនកម្ពុជានៅឡើយទេ ទាក់ទងនឹងលិខិតរបស់លោកសម រង្ស៊ី ខណៈដែលមន្រ្តីជាន់ខ្ពស់របស់គណបក្សប្រជាជនកម្ពុជាមួយចំនួន បានអះអាងថា ពួកគេនៅមិនទាន់បានទទួលដំណឹងពីលិខិតរបស់លោកសម រង្ស៊ី នៅឡើយទេ។
គួរកត់សម្គាល់ថា លិខិតរបស់លោកសម រង្ស៊ី ទៅលោកជា ស៊ីម ប្រធានគណបក្សប្រជាជនកម្ពុជា ត្រូវបានធ្វើឡើងទន្ទឹមគ្នានឹងសេចក្តីជូនដំណឹងរបស់គណបក្សសង្រ្គោះជាតិ នៅថ្ងៃពុធនេះ អំពីសន្និសីទកាសែត នៅព្រឹកថ្ងៃព្រហស្បតិ៍ទី ២៩សីហា។ សន្និសីទកាសែត ដែលគណបក្សសង្រ្គោះជាតិ ប្រកាសថា នឹងផ្តោតទៅលើភាពមិនប្រក្រតីក្នុងការបោះឆ្នោត និងការរៀបចំធ្វើមហាបាតុកម្មអហិង្សាប្រឆាំងលទ្ធផលបោះឆ្នោត ដែលគ្រោងធ្វើ នៅថ្ងៃទី៧ កញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ